Read Dagbani Lɛvinima 6 Bible Online

Lɛvinima 6 - Dagbani bible

Lɛvinima 6

¹Yawɛ daa yɛli Musa,

²“So yi bi pali alikauli ka tum alahichi zaŋ chaŋ Yawɛ sani, ka di nyɛla o kpee n-zaŋ binshɛli puh’ o zalibu bee n-yɛl’ o ni o gul’ li, ka o ti yɔhim’ o bee o fala o kpee bee di yi nyɛla o zumi

³bee so binshɛli yi bɔrigi ka o pihi li ka ŋma ʒiri zaŋ chaŋ di polo bee m-pɔri ʒiri pɔri zaŋ chaŋ niriba ni tumdi binshɛŋa zaa ka di nyɛ alahichi polo

⁴bee so yi tum alahichi ka baŋ ni o tum taali, di simdi ka o labis’ o ni zu shɛli bee o ni fa shɛli bee bɛ ni zaŋ binshɛli puh’ o zalibu maa bee o ni pihi binshɛli.

⁵O yi po pɔri yoli zaŋ chaŋ binshɛli polo; di simdi ka o niŋ di zaa, ka niŋ di pirigibu ʒiibunu zuɣu yim pahi ti ŋun su li, o yi ti baŋ ni o tum taali.

⁶Ka o ti bo o biŋkɔbbaligu ni piɛlaa ŋun ka dalinli na ti ti maligumaana din nyɛ o taali sanyoo Yawɛ sani, ka a zahim o daa ni nyɛ shɛm zaŋ chaŋ taali sanyoo polo.

⁷ Ka maligumaana maa ti zaŋ li yo o daalahichi maa samli Yawɛ sani, ka o ni niŋ binshɛŋa ka di zuɣu chɛ ka o kpe taali ni maa kpihim.”

⁸Ka Yawɛ daa yɛli Musa,

⁹Zalim’ Aduna min’ o bidibisi zaligu yɛli: Yi ni yɛn zaŋdi sara shɛli nyɔri buɣim zaligu m-bɔŋɔ. Yi ni zaŋ sara shɛli nyo buɣim simdi ni di be daaŋa ni sara maligu bimbini maa zuɣu yuŋ zaa hal ni biɛɣ’ asiba, ka yi chɛ ka sara maligu bimbini zuɣu buɣim la kul dira.

¹⁰Ka maligumaana ti zaŋ o binyɛr’ piɛlli ye, ka so jinjɛŋŋma’ piɛlli n-va buɣim mini di sara maligu maa ka chɛ tampiligim shɛli sara maligu bimbini maa zuɣu n-zaŋ li sɔŋ sara maligu bimbini maa luɣili zuɣu.

¹¹Di nyaaŋa ka o yeeg’ o binyɛra maa ka taɣi binyɛr’ shɛŋa ye n-zaŋ tampiligim maa yi bɛ biɛhigu maa shee kpaŋa nti sɔŋ luɣ’ shɛli din be kasi.

¹²Di simdi ka sara maligu bimbini maa zuɣu buɣim la kul dira; di bi simdi ni di kpi. Di simdi ka maligumaana niŋdi dari pahiri buɣim maa ni asiba kam, ka maani bɛ ni zaŋdi sara shɛli nyɔri buɣim la sariasaria pari di zuɣu, ka zaŋ di suhudoo sara maligu la biŋkpam pari di zuɣu nyɔri buɣim.

¹³Di simdi ka yi chɛ ka buɣim kul be sara maligu bimbini maa zuɣu dira sahakam, di bi simdi ni di kpi.

¹⁴Kawana bee chi sara maligu zaligu m-bɔŋɔ: Aduna bidibisi maa ni ti zaŋ li mali sara Yawɛ sani sara maligu bimbini maa tooni.

¹⁵Ka bɛ ni yino ti tooi biŋkuma sara maligu maa zim viɛlli nukurigu pali mini di kpam ni di firanki tulaale zim din be biŋkuma sara maligu maa ni nti nyo buɣim sara maligu bimbini zuɣu n-yihi di chihili maa, ka di leei din nyom viɛl’ Yawɛ sani.

