Read Dagbani Lɛvinima 27 Bible Online

Lɛvinima 27 - Dagbani bible

Lɛvinima 27

¹Yawɛ daa yɛli Musa,

²“Yɛlim’ Izraɛlnima, so yi po pɔri n-zaŋ daadam ti Yawɛ kaman yi ni zal o da’ shɛli,

³di saha doo ŋun paai yuun’ pisi zaŋ hal ni yuun’ pihiyɔbu, o daa yɛn nyɛla anzinfa laɣibaligu bini pihinu kaman jɛmbu duu liɣiri zahimbu ni nyɛ shɛm.

⁴Ka di yi nyɛla paɣa, o daa yɛn nyɛla anzinfa laɣibaligu bini pihita.

⁵Ka dilan’ yi nyɛla ŋun paai yuma anu zaŋ hal ni yuun’ pisi, doo daa yɛn nyɛla bini pisi, ka paɣ’ mi nyɛ bini pia.

⁶Ka dilan’ yi nyɛla ŋun paai goli zaŋ hal ni yuma anu, di yi nyɛla doo, o daa yɛn nyɛla anzinfa laɣibaligu bini diba anu, ka di yi nyɛla paɣa, o daa yɛn nyɛla anzinfa laɣibaligu bini diba ata.

⁷Ka dilan’ yi nyɛla doo ŋun paai yuun’ pihinu zaŋ chana, o daa yɛn nyɛla anzinfa laɣibaligu bini pinaanu, ka paɣ’ mi nyɛ bini pia.

⁸Ka do’ so yi nyɛla faralana ka ku tooi yo yi ni zali da’ shɛli maa, dindina yin’ zaŋmi dilan’ chaŋ maligumaana sani, ka o ti zal’ o daa, maligumaana ni zal’ o daa maa ka di dolila ŋun po pɔri maa dahima ni nyɛ shɛm.

⁹“Ka di yi nyɛla biŋkɔb’ so bɛ ni zaŋdi maani sara tiri Yawɛ, ninsal’ yi zaŋ biŋkɔbigu ti Yawɛ, o nyɛla ŋun be kasi.

¹⁰O ku lan tooi zaŋ binshɛli zal’ o zaani bee n-zaŋ binshɛli taɣ’ o n-zaŋ zaɣ’ suŋ taɣi zaɣ’ biɛɣu bee n-zaŋ zaɣ’ biɛɣu taɣi zaɣ’ suŋ. Ka o yi zaŋla biŋkɔbigu ni o taɣi biŋkɔbigu, dindina o ni zaŋ so na ni o ti taɣ’ o maa min’ o zaa ni leei bɛn be kasi.

¹¹Ka di yi nyɛla biŋkɔb’ so ŋun bi be kasi, ka nyɛ bɛ ni ku zaŋ biŋkɔb’ so mali sara ti Yawɛ, dindina doo maa ŋun’ zaŋm’ biŋkɔbigu maa chaŋ maligumaana sani,

¹²ka maligumaana maa ti zal’ o daa ka di dol’ o ni viɛl’ shɛm bee o ni bi viɛl’ shɛm. Kaman ŋun’ maligumaana ni zal’ o daa shɛm, lala n-yɛn nyɛ li.

¹³Amaa dilan’ yi bɔr’ ni o yo o zuɣu ka deeg’ o, ŋun’ yom’ daa maa pirigibu ʒiibunu yim zuɣu pahi bɛ ni zali da’ shɛli maa zuɣu.

¹⁴“So yi zaŋ o yili ti Yawɛ ka di leei zaɣ’ kasi, maligumaana n-ni zali di daa ni nyɛ shɛm, maligumaana maa ni zali di daa ka di doli di ni viɛl’ shɛm bee di ni bi viɛl’ shɛm, ka maligumaana maa ni zali di daa shɛm, lala n-yɛn nyɛ li.

¹⁵Ka ŋun zaŋ li ti Yawɛ maa yi bɔr’ ni o yo di zuɣu ka dee’ li, o ni yo di daa maa pirigibu ʒiibunu yim zuɣu pahi di daa maa zuɣu, ka di leeg’ o dini.

¹⁶“So yi zaŋ o ni di tiŋgban’ shɛli fali yaɣ’ shɛli ti Yawɛ, dindina di daa yɛn dolila di ni yɛn tooi deei bimbira shɛm. Pal’ shɛli din ni biri siŋkaafa tah’ ayi daa ni nyɛla anzinfa laɣibaligu pihinu.

¹⁷Ka o yi zaŋ o puu ti Yawɛ yi nɛma labisi ti yuuni puuni yi ni zal’ li da’ shɛli, di daa n-kul yɛn bala.

