Read Dagbani Lɛvinima 15 Bible Online

Lɛvinima 15 - Dagbani bible

Lɛvinima 15

¹Ka Yawɛ daa yɛli Musa mini Aduna:

²Yɛlimiya Izraɛlnima: Binshɛli yi yi doo tooni na, din yi o tooni na maa nyɛla daɣiri.

³Zaligu ŋɔ nyɛla binshɛli din yi o tooni na ka nyɛ daɣiri maa zaligu. O tooni yi yiɣisi bee di yi bi yiɣisi, di nyɛla daɣiri o sani.

⁴Ka di ni yi ninvuɣ’ so tooni na maa yi dɔni bindoo kam zuɣu di ni nyɛla din be daɣiri ni, ka o ni ʒini binshɛlikam zuɣu ni nyɛla din be daɣiri ni.

⁵Ka ŋunkam shihi dilan’ bindoo maa, ŋun’ paɣim’ o situra ka su kom, ka nyɛ ŋun ni be daɣiri ni hal ni zaawuni.

⁶Ka ŋunkam ti ʒini di ni yi ninvuɣ’ so tooni na maa ni ʒini binshɛli zuɣu, dilan’ ŋun’ paɣim’ o situra ka su kom, ka nyɛ ŋun ni be daɣiri ni hal ni zaawuni.

⁷Ka ŋunkam shihi di ni yi ninvuɣ’ so tooni na maa, dilan’ ŋun’ paɣim’ o situra ka su kom, ka nyɛ ŋun ni be daɣiri ni hal ni zaawuni.

⁸Ka di ni yiri so tooni na maa yi tuhi nintɔri ka di shihi ninvuɣ’ so ŋun ka daɣiri, dilan’ ŋun’ paɣim’ o situra ka su kom, ka nyɛ ŋun ni be daɣiri ni hal ni zaawuni.

⁹Ka di ni yiri ninvuɣ’ so tooni na maa yi ba binshɛlikam n-ʒini di gali zuɣu, gali maa ni leei din be daɣiri ni.

¹⁰Ka ŋunkam shihi dilan’ ni ʒini binshɛlikam zuɣu ni be daɣiri ni hal ni zaawuni, ka ŋunkam ʒi bini maa, ŋun’ paɣim’ o situra ka su kom, ka nyɛ ŋun ni be daɣiri ni hal ni zaawuni.

¹¹Ka di ni yiri ninvuɣ’ so tooni na maa yi bi paɣ’ o nuhi ka shihi ninvuɣ’ so, dilan’ ŋun’ paɣ’ o situra ka su kom, ka nyɛ ŋun ni be daɣiri ni hal ni zaawuni.

¹²Ka di ni yiri so tooni na maa yi shihi yaɣiri laa kam, bɛn’ ŋmam’ li, ka di yi nyɛ dari bini, bɛn’ paɣimi li kom.

¹³Ka di ni yiri ninvuɣ’ so tooni na maa yi ti nya omaŋa, ŋun’ zaŋmi daba ayopɔin niŋ o daɣiri ni yibu dabisa, ka paɣ’ o situra, ka su ko’ viɛlli n-yi daɣiri ni.

¹⁴Ka dabisi’ shɛli din pahir’ anii dali, ŋun’ bom’ ŋmanʒiɛh’ ayi bee yiŋ’ ŋmambih’ ayi n-ka Yawɛ tooni na Yawɛ chirigibu shee suɣili dunol’ ni nti zaŋ ba ti maligumaana,

¹⁵ka maligumaana maa zaŋ ba mali sara; yino ni nyɛla alahichi sanyoo sara, ka ŋun’ la mi nyɛ bɛ ni zaŋdi sara shɛli nyɔri buɣim la. Ka maligumaana maa yo din yi o tooni na maa samli Yawɛ sani.

¹⁶Doo yi chɛ ka o dɔbilim yina, ŋun’ sum’ o niŋgbuŋ zaa kom, ka nyɛ ŋun ni be daɣiri ni hal ni zaawuni.

¹⁷Ka o dɔbilim maa yi shihi situra kam mini biŋkɔbigu gbaŋ kam, bɛn’ paɣimi li, ka di ni nyɛ din be daɣiri ni hal ni zaawuni.