¹⁶Ka Aduna min’ o bidibisi maa di din kpalim maa; bɛ ti dim’ li luɣ’ kasi shee, ka di niŋ dabindi niŋ di ni, Yawɛ chirigibu shee suɣili la dundɔŋ ni ka bɛ ni ti ŋub’ li.

¹⁷Bɛ ti zaŋm’ li mali bɔrɔbɔro din ka dabindi. Mani n-zaŋ li ti ba ka di nyɛ bɛ tarili bɛ ni zaŋ shɛli nyo buɣim mali sara ti ma maa ni, di nyɛla binshɛli din be kasi zaa kaman alahichi sanyoo bee taali sanyoo sara la.

¹⁸Ka Aduna zuliya ni bidibiga kam ni tooi di li kaman di ni zali shɛm yi ʒiɛmani kam ni, ka binshɛɣukam din shihi li ni niŋ kasi Yawɛ sani.

¹⁹Ka Yawɛ daa yɛli Musa,

²⁰“Aduna min’ o bidibisi ni ti yɛn mali sara maligu shɛli ti Yawɛ dahin’ shɛli bɛ yi ti zaŋ bɛ ni so leei maligumaana m-bɔŋɔ: Zim viɛlli kilɔgiram yini kaman bɛ ni kul maani biŋkuma sara maligu shɛm la, ka o ti zaŋ di pirigili mali asiba, ka zaŋ pirigili mali zaawuni.

²¹Ka o ti zaŋ kpam chim li mahilaa ni zaɣ’ bihi, ka a gar’ li viɛnyɛliŋga n-zaŋ li mali sara shɛli din nyom viɛl’ Yawɛ sani.

²²Ka Aduna bidibisi maa ni ŋun leei maligumaana ni o zan’ o zaani la ni mali sara maa ti Yawɛ kaman zaligu din nyɛ din ka bahigu, ka bɛ ti zaŋ di zaa nyo buɣim.

²³Maligumaana yi zaŋ kawana bee chi na ti mali sara, di simdi ni bɛ zaŋ di zaa nyo buɣim, di bi simdi ni bɛ di li.”

²⁴Ka Yawɛ daa yɛli Musa,

²⁵“Yɛlim’ Aduna min’ o bidibisi la, alahichi sanyoo sara maligu zaligu m-bɔŋɔ: Bɛ ni kɔriti biŋkɔb’ shɛba bɛ ni zaŋdi nyɔri buɣim maani sara Yawɛ tooni luɣ’ shɛl’ la, nimaani ka bɛ yɛn kɔriti alahichi sanyoo sara maligu biŋkɔbiri. Di nyɛla din be kasi zaa.

²⁶Ka maligumaana so ŋun ti zaŋ li mali alahichi sanyoo sara maligu maa ni ti ŋub’ li. O ti ŋubim’ li luɣ’ kasi shee Yawɛ chirigibu shee suɣili maa dundɔŋ ni.

²⁷Binshɛɣukam yi shihi di nimdi maa di gba ni leei din be kasi. Ka di ʒim yi tɔɣ’ vie binyɛrigu, di simdi ka yi paɣi di ni tɔɣ’ vie binyɛr’ shɛli maa luɣ’ kasi shee.

²⁸Ka yi ni duɣ’ li yaɣiri duɣ’ shɛl’ ni maa, di simdi ka yi ŋma li. Ka di yi nyɛ kurigu duɣu, di simdi ka yi nan’ li, ka niŋ kom suui li.

²⁹Ka maligumaaniba bidibiga kam ni tooi ŋub’ li, di nyɛla din be kasi zaa.

³⁰Amaa bɛ ni zaŋ alahichi sanyoo sara maligu biŋkɔb’ so ʒim kpe Yawɛ chirigibu shee suɣili puuni nti yo alahichi samli luɣ’ kasi shee, di bi simdi ka so ŋubi di nimdi maa. Di simdi ni yi nyo li la buɣim.”