¹⁸Amaa so yi zaŋ o puu ti Yawɛ yi chuɣu maa puhibu nyaaŋa, dindina maligumaana ni zali di liɣiri ni nyɛ shɛm, ka di doli yuun’ shɛŋa din na kpalim ni bɛ nɛma labisi ti yuuni maa, ka yi ni tooi yihi shɛli yi daa maa ni.

¹⁹Ka ŋun zaŋ li ti Yawɛ maa yi bɔr’ ni o yo di zuɣu ka dee’ li, dindina ŋun yom’ di daa maa pirigibu ʒiibunu yim zuɣu pahi ka di leeg’ o dini.

²⁰Amaa ka o yi bi bɔr’ ni o yo puu maa zuɣu ka dee’ li bee o yi pun zaŋla puu maa kɔhi so zuɣu, o ku lan tooi yo di zuɣu ka dee’ li yaha.

²¹Amaa bɛ yi ti deei puu maa chuɣu puhibu la saha, di ni nyɛla din be kasi Yawɛ sani, ka nyɛ bɛ ni zaŋ pu’ shɛli ti Yawɛ. Maligumaana n-ni ti su li.

²²“Ka so yi zaŋ o ni da pu’ shɛli ti Yawɛ, ka di pala o ni di tiŋgban’ shɛli fali yaɣ’ shɛli palo,

²³dindina maligumaana ni zali di daa ni yɛn nyɛ shɛm hal ti paai nɛma labisi ti yuuni maa ni, ka dilan’ ni yo di liɣiri dindali maa ka di leei din be kasi Yawɛ sani.

²⁴Nɛma labisi ti yuuni maa ni, di simdi ka yi labisi puu maa ti bɛ ni daa da li ninvuɣ’ so sani maa, ŋun daa su li, ka di nyɛla o di li la fali maa.

²⁵“Yi daa kam ni dolila jɛmbu duu sania. Gɛra bini pisi n-ni nyɛ anzinfa laɣibaligu zaɣ’ yini.

²⁶“Amaa biŋkɔbigu ni tuui dɔɣi bi’ so nyɛla Yawɛ ni su so, di bi simdi ka so ti lan zaŋ o ti Yawɛ. Di yi nyɛla nahu bee piɛɣu, o nyɛla Yawɛ dini.

²⁷Ka di yi nyɛla biŋkɔb’ so ŋun bi be kasi, dindina o ni tooi yo yi ni zal’ o da’ shɛli, ka yo o daa maa pirigibu ʒiibunu yim zuɣu pahi bee o yi bi yo ka deeg’ o, dindina yin’ kɔhimiy’ o yi ni zal’ o da’ shɛli.

²⁸ “Amaa so yi zaŋ o ni su shɛli ti Yawɛ zaa, di yi nyɛla daadam bee biŋkɔbigu bee o ni di tiŋgban’ shɛli fali, di bi simdi ni bɛ kɔhi li bee n-yo di zuɣu ka dee’ li, bɛ ni zaŋ binshɛlikam ti Yawɛ nyɛla din be kasi zaa.

²⁹Bɛ ni zaŋ so ti Yawɛ, ka o nyɛ bɛ ni yɛn ku so, so ku lan tooi yo o zuɣu ka deeg’ o, bɛ kul ni ku o mi.

³⁰“Tiŋgbani maa atam bupia kam puuni yim zuɣu, di yi nyɛla tiŋgban’ ni bindira bee tihi wala, di nyɛla Yawɛ dini, ka nyɛ din be kasi Yawɛ sani.

³¹So yi bɔr’ ni o yo pia kam puuni yim maa zuɣu ka dee’ li, o ni yo di daa pirigibu ʒiibunu yim zuɣu pahi.

³²Ka nahu kam mini piɛɣu kam ŋun pahiri pia ka nyɛ biŋkɔbigul’ ni guli so nyɛla ŋun be kasi Yawɛ sani.

³³ Ka so di ti bɔhi ni o nyɛla ŋun viɛl’ bee ŋun bi viɛla, ka so mi di ti zaŋ binshɛli taɣ’ o, ka so yi ti zaŋ binshɛli taɣ’ o, dindina o min’ o ni zaŋ binshɛli taɣ’ o maa zaa ni leei din be kasi, ka so ku lan tooi yo o zuɣu ka deeg’ o.”

³⁴Fukumsi zaligu shɛŋa Naawuni ni daa zaŋ ti Musa Sinai Zoli zuɣu ni o zaŋ ti Izraɛlnima m-bala.