Read Dagbani Jɛrimia 13 Bible Online

Jɛrimia 13 - Dagbani bible

Jɛrimia 13

¹Yawɛ ni daa yɛli ma shɛm m-bɔŋɔ: “Cham’ ti da jinjɛŋŋma’ piɛlli n-zaŋ so, amaa di zaŋ li tim kom ni.”

²Dinzuɣu ka n daa da jinjɛŋŋmaa maa kaman Yawɛ ni daa yɛli ma shɛm maa n-zaŋ li so.

³Ka Yawɛ daa lan tɔɣisi ma yɛtɔɣa pahi buyi yɛli,

⁴“Zaŋm’ a ni daa da jinjɛŋŋma’ shɛli sɔri maa chaŋ Yufretiiz Mɔɣili ni pumpɔŋɔ nti zaŋ li pi tampiŋ lɔŋni.”

⁵Dinzuɣu ka n daa zaŋ li chaŋ Yufretiiz Mɔɣili maa ni ti pi kaman Yawɛ ni daa yɛli ma shɛm maa.

⁶Ka di daa ti niŋ daba ayi ka Yawɛ lan yɛli ma, “Cham’ Yufretiiz Mɔɣili ni pumpɔŋɔ nti yihi n ni daa yɛl’ a ni a zaŋ jinjɛŋŋma’ shɛli ti sɔɣi nimaani la na.”

⁷Di saha ka n daa chaŋ Yufretiiz Mɔɣili ni nti kurigi n ni daa zaŋ jinjɛŋŋmaa maa pi luɣ’ shɛli maa n-yihi li na. Amaa ka jinjɛŋŋmaa maa daa saɣim ka lan ka buchi.

⁸Di saha ka Yawɛ daa yɛli ma,

⁹“Lala ka n yɛn saɣim Judanim’ ni mali shɛli nyuri bara la mini Jɛrusalɛmnim’ ni mali shɛli nyuri bara pam la.

¹⁰Ninvuɣ’ biɛri bɛn zaɣisi ni bɛ ku wum n yɛligu, ka niŋ tipawumli n-doli bɛ suhuyubu soli ka jɛmdi wun’ shɛŋa la ni ti bemi kaman jinjɛŋŋmaa din lan ka buchi ŋɔ ni be shɛm ŋɔ.

¹¹Kaman nira ni so jinjɛŋŋmaa ka di tab’ o niŋgbuŋ shɛm la, lala ka n daa chɛ ka Izraɛlnim’ zaa mini Judanim’ tabi ma din ni chɛ ka bɛ nyɛ n niriba, ka n yuli du, ka n nya paɣibu mini jilima, amaa ka bɛ zaɣisi wumbu.” Man’ Yawɛ n-yɛli lala maa.

¹²Yɛlim’ ba ni Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: “Niŋmiya wain pali wain duɣu kam.” Bɛ ni bɔh’ a, “A tɛhiya ni ti bi mi ni di simdi ni ti niŋ wain pali wain duɣu kam?”

¹³Di saha ka a yɛli ba, “Yawɛ ni yɛli shɛm m-bɔŋɔ: ‘N yɛn chɛmi ka tiŋgbɔŋ ŋɔ nim’ zaa mini na’ shɛb’ bɛn ʒi Dauda ʒiishee la ni maligumaaniba ni anabinima ni Jɛrusalɛmnim’ zaa nyu dam kuli.

¹⁴N ni ti daai bɛ ninkura mini bihi zaa to taba. N yi ti yɛn ku ba, n ku chɛ so bee n-zo so nambɔɣu.’ ” Man’ Yawɛ n-yɛli lala maa.

¹⁵Yawɛ yɛliya: Gbilisimiya tibili wum, chɛliya karimbaani.

¹⁶Timiya Yawɛ ŋun nyɛ yi Naawuni ŋɔ jilima din ni chɛ ka o ku tahi zibisim na, ka yi tuui zoya zuɣu wuntaŋ’ ni; yi yi ti bɔri neesim saha shɛli, o chɛrimi ka di niŋ zibisim titali, ka chɛ ka di niŋ bumbɔni.

¹⁷Amaa yi yi zaɣisi wumbu, n ni kum ashilɔni yi karimbaani maa zuɣu. N ni kum pam hal ka nintam ti zɔri n nina ni, bɛ ni gbahi Yawɛ niriba leei daba maa zuɣu.

¹⁸Yɛlim’ naa min’ o ma, “Ʒinimiya tariŋ ʒiishee, dama yi nam zuɣupila din viɛl’ la yi yi zuɣu ni lu tiŋa.

¹⁹Bɛ kpari Nɛgɛbinim’ niŋ bɛ fɔntinsi ni, ka so kani ŋun ni kparigi ba. Bɛ gbahi Judanim’ zaa chaŋ.”

²⁰Kpuɣimiya yi zuɣuri lihi nya ninvuɣ’ shɛb’ bɛn yi nuzaa polo ŋɔ na. Bɛ ni daa zaŋ ninvuɣ’ shɛb’ tin ya ka yi nyuri bara bɛ zuɣu la lee be ya?

²¹Ka yi ni daa wuhi ninvuɣ’ shɛb’ ni bɛ ti leei yi zɔnim’ la yi ti leei yi zuɣulaannima, wula ka yi lee yɛn yɛli? Di biɛrim maa ku ŋmanila paɣ’ ni wolisiri ni o dɔɣi ka biɛrim shɛli mal’ o la?

²²Ka yi yi yɛli yi suhuri ni, “Bɔzuɣu ka yɛla ŋɔ paai ti?” Di nyɛla yi tuumbiɛri ni galisi zuɣu ka bɛ darigi fuɣi yi situra, ka bili ya.

²³Itiɔpianim’ ni tooi taɣi bɛ niŋgbuŋ gbaŋ biɛhigu bee jɛŋgbina ni tooi taɣi bɛ niŋgbuna bomaboma? Dinzuɣu yinim’ bɛn gba tum tuumbiɛri ka di mili ya ŋɔ, yi ku tooi lan tum tuun’ viɛla.

²⁴N ni zaŋ ya bahi kaman pɔhim din yi tiŋgban’ nɛli polo na ni ʒiɛri wurigu bahiri shɛm la.

²⁵“Din simdi ya m-bala. N ni lo ni n niŋ ya shɛm m-bala! Dama yi tam n yɛla, ka niŋla ʒiri naani.” Man’ Yawɛ n yɛli lala maa.

²⁶Mmaŋmaŋ’ ni pirigi yi situra n-dihi ya vi.

²⁷N nya yi ni tum din chihiri shɛŋa maa, yi ni niŋ zina shɛŋa mini yi ni kuhiri kaman wɔridibiga n-kuhiri bɔri wɔrinyaŋ la. Yi tum kavi pagɔrisigu mini dagɔrisigu tuma mɔɣu ni zoya zuɣu. Jɛrusalɛmnima, Mbusim be yi zuɣu! Bɔ saha ka yi yɛn yi daɣiri ni?