Read Dagbani Lɛvinima 8 Bible Online

Lɛvinima 8 - Dagbani bible

Lɛvinima 8

¹Yawɛ daa yɛli Musa,

²“Zaŋmi Aduna min’ o bidibisi ni binyɛra la ni bɛ ni boori kpa’ shɛli bahiri niriba zuɣuri ni la ni alahichi sanyoo naɣilaa ni piɛlah’ ayi ni bɔrɔbɔro din ka dabindi piɛɣu,

³ka boli laɣiŋgu maa niriba zaa ka bɛ ka Naawuni chirigibu shee suɣili maa dunol’ ni na.”

⁴Ka Musa daa niŋ kaman Yawɛ ni zal’ o shɛm maa, ka laɣim niriba maa zaa Yawɛ chirigibu shee suɣili maa dunol’ maa ni.

⁵Ka Musa daa yɛli niriba maa, “Yawɛ ni zali ni ti niŋ shɛm m-bala.”

⁶Ka Musa daa zaŋ Aduna min’ o bidibisi maa na nti chɛ ka bɛ niŋ kom paɣi bɛ ni.

⁷Ka o daa zaŋ binyɛribil’ din yɛri gbinni yɛl’ o, ka zaŋ shɛlɔrigu lo o, ka zaŋ zabba yɛl’ o, ka zaŋ binyɛribil’ din yɛri pari zuɣusaa yɛl’ o, ka zaŋ balati lo o.

⁸O daa lan zaŋ nyolɔrigu lo o pahi, ka zaŋ Urim mini Tumim[1] niŋ di ni;

⁹ka daa lan zaŋ bantabiga vil’ o, ka zaŋ salima bimparilan’ din be kasi niŋ di tooni kaman Yawɛ ni daa zali ŋun’ Musa shɛm.

¹⁰Di nyaaŋa ka Musa daa zaŋ bɛ ni boori kpa’ shɛli bahiri niriba zuɣuri ni la m-booi li bahi Yawɛ biɛhigu shee suɣili la mini binshɛɣukam zaa din be di ni la zuɣu m-mali di zaa.

¹¹Ka zaŋ di shɛli mihi sara maligu bimbini zuɣu ʒiibuyopɔin, ka booi kpam maa bahi sara maligu bimbini maa mini di zuɣu lahi ni di kɔniŋdi bini ni di naba zaashee zuɣu m-mali di zaa kasi.

¹²Ka o daa booi kpam maa bahi Aduna zuɣu ni m-mal’ o ka o niŋ kasi.

¹³Ka Musa daa zaŋ Aduna bidibisi la na nti zaŋ zabbanim’ yɛli ba, ka zaŋ shɛlɔriti lo bɛ shɛhi ni, ka zaŋ zuɣupila pil’ ba kaman Yawɛ ni daa zali ŋun’ Musa shɛm.

¹⁴Di nyaaŋa ka o daa zaŋ alahichi sanyoo sara maligu naɣilaa na, ka Aduna min’ o bidibisi ti zaŋ bɛ nuhi pa alahichi sanyoo sara maligu naɣilaa maa zuɣu ni.

¹⁵Ka Musa daa kɔrig’ o n-taɣ’ o ʒim zaŋ o nubil’ suɣi li n-zaŋ li ti niŋ sara maligu bimbini zuɣu binyila la ni zaa gili m-mal’ li ka di niŋ kasi, ka kpaai ʒim maa bahi sara maligu bimbini maa naba zaashee m-mal’ li ka di niŋ kasi, ka leei bɛ ni ni tooi mali alahichi sanyoo sara luɣ’ shɛli.

¹⁶Ka Musa daa yihi biŋkpam din daa be namanama ni zaa mini binsabili yaɣ’ shɛli din viɛla ni yaannina mini di biŋkpam n-zaŋ li nyo buɣim sara maligu bimbini zuɣu.

¹⁷Amaa naɣilaa maa min’ o gbaŋ ni o nimdi ni o bindi dina, o daa zaŋ li yila bɛ biɛhigu maa shee kpaŋa nti nyo li buɣim kaman Yawɛ ni daa zali ŋun’ Musa shɛm.

¹⁸Di nyaaŋa ka o daa zaŋ piɛlaa na ni bɛ ti mali bɛ ni zaŋdi sara shɛli nyɔri buɣim la, ka Aduna min’ o bidibisi maa daa zaŋ bɛ nuhi pa piɛlaa maa zuɣu ni.

¹⁹Ka Musa daa kɔrig’ o n-zaŋ o ʒim maa kpaai vie sara maligu bimbini maa.

²⁰Ka bɛ daa ŋahi piɛlaa maa, ka Musa zaŋ binzuɣu mini nim’ ŋmahira maa ni biŋkpam nyo buɣim.

