Read Dagbani Jɛrimia 16 Bible Online

Jɛrimia 16 - Dagbani bible

Jɛrimia 16

¹Yawɛ daa yɛli ma,

²“Miri ka a kpuɣi paɣa bee n-dɔɣi bidibisi bee bipuɣinsi kpe.

³Dama Yawɛ ni yɛli shɛm zaŋ chaŋ bɛ ni dɔɣiri bidib’ shɛb’ mini bipuɣin’ shɛb’ kpe mini bɛ manim’ ni bɛ banim’ bɛn dɔɣi ba polo m-bɔŋɔ:

⁴Dɔr’ biɛri ni ti ku ba. Ka so ti ku fabili bɛ zuɣu bee n sɔɣi ba. Bɛ ni ti dola tiŋgban’ ni kaman naɣibina la. Tɔbu mini kum ni ti ku ba, ka bɛ ti leei juri mini mɔɣu ni biŋkɔbiri bindirigu.”

⁵Dama Yawɛ ni yɛli shɛm m-bɔŋɔ: “Miri ka a kpe bɛ ni kuhiri kuyila yili shɛli ni bee n-fabili bɛ zuɣu bee n-kum bɛ zuɣu, dama man’ yihi n suhudoo mini n yurilim din bi taɣira ni n nambɔzɔbo niriba ŋɔ ni.

⁶Bɛ wɔɣira mini tarimba zaa ni ti kpi tiŋgbɔŋ ŋɔ ni, ka so ti ku sɔɣi ba, ka so mi ti ku fabili bɛ zuɣu. So ti ku zaŋ bini ŋmaag’ omaŋ’ bee m-pini o zuɣu bɛ zuɣu.

⁷So miri ka o ti niŋ bindirigu ti bɛn kumdi kuyila ni o maai bɛ suhuri bɛ kpiimba maa zuɣu bee n-ti ba binnyurigu ni bɛ nyu ka bɛ suhuri maai hal di yi kul nyɛla bɛ banim’ bee bɛ manim’ kum zuɣu gba.

⁸“Miri ka a kpe bɛ ni puhiri chuɣu yili shɛli ni ka a mini ba ti ʒini n-di ka nyu.

⁹ Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: “N ni chɛ ka lari mini suhupiɛlli vuri yɔbu naai, ka lan chɛ ka aŋgo mini amiliya kukoya vuri naai kpe yi ʒiɛmani ŋɔ ni.”

¹⁰A yi yɛli niriba ŋɔ yɛtɔɣa ŋɔ zaa ka bɛ bɔh’ a, “Bɔzuɣu ka Yawɛ tɔɣisi yɛtɔɣ’ biɛ’ kara ŋɔ zaa jɛndi ti? Ti taali lee nyɛla dini? Alahichi bɔ ka ti lee tum Yawɛ ŋun nyɛ ti Naawuni ŋɔ sani?”

¹¹Di saha nyin’ yɛlim’ ba, “Yawɛ yɛliya, ‘Yi yaannim’ ni daa zaɣisi ma ka jɛmdi buɣa ka lan zaɣisi n zaligu dolibu la zuɣu.

¹²Ka yi gba be biɛr’ yoli n-gari yi yaannim’ maa ni daa be shɛm maa. Yinim’ m-bɔŋɔ: yi zaɣ’ yino kam niŋla tipawumli n-doli zaɣ’ biɛɣu soli, ka zaɣisi n yɛligu wumbu.

¹³Dinzuɣu n ni zaŋ ya tiŋgbɔŋ ŋɔ ni n-labi yi ni bi mi tiŋgbɔn’ shɛli ni, ka yi yaannim’ gba daa bi mi li, ka yi ti jɛmdi wun’ shɛŋa nimaani yuŋ ni wuntaŋ’ ni, dama n ku zɔn ya nambɔɣu.’ ”

¹⁴Dinzuɣu Yawɛ yɛliya, “Biɛhiŋ kani, dabisa kanna ka yi ti ku lan po n-yɛli ‘Yawɛ ŋun be ka nyɛ ŋun daa yihi Izraɛlnim’ Ijipti tiŋgbɔŋ ni na ŋɔ zuɣu.’ ”

¹⁵Amaa bɛ ni ti yɛrimi “Yawɛ ŋun be ka nyɛ ŋun daa yihi Izraɛlnim’ nuzaa polo na ŋɔ ka lan nyɛ ŋun daa yihi ba o ni daa kari ba tahi luɣ’ shɛŋa zaa ni la na ŋɔ zuɣu.” Dama n ni ti zaŋ ba labisi bɛmaŋmaŋ’ tiŋgbɔŋ ni din nyɛ n ni daa zaŋ tiŋgbɔn’ shɛli ti bɛ yaannim’ la.

¹⁶Yawɛ yɛliya, “Pumpɔŋɔ n yɛn timmi boli kulipalinim’ pam na ka bɛ ti gbahi ba. Di nyaaŋa ka n lan tim boli tɔhinim’ pam na, ka bɛ ti bo bɛ shee zoli kam mini daboli kam zuɣu, ka yihi ba tampima voya ni na.

¹⁷Dama n nyari bɛ ni kul niŋdi shɛlikam zaa; di shɛli bi sɔɣi n sani, ka bɛ daalahichi bi sɔɣi n sani.

¹⁸N ni yo ba bɛ daalahichi mini bɛ tuumbiɛri maa samli ʒiibuyi zuɣu, dama bɛ zaŋ buɣa maligu nimdi na ti saɣim n tiŋgbɔŋ maa, ka tum din chihira n ni su tiŋgbɔn’ shɛli maa ni zaa.”

¹⁹Yawɛ, nyini n-nyɛ n kpiɔŋ, ka nyɛ n ni mali so nyuri bara. Nyini n-nyɛ n sɔɣisili shee m muɣisigu saha, dunia luɣilikam niriba ni ti ka a sanna ti yɛli, “Ti yaannim’ daa bi di binshɛli fali n-naɣ’ pahila ʒiri mini binyoya din ka buchi.

²⁰Ninsalinim’ ni tooi mali bɛ wuna? Binyara lala pala Naawuni.”

²¹Dinzuɣu biɛhiŋ kani, pumpɔŋɔ n yɛn wuhi ba mi, n ni wuhi ba n yaa mini n yiko, ka bɛ baŋ ni n yuli m booni Yawɛ.