Read Dagbani Lɛvinima 24 Bible Online

Lɛvinima 24 - Dagbani bible

Lɛvinima 24

¹Yawɛ daa lan yɛli Musa:

²Zalim’ Izraɛlnim’ ni bɛ bom’ bɛ ni dooi olivi kpa’ shɛli din nyɛ alali na nti niŋdi firilanim’ maa puuni din ni chɛ ka firilanim’ maa diri saha shɛlikam.

³Ka Aduna ti nyɔr’ li zaani Alikauli Adaka la gbini Yawɛ tooni pateesa la nyaaŋa jɛmbu suɣili maa puuni zaawuni hal ni asiba sahakam. Di ni ti nyɛla zaligu sahakam yi ʒiɛmani kam ni.

⁴Di simdi ka o ti zaŋ firilanim’ maa tamtam salima firilatamdigu maa zuɣu ka di doli soli Yawɛ tooni sahakam.

⁵Ka a ti zaŋ zim viɛlli mali bɔrɔbɔro kpil’ pinaayi. Zaŋm’ zim kilɔgiram yini m-mali bɔrɔbɔro kpilli kam.

⁶ Ka a zaŋ li sɔŋ pie taba kulis’ ayi salima teebuli la zuɣu. Kul’ yini kam zuɣu zaɣ’ kpil’ ayɔbu.

⁷Ka a zaŋ firanki tulaale zim alali pahi kul yini kam zuɣu, ka yi ti zaŋ li pahi bɔrɔbɔro maa zuɣu nyo buɣim mali sara ti Yawɛ, ka di leei shɛhira.

⁸Vuhim Dabisili dali kam, Aduna ni zaŋdi li zaani ka di doli soli Yawɛ tooni kaman lzraɛlnim’ ʒiɛyimtali, ka di leei alikauli sahakam.

⁹ Ka di ni ti nyɛla Aduna min’ o bidibisi la ni su shɛli, ka bɛ ni ti di li luɣ’ kasi shee la, dama di nyɛla o tarili din be kasi zaa, bɛ ni zaŋ binshɛŋa nyo buɣim mali sara ti Yawɛ puuni; ka di nyɛla o ni su shɛli sahakam.

¹⁰Izraɛl paɣ’ bia ŋun ba daa nyɛ Ijipti do’ so daa doli Izraɛlnim’ maa chana, ka Izraɛl paɣ’ bia maa mini Izraɛl doo daa ti zabi bɛ sansani maa ni.

¹¹Ka Izraɛl paɣ’ bia maa daa tu Naawuni, ka bɛ zaŋ o tahi Musa sani. O ma yuli n-daa booni Shɛlomit, o daa nyɛla Dibiri bipuɣiŋga, ka nyɛ Dan zuliya ni nira.

¹²Ka bɛ daa zaŋ o kpɛhi duu, ka guhiri ni Yawɛ ti yɛli ba o yubu ni nyɛ shɛm.

¹³Ka Naawuni daa yɛli Musa,

¹⁴“Zaŋm’ ninvuɣ’ so ŋun tu ma maa yihi sansani maa kpaŋa nti chɛ ka bɛn zaa wum o ni tu ma shɛm maa zaŋ bɛ nuhi pa o zuɣu ni, ka chɛ ka Izraɛlnim’ maa zaa lab’ o kuɣa.

¹⁵Ka a yɛli Izraɛlnima, ‘Ŋunkam tu Naawuni, dilan’ daalahichi ni ʒin’ o zuɣu.

¹⁶Ŋunkam ti mo Yawɛ, o yi nyɛla Izraɛl tiŋbia bee sana, bɛn kum o, Izraɛlnim’ maa zaa bɛn’ labim’ o kuɣa.’

¹⁷ “Ŋunkam ku ninsala, bɛn’ kum’ o.

¹⁸Ŋunkam ku biŋkɔbigu, ŋun’ bom’ biŋkɔb’ so yo o samli; nyɛvili la nyɛvili.

¹⁹“So yi ti o kpee dalinli, bɛn’ niŋm’ o gba o ni niŋ shɛm maa labisi.

²⁰ So yi kabi o kpee kɔbili, bɛn kabim’ o dini labisi, ka ŋun fɔɣ’ o kpee nini bɛn’ fɔɣimi o dini labisi, ka ŋun ŋme n-kabi o kpee nyini bɛn’ ŋmɛm’ kab’ o dini labisi. O ni ti o kpee maa dalinli shɛm, di simdi ka bɛ niŋ o gba lala.

²¹Ŋunkam ku biŋkɔbigu, ŋun bom’ so yo o zuɣu, ka ŋunkam ku ninsala, bɛn’ kum’ o.

²² Tiŋbihi mini saamba zaa zaligu yɛn nyɛla zaɣ’ yini; dama man’ Yawɛ n-nyɛ yi Naawuni.”

²³Ka Musa daa yɛli Izraɛlnim’ maa lala, ka bɛ daa zaŋ ninvuɣ’ so ŋun daa tu Naawuni maa yi bɛ sansani maa kpaŋa nti lab’ o kuɣa. Izraɛlnim’ maa daa tum Yawɛ ni zali Musa shɛm maa.