Read Dagbani Jɛrimia 14 Bible Online

Jɛrimia 14 - Dagbani bible

Jɛrimia 14

¹Yawɛ ni daa yɛli Jɛrimia shɛm zaŋ chaŋ sanzali polo m-bɔŋɔ:

²“Judanim’ kuhirimi, ka bɛ fɔntinsinim’ tarigi; bɛ dola tiŋgban’ ni ni suhugarigu, ka Jɛrusalɛmnim’ kuhigu chaŋ haliya.

³Di puuni ninvuɣ’ zuɣuri tim bɛ tumtumdiba ni bɛ ti ŋɔŋ kom na. Ka bɛ chaŋ kɔbilisi ni nti bi nya kom, ka ŋmaligi zaŋ bɛ kɔŋɔŋdi biŋkuma labi kuli. Vi gbahi ba ka di niŋ ba alahiziba, ka bɛ zaŋ bini pili bɛ zuɣuri,

⁴dama tiŋgbani kuumi tahi la, saa ni bi lan miri maa zuɣu, ka di niŋ pukpariba alahiziba, ka bɛ zaŋ bini pili bɛ zuɣuri.

⁵Hal saŋkpaliŋ zomi ka chɛ o biliɛɣu mɔɣu ni, dama mɔri lan kani.

⁶Yɔɣu ni bunsi tamla daboya zuɣu n-taɣiri ʒiɛɣu kaman yɔbahi la, ka bɛ nina niŋ liti, mɔri ni kani zuɣu.”

⁷Hal ti tuumbiɛri ni kul di shɛhira jɛndi ti maa zaa yoli, Yawɛ, sɔŋmi ti a yuli zuɣu. Ti zoya ka chɛ a siɣimsiɣim bushɛm, ka tum alahichi pam a sani.

⁸Nyini n-nyɛ Izraɛlnim’ tahima; nyini n-nyɛ ŋun tiligi ba bɛ muɣisigu saha. Wula ka a be kaman sana n-nyɛ a tiŋgbɔŋ ŋɔ ni bee kaman yuŋ ni sabigi sochanda so ka o yɛn zani gbe luɣ’ shɛli maa?

⁹Wula ka a be kaman ninvuɣ’ so ŋun bi lan mi o yɛla nini, bee kaman tɔbutuhiri’ biiŋa ŋun ku tooi sɔŋ so maa? Amaa nyini Yawɛ nyɛla ŋun be ti sani. Ti nyɛla a niriba, di zaŋ ti bahi.

¹⁰Yawɛ ni yɛli shɛm zaŋ chaŋ niriba maa polo m-bɔŋɔ: “Yɛlimaŋli, bɛ suhuri yula yɔɣu kpɛbu, ka bɛ ku tooi gbaai bɛmaŋa, dinzuɣu ka Yawɛ bi deei ba. Pumpɔŋɔ o ni teei bɛ tuumbiɛri maa yɛla, ka darigi bɛ tibili bɛ daalahichi zuɣu.”

¹¹Yawɛ daa yɛli ma, “Di suhi ma niriba ŋɔ zaɣ’ viɛlli zuɣu.

¹²Hal bɛ yi kul lo noli, n ku wum bɛ kuhigu. Hal bɛ yi mali bɛ ni zaŋdi sara shɛli nyɔri buɣim’ la mini chi sara, n ku deei li. Amaa n ni chɛ ka tɔbu mini kum ni alɔbo ku ba.”

¹³Di saha ka n daa yɛli, “Yawɛ ŋun nyɛ n Duuma ŋɔ, a mi ni anabinim’ kul be kpe n-yɛri ba, ‘Tɔbu ku lan ŋmɛn ya, ka kum mi ku lan lu yi zuɣu, amaa n kul yɛn tin ya la suhudoo ni yɛlimaŋli tiŋgbɔŋ ŋɔ ni.’ ”

¹⁴Ka Yawɛ daa garigi yɛli ma, “Anabinim’ maa malila n yuli ŋmari ʒiri. Man’ bi tim ba bee n-zali ba shɛli bee n-tɔɣisi bɛ ni so yɛtɔɣa. Bɛ tɔɣisiri ya la ʒii din nyɛ ʒiri yɛtɔɣa. Di nyɛla baɣibuɣibo din ka buchi, ka nyɛ bɛ maŋmaŋ’ suhu ni yɔhiŋgu yɛtɔɣa.”

¹⁵Dinzuɣu man’ Yawɛ ni yɛli shɛm zaŋ chaŋ anab’ shɛb’ bɛn mali n yuli tɔɣisiri anabitali yɛtɔɣa, ka di pala mani n-tim ba la polo m-bɔŋɔ. Bɛ yɛra, “Tɔbu mini kum ku lan lu yi zuɣu tiŋgbɔŋ ŋɔ ni.” Amaa tɔbu mini kum ni ku anabinim’ maa.

¹⁶Bɛ ni ti zaŋ bɛ ni tɔɣisiri ninvuɣ’ shɛb’ anabitali yɛtɔɣa ka tɔbu mini kum ku ba maa bahi Jɛrusalɛm pala zuɣu, so ti ku beni ŋun ni sɔɣi bɛ mini bɛ paɣiba ni bɛ bidibisi ni bɛ bipuɣinsi. Dama n ni ti zaŋ bɛ tuumbiɛri maa ʒili ba.

¹⁷A ni yɛn yɛli ba shɛm m-bɔŋɔ: Chɛ ka n kul kumdi ni nintam yuŋ ni wuntaŋ’ ni, ka di bi chɛra, dama bɛ ŋme n niriba bɛn be kaman m bipuɣiŋga ŋun ʒi doo maa kurili luhi, ka bɛ nya dan’ titali.

¹⁸N yi yi mɔɣ’ kpaŋa, n nyarila bɛ ni zaŋ takɔbiri ku shɛb’ sɔŋ. Ka n yi kpe tiŋ’ puuni, n nyarila kum ni gbarigi shɛb’ sɔŋ. Ka anabinim’ mini maligumaaniba kul tumdi bɛ tuma tiŋgbɔŋ maa zaa ni, ka bi mi ni binshɛli niŋda.

¹⁹A zaɣisila Judanim’ zaa? A suhu lan je Ziɔnnima? Wula ka a ŋme ti luhi ka so ku tooi lan tibi ti yaha? Ti yuuni bɔrila suhudoo, amaa ti bi nya zaɣ’ viɛlli, ka yuuni bɔri faako saha, amaa ka naɣ’ nyarila zaɣ’ biɛɣu.

²⁰Yawɛ, ti zani yim saɣi deei ti ninvuɣ’ biɛtali din nyɛ ti yaannim’ ni daa tum tuumbiɛ’ shɛŋa’ la, dama ti tum alahichi a sani.

²¹A yuli zuɣu, di tabigi ti bahi. Miri ka a filim a nam ʒiishee din mali jilima ŋɔ. Teema, ka miri ka a saɣim a ni daa lo ti alikauli shɛl’ la.

²²Zuliya shɛli buɣa ni tooi chɛ ka saa mi? Bee zuɣusaa ni tooi chɛ ka sayuɣiyuɣi mi? Pa nyin’ Yawɛ ŋun nyɛ ti Naawuni ŋɔ n-niŋdi li? Ti mali tahima a sani, dama nyini n-nyɛ ŋun niŋdi dimbɔŋɔnim’ zaa.