Read Dagbani Lɛvinima 25 Bible Online

Lɛvinima 25 - Dagbani bible

Lɛvinima 25

²“Yɛlim’ Izraɛlnima: Yi yi ti paai n ni zaŋ tiŋgbɔn shɛli tin ya la ni na, tiŋgbɔŋ maa yɛn malila di vuhim yuuni Yawɛ sani.

³Yi ni ti biri yi bimbira yuma ayɔbu, ka wahi yi wain tihi wula nyoya ni bahi, ka pɔhi di wala hal ni yuma ayɔbu.

⁴Amaa yuun’ shɛli din pahir’ ayopɔin ni nyɛla tiŋgbɔŋ maa vuhim yuuni, di nyɛla Yawɛ vuhim yuuni; di ti biriya yi puri bee n-wahi yi wain tihi wula nyoya ni bahi.

⁵Ka bindir’ shɛŋa din bili di toli yi puri ni, yin’ di ti kpuɣiya di daatam, ka yi ni bi wahi yi wain ti’ shɛŋa wula nyoya ni ka di wali wala, yin’ di pɔhiya li, di ni ti nyɛla tiŋgbɔŋ maa vuhim yuuni.

⁶Tiŋgbani maa vuhim yuuni maa ni ti niŋ bindira tin ya, yi mini yi daba bɛn nyɛ paɣiba mini dɔbba ni yi ni bu shɛb’ paa ni san’ kam ŋun be yi sani

⁷ ni yi niɣi mini biŋkɔb’ shɛb’ bɛn be tiŋgbɔŋ maa ni, binshɛɣukam din ti yɛn bili yi tiŋgbɔŋ maa ni na ni ti nyɛla bindirigu.”

⁸“Kalimiya yuma ayopɔin ʒiibuyopɔin. Di yuma maa ni ti nyɛla yuun’ pihinuyinika.

⁹Ka goli so ŋun pahir’ ayopɔin biɛɣu pia dali, yin’ chɛ ka bɛ piɛb’ kikahi pampam. Ka dabisi’ shɛli din nyɛ samli yɔbu dali maa, yin’ chɛliya ka bɛ piɛbi kikahi gili yi tiŋgbɔŋ maa ni zaa.

¹⁰Ka yi ti zaŋ yuun’ shɛli din pahiri pihinu la leei yuun’ kasi, ka moli yolisim nyabu molo ti bɛnkam be yi tiŋgbɔŋ maa ni zaa. Di ni ti nyɛla nɛma labisi ti yuuni yi sani, ka sokam ni ti labi ti su o ni di pun su shɛlikam, ka lab’ o malibu sani.

¹¹Yuun’ shɛli din pahiri pihinu maa ni ti nyɛla nɛma labisi ti yuuni yi sani. Di yuuni maa ni, di ti biriya bee n-kpuɣi bindir’ shɛŋa din bili di toli bee m-pɔhiya yi ni bi wahi yi wain ti shɛŋa wula nyoya ni wala.

¹²Dama di nyɛla nɛma labisi ti yuuni yi sani; di ni ti nyɛla yuuni din be kasi; yi ni ti dila binshɛŋa din bili mɔɣu ni di yuuni maa.

¹³“Yuun’ shɛli din nyɛ nɛma labisi ti yuuni maa puuni, sokam ni ti labi ti su o ni di pun su binshɛɣukam.

¹⁴Ka a yi kɔhi binshɛli ti a kpee bee a yi da binshɛli a kpee sani, yin’ di ŋariya taba.

¹⁵A ni da binshɛli a kpee sani ka di dolila chuɣu maa puhibu nyaaŋa yuma kalinli yaakaza tariga. Ka o mi kɔhi li ti a ka di dol’ a ni yɛn kpuɣi atam yuma shɛm tariga.

¹⁶Yuma maa yi galisi, nyin’ pahimi liɣiri, ka yuma maa yi bi galisi, nyin’ filimmi liɣiri maa, dama a ni yɛn kpuɣi atam shɛm ka o kɔhiri tir’ a maa.

¹⁷Miriya ka yi ŋariti taba, amaa zomiya yi Naawuni, dama man’ Yawɛ n-nyɛ yi Naawuni.”

¹⁸“Dinzuɣu gbibiya n ni zali ya zaligu shɛŋa, ka tummiya di tuma din ni chɛ ka yi ti be tiŋgbɔŋ maa ni ka barina shɛli kani.

¹⁹Tiŋgbɔŋ maa ni ti niŋ bindira ka yi di n-tiɣi, ka be ni ka barina shɛli kani.

²⁰“Ka yi yi bɔhi ‘Ti yi bi biri bee ti yi bi kpuɣi puri atam yuun’ shɛli din pahir’ ayopɔin maa ni, bɔ ka ti ti yɛn dira?’

