Read Dagbani Lɛvinima 18 Bible Online

Lɛvinima 18 - Dagbani bible

Lɛvinima 18

¹Ka Yawɛ daa yɛli Musa:

²Yɛlim’ Izraɛlnima: Man’ Yawɛ n-nyɛ yi Naawuni.

³Miriya ka yi niŋdi kaman yi ni daa be Ijipti tiŋgbɔŋ ni ka bɛ niŋdi shɛm la. Ka miriya ka yi ti niŋdi kaman n ni yɛn zaŋ ya kulisi Keenan tiŋgbɔn shɛli ni ŋɔ nim’ ni niŋdi shɛm la. Miriya ka yi ti niŋ bɛ ni niŋdi shɛm.

⁴Man’ Yawɛ n-nyɛ yi Naawuni, di simdi ni yi niŋ n ni zali ya shɛm n-gbibi n zaligunim’ ka dol’ li.

⁵ Mani n-nyɛ Yawɛ, dinzuɣu gbibiya n zaligunim’ mini n ni yɛli ya shɛm, ka tummiya tuun’ shɛli din ni chɛ ka daadam be.

⁶Mani n-nyɛ Yawɛ. Yi ni so miri ka o ti chɛ ka o min’ o dɔɣira dɔni.

⁷So miri ka o ti zaŋ o ma dɔni, dama o nyɛla o ba paɣa ka nyɛ o ma, di bi simdi ni o zaŋ o dɔni.

⁸ So miri ka o zaŋ o ba paɣ’ dɔni, dama o nyɛla o ba paɣa.

⁹ So miri ka o zaŋ o tizɔpaɣa dɔni, o yi nyɛla o ba bipuɣiŋga bee o ma bipuɣiŋga, bɛ yi dɔɣ’ o la yiŋa bee luɣ’ shɛli polo.

¹⁰So miri ka o zaŋ o bidibiga bipuɣiŋga bee o bipuɣiŋga mi bipuɣiŋga dɔni, dama di nyɛla vi tuuni.

¹¹So miri ka o zaŋ o ma nyintaa bipuɣiŋga ŋun nyɛ o ba dapala dɔni, dama o nyɛla o tizɔpaɣa.

¹²So miri ka o zaŋ o ba tizɔpaɣ’ dɔni, dama o nyɛla o ba dɔɣira ni yɛlimaŋli.

¹³So miri ka o zaŋ o mapira dɔni, dama o nyɛla a ma dɔɣira ni yɛlimaŋli.

¹⁴ So miri ka o zaŋ o ba mabia ŋun nyɛ doo paɣa dɔni, dama o nyɛla o ma.

¹⁵ So miri ka o zaŋ o bia paɣa dɔni, dama o nyɛla o bia paɣa, di bi simdi ka o zaŋ o dɔni.

¹⁶ So miri ka o zaŋ o mabia paɣ’ dɔni, dama o nyɛla o mabia maa paɣa.

¹⁷ So miri ka o laɣim paɣ’ min’ o bipuɣiŋga dɔni, ka miri ka o bo o bidibiga bipuɣiŋga bee o bipuɣiŋga mi bipuɣiŋga, bɛ nyɛla paɣ’ shɛb’ bɛn nyɛ o dɔɣiriba ni yɛlimaŋli. Lala nyɛla zaɣ’ biɛɣu.

¹⁸So miri ka o kpuɣ’ o paɣ’ mabia pah’ o zuɣu saha shɛl’ o paɣ’ maa ni na be o nyɛvili ni maa.

¹⁹ Paɣ’ yi nya sɔrilim ka di na bi naai, nyin’ di mir’ o ni a bo o.

²⁰ Miri ka a bo a kpee paɣa n-kpɛh’ amaŋ’ daɣiri ni o sani.

²¹ Miriya ka yi ti zaŋ yi bi’ so ti ni bɛ nyo buɣim mali buɣili Molɛk ka di zuɣu chɛ ka yi saɣim yi Naawuni yuli. Mani n-nyɛ Yawɛ.

²² Di bi simdi ka doo bo o dokpee kaman paɣ’ la, di nyɛla din chihira.

²³ Di bi simdi ka doo mini biŋkɔbigu dɔni bee ka paɣ’ zaŋ omaŋ’ ti biŋkɔbigu ka o min’ o dɔni; di nyɛla biriginsim.

²⁴Miriya ka yi ti niŋ dimbɔŋɔnima n-saɣim yimaŋa, dama n ni kariti ninvuɣ’ shɛb’ ka chɛri palo tiri ya ŋɔ zaŋla dimbɔŋɔnim’ saɣim bɛmaŋa.

²⁵Lala ka bɛ daa niŋ saɣim bɛ tiŋgbɔŋ maa, ka lala zuɣu chɛ ka n-daa darigi di tibili, ka di gbuɣi di niriba maa bahi maa.

²⁶Amaa yinim’ gbibi n ni zali zaligu shɛŋa, ka miriya ka yi ni tiŋbia bee saan’ so ŋun be yi sani tum din chihiri maa.

²⁷(Dama din chihiri maa ka ninvuɣ’ shɛb’ bɛn daa daŋ yi tooni be tiŋgbɔŋ ŋɔ ni daa yi tumda, ka di chɛ ka tiŋgbɔŋ maa saɣim).

²⁸Di yi pa lala, yi yi saɣim tiŋgbɔŋ maa, di ni gbuɣi ya bahi kaman di ni daa gbuɣi zuliya shɛb’ bɛn daa be yi tooni la bahi shɛm la.

²⁹Dama bɛnkam ti tum din chihiri maa, bɛn’ yihim’ ba bɛ daŋ ni.

³⁰Dinzuɣu doliya n zaligunima, ka miriya ka yi ti doli ninvuɣ’ shɛb’ bɛn daa pun daŋ be tiŋgbɔŋ maa ni kaya din chihiri la, ka miriya ka yi ti zaŋ li saɣim yimaŋa: Man’ Yawɛ n-nyɛ yi Naawuni.