Read Dagbani Lɛvinima 20 Bible Online

Lɛvinima 20 - Dagbani bible

Lɛvinima 20

¹Ka Yawɛ daa yɛli Musa:

²Yɛlim’ Izraɛlnima: Izraɛl do’ so bee saamba bɛn be Izraɛl do’ so yi ti zaŋ o bia ti Molɛk, bɛn’ kum’ o; tiŋ’ maa nim’ bɛn’ labim’ o kuɣa.

³Man’ maŋmaŋ’ ni ti pa nina lihiri dilana, ka yih’ o n niriba ni, o ni zaŋ o bia ti Molɛk n-ta m biɛhigu shee daɣiri, ka dihi n yuli din be kasi ŋɔ vi zuɣu.

⁴Ka so yi zaŋ o bia ti Molɛk, ka tiŋ’ maa nim’ nya ka sɔɣ’ li ka bi ku o,

⁵dindina n ni pa n nina lihiri doo maa min’ o yiŋnima, ka ku o mini ninvuɣ’ shɛb’ bɛn zaa dol’ o jɛmdi Molɛk maa.

⁶Ninvuɣ’ so yi ŋmaligi chaŋ jinwariba sani bee bukpahinim’ sani nti doli ba, n ni pa nina lihiri dilana, ka yih’ o n niriba ni.

⁷Dinzuɣu malimiya yimaŋa m-be kasi, dama man’ Yawɛ n-nyɛ yi Naawuni.

⁸Gbibiya n zaligunima ka tummiya di tuma; Mani n-nyɛ Yawɛ ŋun maani ya ka yi be kasi.

⁹ Ŋunkam tu o ba bee o ma, bɛn’ kum’ o, o ni tu o ba bee o ma maa zuɣu, o ʒim yihibu maa taali ʒila o zuɣu.

¹⁰ Doo yi tum zina ni o kpee paɣa, bɛn’ kum’ o mini paɣ’ maa zaa.

¹¹ Doo yi zaŋ o ba paɣ’ dɔni, dilan’ nyɛla ŋun nya o ba zaɣim, ka di simdi ka bɛ ku bɛ niriba ayi maa, ka bɛ ʒim yihibu taali ʒi bɛ zuɣu.

¹² Doo yi zaŋ o bia paɣ’ dɔni, bɛn’ kum bɛ niriba ayi maa, bɛ tumla taali bɛ ni nyɛ dɔɣiri yini zuɣu, bɛ ʒim yihibu taali ʒila bɛ zuɣu.

¹³ Doo yi dɔni o do’ kpee kaman paɣ’ la, bɛ niriba ayi maa tum din chihira, ka di simdi ka bɛ ku bɛ niriba ayi maa, ka bɛ ʒim yihibu taali ʒi bɛ zuɣu.

¹⁴Doo yi kpuɣi paɣ’ min’ o bia leeg’ o paɣiba di nyɛla ninvuɣ’ biɛtali, ka di simdi ka bɛ nyo doo maa min’ o paɣiba maa buɣim din ni chɛ ka ninvuɣ’ biɛtali maa ku lan be bɛ sunsuuni.

¹⁵Doo yi goli biŋkɔbigu, bɛn’ kum’ o, ka ku biŋkɔbigu maa gba.

¹⁶ Paɣ’ yi zaŋ omaŋ’ ti biŋkɔbigu kam ka o gol’ o, bɛn’ kum’ paɣa maa mini biŋkɔbigu maa, kumiya ba, ka bɛ ʒim yihibu taali ʒi bɛ zuɣu.

¹⁷ Doo yi zaŋ o tizɔpaɣa ŋun nyɛ o ba bipuɣiŋga bee o ma bipuɣiŋga dɔni n-nya o zaɣim, ka paɣa maa gba nya o zaɣim, di nyɛla vi tuuni, ka di simdi ka bɛ yihi ba bɛ niriba ni. O ni zaŋ o tizɔpaɣ’ dɔni maa zuɣu, di simdi ni bɛ darig’ o tibili.

¹⁸ Doo yi zaŋ paɣ’ so ŋun sɔrilim na bi naai dɔni m-pirig’ o zaɣim, o yihila paɣ’ maa ʒi’ soya zahira, ka paɣ’ maa gba yih’ omaŋmaŋ’ ʒi’ soya zahira, di simdi ka bɛ yihi bɛ niriba ayi maa zaa bɛ daŋ ni.

¹⁹Miri ka a bo a piriba bee a mapira, dama nir’ yi niŋ lala o dɔɣira ka o bo maa, di simdi ni bɛ darigi bɛ tibili.

²⁰ Doo yi zaŋ o ŋahiba paɣ’ dɔni, o ŋahiba maa zaɣim ka o nya maa, di simdi ni bɛ darigi bɛ tibili; bɛ ku dɔɣi bia hal ti kpi.

²¹ Doo yi kpuɣ’ o mabia paɣa, o tum zaɣ’ biɛɣu, ka nya o mabia zaɣim, bɛ ku dɔɣi bia.

²²Dinzuɣu gbibiya n ni zali ya zaligu shɛŋa zaa, ka tummiya di tuma, dina n-ni chɛ ka n ni zaŋdi ya kuni tiŋgbɔn shɛli ni maa ti ku gbuɣi ya bahi.

²³Ka miriya ka yi ti doli n ni kariti zuliya shɛb’ ka chɛri ya ŋɔ kaya, dama bɛ daa tumdila dimbɔŋɔnim’ zaa, dinzuɣu ka n zaɣisi ba.

²⁴Amaa n yɛlila yinima: N ni zaŋ bɛ tiŋgbɔn maa tin ya, ka yi di li fali n-su li. Di nyɛla tiŋgban’ shɛli din mali bihim mini shiri pam.[5] Man’ Yawɛ n-nyɛ yi Naawuni ŋun woligi ya ka chɛ zuliya shɛba.

²⁵Dinzuɣu di simdi ka yi woligi biŋkɔb’ shɛb’ bɛn pa daɣiri ka chɛ bɛn nyɛ daɣiri ni noombihi shɛb’ bɛn pa daɣiri ka chɛ bɛn nyɛ daɣiri. Miriya ka yi ti zaŋ biŋkɔbigu bee noombil’ bee binshɛli n ni wuhi ni di nyɛla daɣiri la kpɛhi yimaŋ’ daɣiri ni.

²⁶Di simdi ka yi be kasi n sani; dama man’ Yawɛ nyɛla ŋun be kasi, ka woligi ya zuliyanim’ ni ni yi nyɛ n dahalali.

²⁷Paɣ’ bee doo yi leei jinwara bee bukpaha bɛn’ kum’ o. Bɛn’ labimi ba kuɣa. Bɛ ʒim yihibu taali ni ʒi bɛmaŋmaŋ’ zuɣu.