²¹N ni niŋ n daalibarika niŋ tiŋgbɔŋ maa ni yuun’ shɛli din pahir’ ayɔbu maa ni din ni chɛ ka di niŋ yuma ata bindira.

²²Ka yi yi ti yɛn biri yuun’ shɛli din pahir’ anii ni, yi ni ti dirila bindir’ kura, ka yi ti kul ni dirila bindir’ kura maa hal ni yuun’ shɛli din pahir’ awɛi, ka bindir’ pala ti naanyi niŋ.”

²³Miriya ka yi zaŋ tiŋgbani kɔhi ti so ka o su li sahakam, dama tiŋgbani maa nyɛla n dini, yi nyɛla tinzunnim’ mini saamba n sani.

²⁴Ka yi ni su tiŋgbɔŋ maa luɣ’ shɛlikam zaa, zalimiya nir’ ni yɛn kɔh’ o tiŋgbani ka ti lan yo di zuɣu ka deei li saha shɛli.

²⁵Fara yi gbaag’ a mabia ka o kɔh’ o tiŋgban’ shɛli ti a, o daŋ ni ninvuɣ’ so ŋun pa o zuɣu n-ni kana ti yo o mabia maa ni kɔhi shɛli maa zuɣu ka deei li.

²⁶Ka so yi ka ninvuɣ’ so ŋun ni yo ka deei li, dindina omaŋmaŋ’ yi nya liɣiri ka ni tooi yo di zuɣu ka deei li,

²⁷yin’ chɛliya ka o mal’ o ni daa kɔhi li yuun’ shɛli maa zaŋ kana di saha maa laasabu, ka yo laɣ’ shɛli din pahi ti o ni daa kɔhi li ti so maa, ka bɛ labis’ o tiŋgbani ti o.

²⁸Amaa o yi ka yiko din ni tooi yo di zuɣu ka deei li, dindina o ni kɔhi shɛli maa kul ni kpalim be ŋun da li maa nuu ni hal ni nɛma labisi ti yuuni la ni. Di yuuni maa ni, di simdi ka bɛ deei li n-labisi ti o.

²⁹So yi kɔhi yili bɛ ni me goondaa gili tin’ shɛli ni, o ni tooi yo di zuɣu ka deei li yuun’ muni nyaaŋa, dama di yi paai yuun’ muni o mali soli ni o yo di zuɣu ka deei li.

³⁰Ka o yi bi yo di zuɣu ka deei li yuuni maa puuni, dindina yili din be bɛ ni me goondaa gili tin’ shɛli ni maa ni leela ŋun da li maa dini sahakam o ʒiɛman’ ni, ka di bi simdi ka bɛ ti deei li nɛma labisi ti yuuni la ni.

³¹Amaa yiya din be tiŋkpan’ shɛŋa bɛ ni bi me goma gili ni, din’ mini puri din be mɔɣu ni ni ti nyɛla yim, bɛ ni tooi yo di zuɣu ka deei li, ka ni ti tooi lan deei li nɛma labisi ti yuuni maa ni.

³²Di zaa yoli Lɛvinim’ bɛn tinsi dina, yiya shɛŋa din be bɛ ni su fɔntin’ shɛŋa ni, bɛn’ Lɛvinim’ maa ni tooi yo di zuɣu ka deei li saha shɛlikam.

³³Ka Lɛvi so yi bi yo di zuɣu kaman o ni mali soli ni o niŋ shɛm maa, dindina o ni kɔhi yili shɛli bɛ ni su fɔn’ tin’ shɛli ni maa, bɛn’ ti deemi yili maa ti o nɛma labisi ti yuuni la ni, dama yiya shɛŋa din be Lɛvinim’ fɔntinsi ni nyɛla bɛ ni su shɛli Izraɛlnim’ sani.

³⁴Amaa pu’ shɛŋa din be bɛ fɔntinsi maa tiŋgban’ ni, di bi simdi ka bɛ kɔhi dina, dama di nyɛla bɛ ni su shɛli saha shɛlikam.

³⁵ Ka fara yi gbaag’ a mabia ka o ku lan tooi gbib’ omaŋa, nyin’ gbib’ o ka chɛ ka o be a sani kaman sana bee tinzun nir’ la.

³⁶Miri ka a chɛ ka o niŋ a nyɔri bee m-pah’ a binshɛli, amaa zom’ a Naawuni, ka chɛ ka a mabia maa kul be a sani.

³⁷ Miri ka a zaŋ a liɣiri paŋ o ka bɔri ni a niŋ nyɔri bee n-kɔhi bindirigu ti o ka niŋ nyɔri.