¹⁸Doo mini paɣ’ yi dɔni, bɛ niriba ayi maa bɛn’ sum’ kom, ka nyɛ bɛn ni be daɣiri ni hal ni zaawuni.

¹⁹Paɣ’ yi nya sɔrilim din nyɛ o ni pun nyari shɛli sahakam, o ni be daɣiri ni hal ni daba ayopɔin, ka ŋunkam shih’ o ni be daɣiri ni hal ni zaawuni.

²⁰Ka o sɔrilim maa yi na bi naai ka o dɔni binshɛlikam zuɣu ni nyɛla din be daɣiri ni, o yi lan ʒini binshɛlikam zuɣu, di gba ni nyɛla din be daɣiri ni.

²¹Ka ŋunkam shih’ o bindoo, dilan’ ŋun’ paɣim’ o situra ka su kom, ka nyɛ ŋun ni be daɣiri ni hal ni zaawuni.

²²Ka ŋunkam shihi paɣ’ maa ni ʒini binshɛlikam zuɣu, dilan’ ŋun’ paɣim’ o situra ka su kom, ka nyɛ ŋun ni be daɣiri ni hal ni zaawuni.

²³Ka Paɣ’ maa yi ʒinila bindoo zuɣu bee binshɛlikam zuɣu, ka dilan’ shihi li, o ni be daɣiri ni hal ni zaawuni.

²⁴Ka o mini do’ so yi dɔni, ka o daɣiri maa tabil’ o, doo maa ni be daɣiri ni daba ayopɔin, ka bindo’ shɛlikam zuɣu doo maa ni dɔni ni nyɛla din be daɣiri ni.

²⁵Ka ʒim yi yi paɣ’ tooni dabisi’ gbaliŋ, ka di pala o sɔrilim nyabu saha bee o yi nya sɔrilim ka di yi hal ti yaɣi di saha, o nyɛla ŋun be daɣiri ni saha shɛli zaa di ni na yiri maa, o ni yi nya sɔrilim ka be daɣiri ni shɛm la, lala ka o ni be daɣiri ni.

²⁶Ka o ʒim maa yi na yir’ o, ka o dɔni bindo’ shɛlikam zuɣu, di ni bemi kaman o ni yi pun nyari sɔrilim ka dooni bindo’ shɛli zuɣu ka di nyɛ shɛm la. Ka o ni ʒini binshɛlikam zuɣu ni nyɛla din be daɣiri ni kaman o ni yi nya sɔrilim la.

²⁷Ka ŋunkam shihi binyɛra maa ni be daɣiri ni, ka di simdi ni dilan’ paɣ’ o situra ka su kom, ka ni be daɣiri ni hal ni zaawuni.

²⁸Amaa paɣ’ maa yi ti nya omaŋa, ŋun kalimi daba ayopɔin, di nyaaŋa o ni yi daɣiri ni.

²⁹Ka dabisi’ shɛli din pahiri daba anii dali, ŋun’ bom’ ŋmanʒiɛh’ ayi bee yiŋ’ ŋmambih’ ayi n-chaŋ Yawɛ chirigibu shee suɣili dunol’ ni ti ti maligumaana.

³⁰Ka maligumaana maa ti zaŋ zaɣ’ yino mali alahichi sanyoo sara, ka zaŋ ŋun’ la mi mali bɛ ni zaŋdi sara shɛli nyɔri buɣim la; ka maligumaana maa mali sanyoo sara yo daɣ’ shɛli din daa yi o ni maa samli Yawɛ sani ti o.

³¹A ni yɛn niŋ shɛm n-chɛ ka Izraɛlnim’ maa yi daɣiri ni m-bala, di yi pa lala bɛ ni saɣim m biɛhigu shee din be bɛ sunsuuni ŋɔ ka kpi ni bɛ daɣiri.

³²Do’ so ŋun dɔbilim yina ka di zuɣu chɛ ka o kpe daɣiri ni zaligu m-bala,

³³di lan nyɛla paɣ’ so ŋun nya sɔrilim zaligu ni binshɛli ni yiri do’ so bee paɣ’ so tooni na zaa zaligu, ka lan nyɛ do’ so ŋun mini paɣ’ so ŋun na be daɣiri ni dɔni gba zaligu.