Read Dagbani Lɛvinima 9 Bible Online

Lɛvinima 9 - Dagbani bible

Lɛvinima 9

¹Daba anii dali ka Musa daa boli Aduna min’ o bidibisi maa ni Izraɛl kpamba na

²nti yɛli Aduna, “Zaŋm’ naɣila’ polli mali alahichi sanyoo sara, ka zaŋ piɛlaa mali bɛ ni zaŋdi sara shɛli nyɔri buɣim la. Di simdi ni bɛ zaa nyɛla bɛn ka dalima, ka a zaŋ ba mali sara ti Yawɛ.”

³Ka yɛli Izraɛlnima, “Zaŋmiya bulaa mali alahichi sanyoo sara, ka zaŋ naɣibil’ ŋun paai yuuni mini piɛbil’ ŋun paai yuuni m-mali bɛ ni zaŋdi sara shɛli nyɔri buɣim la;

⁴ka zaŋ naɣilaa mini piɛlaa ni zim shɛli bɛ ni niŋ kpam ŋmiri m-mali suhudoo sara Yawɛ tooni, dama zuŋɔ Yawɛ ni yi zahira yi sani.”

⁵Ka bɛ daa zaŋ Musa ni zali ni bɛ zaŋ binshɛŋa maa zaa na nti sɔŋ Yawɛ chirigibu shee suɣili maa tooni, ka niriba maa zaa daa vu m-miri ti zani Yawɛ tooni.

⁶Ka Musa daa yɛli, “Dimbɔŋɔ ka Yawɛ zali ya ni yi niŋ, ka ŋun’ Yawɛ jilima yi zahira yi sani.”

⁷ Dimbɔŋɔ nyaaŋa ka Musa daa yɛli Aduna, “Mirimi sara maligu bimbini gbinna nti mal’ a daalahichi sanyoo sara min’ a ni yɛn zaŋ sara shɛli nyo buɣim yo amaŋmaŋ’ daalahichi mini niriba maa daalahichi samli, ka zaŋ niriba maa sara na nti yo bɛ daalahichi samli kaman Naawuni ni zali shɛm.”

⁸Ka Aduna daa miri sara maligu bimbini maa nti kɔrigi omaŋmaŋ’ daalahichi sanyoo naɣila’ polli maa,

⁹ka o bidibisi daa taɣi binʒim ti o, ka o zaŋ o nubil’ tim ʒim maa ni n-zaŋ li ʒe sara maligu bimbini zuɣu binyila la, ka kpaai binʒim maa bahi sara maligu bimbini maa naba zaashee.

¹⁰Amaa alahichi sanyoo sara maligu maa biŋkɔbigu kpam min’ o binyaannina ni binsabili yaɣ’ shɛli din viɛla, o daa zaŋ li nyola buɣim sara maligu bimbini maa zuɣu kaman Naawuni ni daa zali Musa shɛm.

¹¹Nimdi mini gbaŋ dina, o daa zaŋ li yila bɛ biɛhigu maa shee kpaŋa ti nyo li buɣim.

¹²Ka o daa kɔrigi bɛ ni zaŋdi sara shɛli nyɔri buɣim la biŋkɔbigu, ka Aduna bidibisi daa taɣi binʒim n-zaŋ ti o, ka o kpaai li vie sara maligu bimbini maa luɣilikam.

¹³Ka bɛ daa zaŋ bɛ ni zaŋdi sara shɛli nyɔri buɣim maa nim’ kpillikpilli mini zuɣu ti o, ka o nyo di zaa buɣim sara maligu bimbini maa zuɣu.

¹⁴Ka o daa paɣi bimbiɛhi mini namanama n-zaŋ li pahi bɛ ni zaŋdi sara shɛli nyɔri buɣim maa zuɣu n-nyo li buɣim sara maligu bimbini maa zuɣu.

¹⁵Di nyaaŋa ka o daa zaŋ niriba maa sara maligu maa na nti yihi niriba alahichi sanyoo sara shɛli din daa nyɛ bua la n-kɔrig’ o zaŋ mali alahichi sanyoo sara kaman tuuli alahichi sanyoo sara maligu la.

¹⁶Ka o daa zaŋ bɛ ni zaŋdi sara shɛli nyɔri buɣim la na nti zaŋ li mali kaman zaligu ni wuhi shɛm.

¹⁷Ka o daa zaŋ zim sara maligu nti tooi li pal’ o nuu n-zaŋ li nyo buɣim sara maligu bimbini maa zuɣu pahi bɛ ni zaŋdi sara shɛli nyɔri buɣim asiba la zuɣu.

¹⁸ Ka Aduna daa lan kɔri naɣilaa mini piɛlaa bɛn daa nyɛ niriba maa suhudoo sara maligu biŋkɔbiri la, ka o bidibisi maa daa taɣi binʒim zaŋ ti o, ka o kpaai li vie sara maligu bimbini maa luɣilikam.

¹⁹Ka o daa zaŋ naɣilaa maa mini piɛlaa maa biŋkpam ni zugbini kpam ni kpam din pili namanama ni binyaannina ni binsabili yaɣ’ shɛli din viɛla.

²⁰Ka bɛ daa zaŋ biŋkpam maa pa bimbiha zuɣu, ka o daa zaŋ biŋkpam maa nyo buɣim sara maligu bimbini maa zuɣu.

²¹Amaa biha maa mini nudirigu gbalipuɣa dina Aduna daa zaŋ li mi gahigahi Yawɛ tooni ka di leei sara shɛli bɛ ni zaŋ gahi kaman Musa ni daa zali shɛm.

²² Dimbɔŋɔ nyaaŋa ka Aduna daa duh’ o bɔɣiri zuɣusaa kpa niriba maa polo n-suhi alibarika niŋ bɛ ni, ka daa yi alahichi sanyoo sara maligu mini bɛ ni zaŋdi sara shɛli nyɔri buɣim la ni suhudoo sara malibu shee maa siɣina.

²³Ka Musa mini Aduna daa chaŋ ti kpe Yawɛ chirigibu shee suɣili maa puuni. Bɛ ni daa ti yi suɣili maa ni na, bɛ daa suhila alibarika niŋ niriba maa ni; ka Yawɛ jilima daa yi zahira niriba maa zaa sani.

²⁴Ka buɣim daa dii yi Yawɛ sanna ti di bɛ ni zaŋdi sara shɛli nyɔri buɣim la mini biŋkpam la zaa sara maligu bimbini maa zuɣu; niriba maa zaa ni daa nya li, ka bɛ tahi ka lu n-zaŋ bɛ nina kpa tiŋa.