Read Dagbani Lɛvinima 17 Bible Online

Lɛvinima 17 - Dagbani bible

Lɛvinima 17

¹Ka Yawɛ daa yɛli Musa:

²Yɛlim’ Aduna min’ o bidibisi ni Izraɛlnim’ zaa ni man’ Yawɛ ni zali shɛm m-bɔŋɔ:

³Izraɛl ninvuɣ’ so yi kɔrigi nahu bee piɛɣu bee bua yi sansani ŋɔ ni bee kpaŋa,

⁴ka bi zaŋ o ka Yawɛ chirigibu shee suɣili ŋɔ dunol’ ni na nti mali sara ti Yawɛ o biɛhigu shee ŋɔ, dilan’ nyɛla ŋun mali taali nyɛvili dibu ni, ka di simdi ni bɛ yihi dilan’ o niriba ni.

⁵Dimbɔŋɔ ni chɛ ka Izraɛlnim’ zaŋ bɛ ni kɔriti binneen’ shɛb’ maani sara mɔɣu ni la ka Yawɛ sanna Yawɛ chirigibu shee suɣili dunol’ ŋɔ ni nti ti maligumaana, ka o zaŋ ba mali suhudoo sara maligu.

⁶Ka maligumaana maa ti zaŋ binʒim maa kpaai vie Yawɛ sara maligu bimbini din be Yawɛ chirigibu shee suɣili dunol’ ni la, ka zaŋ biŋkpam nyo buɣim ka di nyɛ din nyom viɛl’ Yawɛ sani.

⁷Ka di zuɣu chɛ ka bɛ ku lan kɔri binyɛra mali alizinnim’ bɛn ŋmani buhi la, bɛ ni daa saɣim bɛmaŋa shɛb’ sani la. Dimbɔŋɔ yɛn nyɛla zaligu bɛ ʒiɛmani kam ni.

⁸Ka a ti lan yɛli ba yaha ni Izraɛl ninvuɣ’ so bee saan’ shɛb’ bɛn be bɛ sani ninvuɣ’ so yi yɛn mali bɛ ni zaŋdi sara shɛli nyɔri buɣim la bee sara maligu,

⁹ka bi zaŋ li ka Yawɛ chirigibu shee suɣili dunol’ ŋɔ ni na ti mal’ li ti Yawɛ, bɛn’ yihim’ dilan’ Yawɛ niriba ni.

¹⁰ Izraɛl ninvuɣ’ so bee saan’ shɛb’ bɛn be bɛ sani ninvuɣ’ so yi ti ŋubi bin’ so ŋun kpi nyiŋgo’ muni, n suhu ni yiɣisi bahi dilan’ zuɣu, ka yih’ o n niriba ni.

¹¹ Dama niŋgbuŋ nyɛvili bela ʒim puuni, ka n chɛ ka bɛ zaŋ li pa sara maligu bimbini zuɣu tin ya ni di yo yi nyɛviya tiliginsim samli. Dama ʒim n-nyɛ din yɔri alahichi samli, di ni nyɛ nyɛvili la zuɣu.

¹²Dinzuɣu ka n yɛli Izraɛlnima, “Yinim’ lzraɛlnim’ bee tinzunnim’ bɛn be yi sani, miriya ka yi ŋubi bin’ so ŋun kpi nyiŋgo’ muni.”

¹³Ka Izraɛl ninvuɣ’ so bee saan’ shɛb’ bɛn be yi sani ninvuɣ’ so yi go piɛli gbaai biŋkɔbigu bee nooŋa ŋun ŋubbu bi chihira, dilan’ ŋun’ kɔrigim’ bini maa ʒim bahi tiŋa, ka niŋ taŋkpaɣu pa di zuɣu.

¹⁴Dama binnɛɔŋ kam nyɛvili nyɛla o ʒim maa. Dinzuɣu ka n yɛli Izraɛlnima, “Miriya ka yi ŋubi binnɛɔŋ kam ʒim, dama binnɛɔŋ kam nyɛvili nyɛla o ʒim, ka ŋunkam ŋub’ li, bɛn’ yihim’ o o niriba ni.”

¹⁵Ka ŋunkam ti ŋubi bin’ so ŋun kpi nyiŋgo’ muni bee biŋkɔbiri ni dar’ tɔhi binshɛli, dilan’ yi nyɛla tiŋbia bee sana, ŋun’ paɣim’ o situra, ka su kom, ka nyɛ ŋun ni be daɣiri ni hal ni zaawuni, di nyaaŋa ka o naanyi leei ŋun ka daɣiri ni.

¹⁶Amaa o yi bi paɣ’ o situra bee n-su kom, o taali maa kul ni ʒi o zuɣu.