Read Dagbani Lɛvinima 5 Bible Online

Lɛvinima 5 - Dagbani bible

Lɛvinima 5

¹Ka bɛ yi boli so na ni o ti di o nini ni nya shɛli bee o ni mi shɛli yɛla shɛhira, amaa ka o zaɣisi ka bi yɛli shɛli, o tum alahichi, ka o taali maa ni ʒi’ o zuɣu.

²Ka so yi shihi binshɛli din bi be kasi, di yi nyɛla o shihila mɔɣu ni biŋkɔb’ so ŋun bi be kasi zaɣ’ kpiŋ bee yiŋ’ biŋkɔb’ so ŋun bi be kasi zaɣ’ kpiŋ bee binnɛma bɛn gbamdi tiŋgban’ ni bɛn bi be kasi ka bi baŋ, ka di zuɣu chɛ ka o kpe daɣiri ni, dilan’ mali taali.

³Bee o yi shihi daadam daɣiri, din’ dee yi kul nyɛ daɣ’ shɛlikam din chɛ ka ninsal’ bi be kasi ka bi baŋ li, o yi ti baŋ li o mali taali.

⁴Bee nir’ yi yaag’ o noli po yiriŋ ni o ni niŋ zaɣ’ biɛɣu bee zaɣ’ viɛlli, nir’ yi po pɔri kam yiriŋ ka bi baŋ, o yi ti baŋ, o mali taali di puuni.

⁵Ka so yi tum taali zaŋ chaŋ dimbɔŋɔnim’ shɛli polo, di simdi ni o zani yim zaŋ chaŋ o ni tum taal’ shɛli maa polo,

⁶ka bo o biŋkɔbbaligu ni piɛnyaŋ bee bunyaŋ na nti ti Yawɛ o ni tum alahichi shɛli maa zuɣu, ka di leeg’ o daalahichi maa sanyoo sara maligu, ka maligumaana zaŋ li yo o daalahichi maa samli.

⁷Amaa dilan’ yi ku tooi nyaŋ piɛɣu, dindina ŋun’ bom’ ŋmanʒiɛh’ ayi bee yiŋ ŋmambih’ ayi na ti ti Yawɛ o ni tum taal’ shɛli maa zuɣu. Ka yino ti nyɛ alahichi sanyoo sara maligu, ka ŋun’ la mi nyɛ bɛ ni yɛn zaŋ so nyo buɣim mali sara.

⁸O ti zaŋm’ ba na ti ti maligumaana, ka o ti daŋ alahichi sanyoo sara maa malibu. O ti ŋmɛlimi kabi ŋmani maa nyiŋgoli, amaa o di ti ŋmɛli ŋmaag’ o zuɣu,

⁹ka zaŋ alahichi sanyoo sara maligu ŋmani maa ʒim shɛli mihi sara maligu bimbini luɣili zuɣu, ka chɛ ka ʒi’ shɛli din kpalim yi m-bahi sara maligu bimbini maa gbini, di nyɛla alahichi sanyoo sara maligu.

¹⁰Di nyaaŋa ka o naanyi zaŋ ŋun pah’ ayi maa mi mali bɛ ni zaŋdi sara shɛli nyɔri buɣim la kaman zaligu ni wuhi shɛm, ka maligumaana zaŋ li yo o daalahichi maa samli ka o daalahichi maa kpihim.

¹¹Ka dilan’ yi ku tooi nyaŋ ŋmanʒiɛh’ ayi bee yiŋ’ ŋmambihi ayi maa, ŋun’ bom’ zim viɛlli kilɔgiram yini na ti mali sara o ni tum alahichi shɛli maa zuɣu. O di ti niŋ kpam bee firanki tulaale zim pa di zuɣu, dama di nyɛla alahichi sanyoo sara maligu.

¹²Ka o ti zaŋ li ka maligumaana sanna, ka maligumaana maa ti too’ li nukurigu pali n-yihi di chihili maa n-zaŋ li nyo buɣim sara maligu bimbini zuɣu m-pahi bɛ ni zaŋdi sara shɛli nyɔri buɣim tiri Yawɛ la zuɣu; di nyɛla alahichi sanyoo sara maligu.

¹³Lala ka maligumaana maa yɛn niŋ m-mali alahichi sanyoo sara o zuɣu zaŋ chaŋ o ni tum alahichi shɛŋa maa zaɣ’ yini kam polo, ka o nya alahichi chɛ m-paŋ. Ka din kpalim nyɛ maligumaaniba dini kaman chi bee kawana sara yɛla ni nyɛ shɛm.

¹⁴Ka Yawɛ daa yɛli Musa,

¹⁵“So yi bi pal’ o ni lo alikauli shɛŋa zaŋ chaŋ Yawɛ binyara din be kasi la polo, ka tum alahichi, ka di nyɛla o bi yurimi, ŋun bom’ o biŋkɔbbaligu ni piɛlaa ŋun ka dalinli na ti mali sara ti Yawɛ, ka a ti zaŋ jɛmbu duu sania la zahim o nya o liɣiri ni nyɛ shɛm. Di nyɛla taali sanyoo sara maligu.

¹⁶Ka di simdi ka o yo o ni tum shɛm maa zuɣu, ka yo pirigibu ʒiibunu zuɣu vaabu yim pahi di zuɣu n-zaŋ li ti maligumaana, ka maligumaana maa ni zaŋ piɛlaa maa mali taali sanyoo sara maligu n-yo o daalahichi maa samli, ka o daalahichi maa kpihim.

¹⁷“Ka so yi tum Yawɛ ni zali ni bɛ di tum binshɛŋa la ni shɛli n-tum alahichi, hal o yi kul bi mi gba, o mali taali, ka di taali maa ʒi o zuɣu.

¹⁸Ka di simdi ka o bo o biŋkɔbbaligu ni piɛlaa ŋun ka dalinli na, ka a ti zahim o baŋ o liɣiri ni nyɛ shɛm zaŋ chaŋ alahichi sanyoo polo, ka maligumaana ti zaŋ o yo o ni bi yuri ka tum taal’ shɛli maa zuɣu, ka o daalahichi maa kpihim.

¹⁹O nyɛla ŋun mali taali Yawɛ sani; ka di niŋ o daalahichi maa sanyoo sara maligu.”