Read Dagbani Aizaia 65 Bible Online

Aizaia 65 - Dagbani bible

Aizaia 65

¹ N zaŋ mmaŋ’ wuhi ninvuɣ’ shɛb’ bɛn bi bɔhi n yɛla, ka chɛ ka ninvuɣ’ shɛb’ bɛn bi bo ma nya ma. N yɛli zuliya shɛb’ bɛn bi suhiri ma, “Mani m-bɔŋɔ, mani m-bɔŋɔ.”

² N kul malila shili n-guhiri sahakam ni n deei n niriba bɛn niŋ tipawumli n-tumdi din bi tuhi, ka doli bɛmaŋmaŋ’ suhuyubu soli maa.

³Bɛ kul tumdila vi tuma, ka di kuri ma suli. Bɛ maanila maligu buɣa ni, ka tuɣindi tulaale buɣa maligu bimbini zuɣu.

⁴Bɛ chanila gbala ni yuŋ ti buɣiri kpiimba baɣiri, ka ŋubiri kuruchunim’ nimdi; ka piɛbiri buɣa maligu nimdi bim.

⁵Di saha ka yɛri bɛ taba, “Ti nyɛla bɛn be kasi; miligimiya ka chɛ ti.” M mini niriba bɛn be lala ku tooi kpe. N suhuyiɣisili zaŋ chaŋ bɛ sani ŋmanila buɣim din bi kpiri dabisili puuni zaa.

⁶“Nyama, di pun sabimi ʒiɛya n sani, m bi yɛn shini, amaa n ni darigi bɛ tibili.

⁷N ni darigi bɛ tibili bɛ daalahichi mini bɛ yaannim’ daalahichi zuɣu, dama bɛ tuɣindi tulaale zim buɣa maligu zoya zuɣu, ka tɔɣisiri yɛtɔɣ’ biɛri zaŋ chaŋ m polo. N shiri ni darigi bɛ tibili pam bɛ tuumbiɛri maa zuɣu. Man’ Yawɛ n-yɛli lala maa.”

⁸Man’ Yawɛ lan yɛli, “So na ʒi n-zaŋ wain tiwal’ viɛla labi, amaa o naɣ’ zaŋdi li mi dooi wain. Dinzuɣu n gba ku bahi n niriba zaa yoli, n ni tiligi bɛ puuni ninvuɣ’ shɛb’ bɛn jɛmdi ma.

⁹N ni chɛ ka Yaakubu zuliya bɛn nyɛ Judanim’ la mini bɛ yaansi su n zoya ni tiŋgbana la. N ninvuɣ’ gahinda bɛn jɛmdi ma n-yɛn be nimaani.

¹⁰ N niriba bɛn jɛmdi ma maa ni zaŋdi bɛ piɛri mini bɛ niɣi chani Sharɔn bɔpiɛligu ni mini Akɔr Vinvamli[16] ni ka bɛ ti ŋubiri mɔri.

¹¹“Amaa yinim’ bɛn zaɣisi ma, ka tam n zoli din be kasi la yɛla, ka puhiri churi ka jɛmdi zuɣusuŋ wuna la,

¹²n ni chɛ ka bɛ zaŋ takɔbi kun ya. Yi ni ti teei dɔni ka bɛ kun ya. Dama n daa boli ya ka yi zaɣisi, ka tɔɣisi ya yɛtɔɣa ka yi zaɣisi wumbu; amaa ka tumdila tuumbiɛri zaŋ chaŋ n sani, ka dolila n ni je shɛli.

¹³Dinzuɣu man’ yi Duuma NAAWUNI yɛliya: N niriba bɛn jɛmdi ma ni di n-tiɣi ka nyu, amaa ka kum ni kɔnyuri mali yinima. Bɛ ni mali suhupiɛlli, amaa ka yinim’ di vi.

¹⁴Bɛ ni yiini yila ni suhupiɛlli, amaa yinima ni kum ni suhusaɣiŋgu.

¹⁵N niriba ni wuhi ni yi yuli leela noli n-din ya, ka man’ Yawɛ ŋun nyɛ yi Duuma ŋɔ ni chɛ ka yi kpi, amaa n ni ti n niriba maa yuli din nyɛ zaɣ’ palli.

¹⁶Ka tiŋgbani ŋɔ ni so yi bɔri alibarika, Naawuni ŋun ʒe yim ŋɔ n-ni niŋ alibarika maa niŋ o ni. Ka ŋunkam mi yɛn po pɔri, ŋun pom li dalim la Naawuni ŋun ʒe yim maa. Dama n tam yɛl’ shɛŋa din pun gari la yɛla. Di zaa yiɣiya ka firi.”

¹⁷ Yawɛ yɛliya, “N yɛn namla zuɣusaa zaɣ’ palli mini dunia palli, ka so ku lan teei binshɛŋa din pun gari la yɛla.

¹⁸Maliya suhupiɛlli sahakam n ni nam shɛli zuɣu. Suhupiɛlli ni be n ni nam Jɛrusalɛm shɛli maa ni, ka di niriba mali suhupiɛlli.

¹⁹ N ni mali suhupiɛlli Jɛrusalɛm mini n niriba zuɣu, ka so ku lan kum bee n-fabili di ni.

²⁰Biliɛɣu ku lan kpi nimaani bee ka ninkurigu ti kpi ka o saha na bi paai; dama nir’ yi ti niŋ yuun’ kɔbiga ka kpi, bɛ ni yɛli ni o nyɛla bipolli, ka so mi yi bi paai yuun’ kɔbiga ka kpi, bɛ ni yɛli ni noli n-di o.

²¹Bɛ ni ti me bɛ yinsi n-kpe m-be di ni, ka sa tihi ka di wali ka bɛ di di wala maa.

²²So ti ku me o yili ka shɛb’ deei li kpe m-beni, ka so mi ti ku sa tihi ka shɛb’ deei di wala di. N niriba maa ni di bɛ nuhi tuma daanfaani. Tihi ni yɛn yuuri shɛm, lala ka n niriba maa gba yɛn yuura.

²³Bɛ ni di nasara bɛ tuma ni, ka alɔbo ku di bɛ bihi. N ni niŋ alibarika niŋ bɛ mini bɛ bihi ni sahakam.

²⁴Bɛ yi kuhi boli ma, bɛ noli ti yɛn lu tiŋa, n ni saɣi. Bɛ yi suhiri ma, bɛ noli ti yɛn lu tiŋa, n ni deei bɛ suhigu.

²⁵ Kunduna mini piɛbihi ni ti laɣindi dira, ka gbuɣima ti ŋubiri mɔri kaman niɣi la, ka tinvura bindirigu ni nyɛla taŋkpaɣu. Bɛ ti ku lan dim so bee n-ku so n zoli din be kasi maa luɣ’ shɛlikam zaa. Man’ Yawɛ n-yɛli lala maa.”