³⁸Man’ Yawɛ n-nyɛ yi Naawuni ŋun daa yihi ya Ijipti tiŋgbɔŋ ni na ni n ti zaŋ Keenan tiŋgbɔŋ ŋɔ tin ya; ka nyɛ yi Naawuni.

³⁹Ka fara yi gbaag’ a mabia ŋun ʒi m-baɣ’ a, ka o zaŋ omaŋ’ pa talima a sani, nyin’ di chɛ ka o tumdi tuma kaman dabili la,

⁴⁰o ni bela a sani kaman padira bee tumtumda n-tumd’ a tuma hal ni nɛma labisi ti yuuni la ni.

⁴¹Di saha o min’ o bihi ni yi a sani n-lab’ o dɔɣiriba sani ti ʒin’ o yaannim’ tiŋgban’ ni.

⁴²Dama bɛ nyɛla n tumtumdiba, n ni daa yihi shɛb’ Ijipti tiŋgbɔŋ ni na; di bi simdi ka yi kɔhi ba kaman daba la.

⁴³Amaa zom’ a Naawuni, ka di zaŋ ninkuunsi gbib’ o.

⁴⁴Di yi nyɛla yi bɔrila dabidɔbba mini dabipaɣiba, yi ni tooi da dabidɔbba mini dabipaɣiba zuliya shɛb’ bɛn gili ya sani.

⁴⁵Yi ni tooi lan da saan’ shɛb’ mini tinzunnim’ bɛn be yi sani mini bɛ malibu ni dɔɣi bi’ shɛb’ yi tiŋgbɔŋ maa ni bɛ sani, ka bɛ leei yi sulinsi.

⁴⁶ Yi ni tooi zaŋ ba ti yi bidibisi, ka bɛ di ba fali yi kalinsi nyaaŋa, ka bɛ leei bɛ ni su shɛba sahakam. Yi ni tooi zaŋ bɛna n-leei yi daba, amaa yi mabihi bɛn nyɛ Izraɛlnim’ bɛna, di zaŋya ninkuunsi su taba.

⁴⁷Sana bee tinzun nir’ yi be yi sani ka ti leei bundana, ka yi mabia mi leei faralana, ka zaŋ omaŋa pa talima san’ maa bee tinzun’ nir’ maa bee san’ maa yiŋ’ ninvuɣ’ so sani,

⁴⁸dindina bɛ ni tooi yo o zuɣu ka deeg’ o o ni zaŋ omaŋ’ pa talima maa nyaaŋa, o mabihi ni yino ni tooi yo o zuɣu ka deeg’ o

⁴⁹bee o bapir’ bee o bapir’ bia ni tooi yo o zuɣu ka deeg’ o bee o daŋ ni ninvuɣ’ so ŋun nyɛ o talahi nir’ ni tooi yo o zuɣu ka deeg’ o bee o yi ti nya buni o ni tooi yo ka deeg’ omaŋa.

⁵⁰O min’ o ni daa zaŋ omaŋ’ pa talima ninvuɣ’ so sani maa ni mali laasabu o ni daa zaŋ omaŋ’ pa talima yuun’ shɛl’ ni maa hal ti paai nɛma labisi ti yuuni la, ka o ni yɛn yo laɣ’ shɛli ka deeg’ omaŋ’ ni dolila di yuma. O ni daa be o talima lan’ maa yiŋ’ saha shɛli maa, di simdi ka bɛ mali di liɣiri laasabu kaman padir’ yɔri ni nyɛ shɛm.

⁵¹Ka yuma din kpalim maa yi na galisi, ŋun’ yom’ o ni daa deei laɣ’ shɛli yuma maa zuɣu, ka di nyɛ o ni yo laɣ’ shɛli ni o deeg’ omaŋa.

⁵²Amaa yuma maa yi kpalim biɛla ni nɛma labisi ti yuuni maa, dindina ŋun’ chɛ ka o mini dilan’ mali yuun’ shɛŋa din kpalim ni o tum tuma maa laasabu, ka o labisi di liɣiri ti o ka deeg’ omaŋa.

⁵³Ka di simdi ni o be o sani yuuni kam kaman padir’ la. Di bi simdi ka o zaŋ ninkuunsi gbib’ o yi ninni.

⁵⁴Ka o yi bi tooi deeg’ omaŋ’ soya ŋɔ zaa puuni, dindina bɛn’ bahim’ o min’ o bihi nɛma labisi ti yuuni maa ni.

⁵⁵Dama n tumtumdiba n-nyɛ Izraɛlnima. Bɛ nyɛla n tumtumdi’ shɛba n ni daa yihi Ijipti tiŋgbɔŋ ni na. Man’ Yawɛ n-nyɛ yi Naawuni.