²¹Ka bɛ daa zaŋ kom paɣi namanama mini bimbiɛhi, ka Musa daa zaŋ piɛlaa maa zaa nyo buɣim, ka di leei bɛ ni zaŋdi sara shɛli nyɔri buɣim ka di nyom viɛla, ka nyɛ bɛ ni zaŋdi sara shɛli nyɔri buɣim tiri Yawɛ kaman Yawɛ ni daa zali Musa shɛm.

²²Di nyaaŋa ka o daa zaŋ piɛlaa ŋun pahi ayi ka nyɛ maligumaana leebu piɛlaa la na. Ka Aduna min’ o bidibisi maa ti zaŋ bɛ nuhi pa piɛlaa maa zuɣu ni.

²³Ka Musa daa kɔrig’ o n-zaŋ o ʒim maa shɛli niŋ Aduna nudirigu polo tibinyaɣili min’ o nudirigu nubililɔɣu ni o nudirigu napombililɔɣu.

²⁴Ka bɛ daa zaŋ Aduna bidibisi maa na ka Musa ti niŋ binʒim maa niŋ bɛ nudiriti tibinyaɣa ni mini bɛ nudiriti polo nubihilɔri ni bɛ nudiriti polo napombihilɔri. Ka Musa daa kpaai ʒim maa vie sara maligu bimbini maa.

²⁵Di nyaaŋa ka o daa zaŋ biŋkpam mini zugbini kpam ni biŋkpam din zaa be namanama ni ni binsabili yaɣ’ shɛli din viɛla ni yaannina ayi mini di biŋkpam ni nudirigu biŋgbalipuɣili,

²⁶ka pii mah’ shɛŋa din ka dabindi la zaɣ’ yini mini bɔrɔbɔro din mali kpam zaɣ’ yini ni karikaasi zaɣ’ yini piɛ’ shɛli din ʒe Yawɛ tooni la puuni n-zaŋ li pa biŋkpam la mini nudirigu biŋgbalipuɣili la zuɣu.

²⁷Ka o daa zaŋ dimbɔŋɔ zaa niŋ Aduna min’ o bidibisi maa nuhi ni, ka zaŋ li gahigahi, ka di leei gahibu sara maligu Yawɛ sani.

²⁸Di nyaaŋa ka Musa daa yihi li bɛ nuhi ni n-zaŋ li pahi bɛ ni zaŋdi sara shɛli nyɔri buɣim la zuɣu n-nyo li buɣim sara maligu bimbini zuɣu, ka di leei Maligumaana leebu sara maligu din nyom viɛla, ka nyɛ sara shɛli bɛ ni zaŋ nyo buɣim ti Yawɛ.

²⁹Ka Musa daa zaŋ bimbihili gahigahi ka di leei gahibu sara maligu Yawɛ tooni. Dina n-daa nyɛ Musa tarili maligumaana leebu piɛlaa maa ni kaman Yawɛ ni daa zali ŋun’ Musa shɛm.

³⁰Di nyaaŋa ka Musa daa zaŋ bɛ ni boori kpa’ shɛli bahiri niriba zuɣuri ni la mini binʒim din daa be sara maligu bimbini zuɣu la m-mihi Aduna ni o binyɛra, ka lan zaŋ li mih’ o bidibisi la ni bɛ binyɛra. Lala ka o daa niŋ m-mali Aduna min’ o binyɛra ni o bidibisi maa mini bɛ binyɛra kasi.

³¹Ka Musa daa yɛli Aduna min’ o bidibisi maa, “Duɣimiya nimdi maa Yawɛ chirigibu shee suɣili maa dunol’ ni ŋ-ŋubi di mini bɔrɔbɔro din nyɛ maligumaana leebu pina, ka be piɛɣu puuni la kaman n ni daa zali zaligu yɛli, ‘Aduna min’ o bidibisi n-nyɛ bɛn ni ti ŋub’ li la.’

³²Ka nimdi maa mini bɔrɔbɔro maa shɛli yi guui, yin’ zaŋmiya li nyo buɣim.

³³Ka di bi simdi ni yi yi Yawɛ chirigibu shee suɣili maa dunol’ maa ni hal ni daba ayopɔin, dama daba ayopɔin ka ti yɛn zaŋ leei ya maligumaaniba.

³⁴Yawɛ n-zali ni ti niŋ ti ni niŋ shɛm zuŋɔ dabisili ŋɔ ni di chɛ ka ti yo yi daalahichi samli.

³⁵Yi kul ni kpalim bela Yawɛ chirigibu shee suɣili dunol’ maa ni wuntaŋ’ ni mini yuŋ tumdi Yawɛ ni zali ya shɛm hal ni daba ayopɔin, di yi pa lala yi ni kpi, dama Yawɛ n-zali ma lala.”

³⁶Ka Aduna min’ o bidibisi maa daa niŋ Yawɛ ni daa chɛ ka Musa zali ba ni bɛ niŋ shɛlikam zaa maa.