Read Dagbani Jɛrimia 15 Bible Online

Jɛrimia 15 - Dagbani bible

Jɛrimia 15

¹ Di saha ka Yawɛ daa yɛli ma, “Hal Musa mini Samuɛl yi di ʒe n tooni, n naan ku ŋmaligi n suhu kpa niriba ŋɔ polo. Zaŋmi ba miligi n sani n-chɛ ka bɛ chaŋ.

² Ka bɛ yi bɔh’ a, ‘Ya ka ti yɛn chaŋ?’ Nyin’ yɛlim’ ba, Yawɛ ni yɛli shɛm m-bɔŋɔ: ‘Alɔbo ni yɛn di shɛba, bɛ cham’ ka alɔbo ti di ba. Ka tɔbu ni yɛn di shɛba, bɛ cham’ ka tɔbu ti di ba. Ka kum ni yɛn ku shɛba, bɛ cham’ ka kum ti ku ba. Ka bɛn mi nyɛ bɛ ni yɛn gbahi shɛb’ daba, bɛ cham’ ka bɛ ti gbahi ba daba.’ ”

³Yawɛ yɛliya, “N ni chɛ ka bahiyoli bina anahi lu bɛ zuɣu. Tɔbu ni lu bɛ zuɣu n-ku ba, ka bahi vu ba chaŋ, ka juri mini mɔɣu ni biŋkɔbiri tɔhi ba vali.

⁴ N ni chɛ ka bɛ yɛla gbaai dunia ŋɔ zuliya kam dabiɛm, Hɛzɛkia bia Manaasa ŋun daa nyɛ Juda naa la ni daa tum shɛm Jɛrusalɛm la zuɣu.”

⁵Jɛrusalɛmnima, ŋuni n-lee yɛn zɔn ya nambɔɣu? Bee ŋuni n-lee ni fabili yi zuɣu? Ŋuni n-lee ni zani ni o bɔhi yi daalaafee yɛla?

⁶Yawɛ yɛliya, “Yi zaɣisi ma, yi lɛbila yi nyaansi biri ma, dinzuɣu ka n teegi n nuu m-bahi ya yoli. N niŋla suɣilo hal ka n nyee ti nyɔni.

⁷N zaŋ n kayeeni ŋmani n-yɛli ya tiŋgbɔŋ ŋɔ dunɔdaya ni. N chɛ ka bɛ kɔŋ bɛ niriba. M bahi n niriba maa yoli. Bɛ ni bi chɛ tuumbiɛri tumbu zuɣu.

⁸Bɛ pakoya zooya gari teeku noli bihigu. N ku nachimba wuntaŋ’ ni ka chɛ bɛ manima, ka chɛ ka biɛrim mini dabiɛm lu bɛ zuɣu libigi ba.

⁹Ŋun dɔɣi bihi ayopɔin tarigiya, o tarigiya lu. Wuntaŋ’ na bi lu ka yuŋ pun zib’ o sani. O di vi ka nya filiŋ. N ni chɛ ka bɛn kpalim lu tɔbu ni bɛ dimnim’ tooni.” Yawɛ n-yɛli lala maa.

¹⁰M ma, mbusim be n zuɣu a ni daa dɔɣi ma zuɣu. Tiŋ’ maa nim’ zaa kul mali ma la naŋgbankpeeni mini zabili. N na ʒi n-dihi so samli bee n-di so samli, amaa bɛ zaa kul turi ma mi.

¹¹Ka Yawɛ daa yɛli, “Biɛhiŋ kani, n daa zaŋla n nuu kpɛh’ a biɛhigu ni zaɣ’ viɛlli zuɣu. Biɛhiŋ kani, mani n-daa piɛl’ a dimnim’ maa bah’ a zuɣu a wahala saha min’ a nandahima saha.

¹²Nira ni tooi kabigi kurigu mini tahiʒiɛɣu din gabi taba, ka nyɛ din yi nuzaa polo na?

¹³N ni chɛ ka bɛ ŋme n-di yi buni mini yi daazichi zaa n-zaŋ li chaŋ yoli, yi ni tum alahichi shɛŋa zaa yi tiŋgbɔŋ maa ni zaa la zuɣu.

¹⁴N ni chɛ ka yi tum tuma ti yi dimnima yi ni bi mi tiŋgbɔn’ shɛl’ ni, dama n suhu yiɣisiya, ka n dabi buɣim din kul ni diri sahakam.”

¹⁵Yawɛ, a mi binshɛɣukam, teemi n yɛla, ka sɔŋ ma, ka bɔhi bɛn niŋdi ma alaka ŋɔ biɛri ti ma. Di di suɣilo hal ka bɛ ti di n nyɛvili. Baŋmi ni a zuɣu ka bɛ turi ma maa.

¹⁶N daa wum a yɛligu, ka dee’ li, ka a yɛligu maa niŋ ma nyaɣisim, ka ti ma suhupiɛlli, dama nyin’ Yawɛ ŋun nyɛ Tɔbbihi Naawuni ŋɔ n su ma.

¹⁷N daa bi ʒini ninvuɣ’ shɛb’ bɛn mali suhupiɛlli sani, m mi daa bi mali suhupiɛlli; a daa chɛ ka n ʒila n ko, dama a daa chɛ ka n suhu miligi pam.

¹⁸Bɔ n-niŋ ka m biɛrim maa bi naara? Bɔzuɣu ka di zaɣisi naabu? Yɛlimaŋli a ŋmanila kulibɔn shɛli din nyɛ yɔhiŋ; ka ŋmani ko’ shɛŋa din nyuui.

¹⁹Dinzuɣu ka Yawɛ daa yɛli, “A yi labina, n ni deeg’ a ka a lan be n sani yaha. A yi tɔɣisiri yɛtɔɣ’ viɛla ka pa ni yɛtɔɣ’ biɛri, a ni leei ŋun ni tɔɣisiri n yɛtɔɣa. Bɛna n-nyɛ bɛn ni ti lab’ a sanna; pa nyini n-ni ti lab’ bɛ sani.

²⁰N ni chɛ ka a be kaman daanya gooni la niriba maa sani. Bɛ ni tuh’ a, amaa bɛ ku tooi nyaŋ’ a; dama n ni be a sani n-tilig’ a ka fa a bahi. Man’ Yawɛ n-yɛli lala maa.

²¹N ni fa a ninvuɣ’ biɛri nuu ni bahi, ka tilig’ a ninvuɣ’ galima gbaabu ni.”