Read Dagbani Lɛvinima 3 Bible Online

Lɛvinima 3 - Dagbani bible

Lɛvinima 3

¹Ka so yi yɛn gbaag’ omaŋmaŋ’ naɣikpahi ni naɣinyaŋ bee naɣilaa m-mali suhudoo sara maligu, di simdi ka o zaŋla naɣ’ so ŋun ka daŋa m-mali sara maa ti Yawɛ.

²Di simdi ka dilan’ zaŋ o nuhi pa nahu maa zuɣu ni ka kɔrig’ o Yawɛ chirigibu shee suɣili dunol’ ni, ka Aduna bidibisi bɛn nyɛ maligumaaniba la zaŋ o ʒim kpaai vie sara maligu bimbini.

³Ka di simdi ka o ti zaŋ suhudoo maligu biŋkɔbigu maa biŋkpam din pili namanama zuɣu la mini kpam din be namanama maa ni zaa

⁴ni yaannina ayi mini kpam din be di ni zaa ni binsabili yaɣ’ shɛli din viɛl’ pahi n-nyo buɣim kaman bɛ ni zaŋdi sara shɛli nyɔri buɣim tiri Yawɛ la.

⁵Ka Aduna bidibisi maa zaŋ li nyo buɣim sara maligu bimbini maa zuɣu m-pahi bɛ ni zaŋdi sara shɛli nyɔri buɣim, ka di pa dari zuɣu m-be sara maligu bimbini zuɣu la, ka di leei bɛ ni zaŋdi sara shɛli nyɔri buɣim ka di nyom viɛl’ Yawɛ sani la.

⁶Ka so yi zaŋla o biŋkɔbbaligu ni piɛɣu bee bua ni o mali suhudoo sara maligu ti Yawɛ, ka di nyɛla biŋkɔb’ lɔɣu bee zaɣ’ nyaŋ, di simdi ka o zaŋla ŋun ka daŋa m-mali sara maa.

⁷Ka so yi zaŋla piɛ’ polli ni o mali sara maa, dindina ŋun’ malimi li Yawɛ tooni,

⁸ka zaŋ o nuu pa o biŋkɔbigu maa zuɣu ni, ka kɔrig’ o Yawɛ chirigibu shee suɣili maa tooni, ka Aduna bidibisi maa zaŋ o ʒim maa kpaai vie sara maligu bimbini maa kaman bɛ ni zaŋdi sara shɛli nyɔri buɣim tiri Naawuni la.

⁹Di simdi ka o zaŋ suhudoo sara maligu maa biŋkpam, ka ŋmaai zugbini miri yaaŋ’ kɔbili n-zaŋ di mini di kpam maa zaa mali sara ni biŋkpam din pili namanama zuɣu la ni biŋkpam din be namanama maa ni zaa

¹⁰ni binyaannina ayi la mini di biŋkpam din be binshee ni, ka yihi binsabili yaɣ’ shɛli din viɛl’ pahi o ni yɛn yihi yaannin’ shɛŋa maa zuɣu n-zaŋ li mali sara.

¹¹Ka maligumaana ti zaŋ li nyo buɣim sara maligu bimbini zuɣu, ka di leei bɛ ni zaŋdi bindir’ shɛli nyɔri buɣim tiri Yawɛ.

¹²Ka o sara maligu maa yi nyɛla bua, ŋun malimi li Yawɛ tooni,

¹³ka zaŋ o nuu pa bua maa zuɣu ni, ka kɔrig’ o Yawɛ chirigibu shee suɣili maa tooni, ka Aduna bidibisi zaŋ o ʒim kpaai vie sara maligu bimbini maa luɣilikam.

¹⁴Di nyaaŋa ka o yihi biŋkpam din pili namanama zuɣu la mini biŋkpam din be namanama maa ni zaa

¹⁵ni binyaannina ayi la mini kpam din be binshee ni, ka yihi binsabili yaɣ’ shɛli din viɛl’ pahi binyaannin’ shɛŋa o ni yihi maa zuɣu, ka di leei o ni zaŋ sara shɛli nyo buɣim ti Yawɛ.

¹⁶Ka maligumaana ti zaŋ li nyo buɣim sara maligu bimbini maa zuɣu, ka di leei bɛ ni zaŋ bindir’ shɛli nyo buɣim mali sara din nyom viɛl’ ti Yawɛ. Biŋkpam zaa nyɛla Yawɛ dini.

¹⁷Di bi simdi ka yi ti ŋubi biŋkpam bee binʒim yi ni be luɣ’ shɛlikam zaa, dimbɔŋɔ nyɛla zaligu din ni be yi ʒiɛmani kam ni.