Read Dagbani Jɛrimia 17 Bible Online

Jɛrimia 17 - Dagbani bible

Jɛrimia 17

¹Bɛ zaŋla kurugu alikalimi sabi Judanim’ daalahichi, ka zaŋ daimɔnd chiriga n-chirigi li pa bɛ suhuri ni mini bɛ sara maligu bimbina binyila zuɣu.

²Hal bɛ bihi na teeri bɛ maligu bimbina mini Ashɛra binwɔɣila shɛŋa din ʒe m-baɣi ti’ mahili kam mini daboli kam zuɣu

³ni zoli kam zuɣu mɔɣu ni la yɛla. N ni chɛ ka bɛ ŋme n-di yi buni mini yi daazichi yi tiŋgbani ŋɔ zaa ni n-yo yi daalahichi maa samli.

⁴Yimaŋmaŋ’ tuma ni chɛ ka yi kɔŋ n ni daa zaŋ tiŋgbɔn’ shɛli tin ya la, ka n chɛ ka yi chaŋ ti tumdi tuma tiri yi dimnima yi ni bi mi tiŋgbɔn’ shɛli ni. Dama n suhuyiɣisili ŋmanila buɣim, ka di kul ni diri sahakam.

⁵Yawɛ yɛliya, “Noli ni di ninvuɣ’ shɛb’ bɛn niŋ bɛ ninsalitab’ naani, ka zaŋ bɛ ninsalitab’ maa leei bɛ kpiɔŋ, ka ŋmaligi bɛ suhuri ka chɛ man’ Yawɛ la.

⁶Bɛ ni ti ŋmanila tiŋgban’ nɛli ni tutuɣu, ka faako yi ti kana, bɛ ku nya li. Bɛ ni ti bela tiŋgban’ nɛli tiŋ’ kuŋ ni. Tiŋgban’ shɛli din nyɛ yalim tiŋgbani, ka so ka di ni.

⁷“Amaa ninvuɣ’ shɛb’ bɛn zaŋ Yawɛ leei bɛ ni ni niŋ so naani, ka shiri niŋ o naani mal’ alibarika.

⁸ Bɛ ni ti ŋmanila kul’ tia, din wula chaŋ ti kpe kɔzɔrim ni, wuuni yi ti du, di baɣa kani, ka di vari kul nyɛ va’ maha sahakam. Ka sanzali yuuni puuni, di baɣa kani, ka wala kul bi kɔŋdi di zuɣu.

⁹“Suhu n-nyɛ din mali yɔhiŋgu gari binshɛɣukam; di bi ʒe yim. Ŋuni n-lee ni tooi baŋ li?

¹⁰ Man Yawɛ n-nyɛ ŋun zahindi yɛm, ka vihiri baŋdi salinim’ suhuri, ka tiri sokam zaa ka di doli bɛ biɛhigu ni nyɛ shɛm, ni bɛ tuma nyɔri ni nyɛ shɛm.”

¹¹Ninvuɣ’ shɛb’ bɛn bi doli yɛlimaŋli soli bo n-nya buni ŋmanila noon’ so ŋun ŋuni o ni bi nye gal’ shɛŋa zuɣu wɔɣi li. Zaŋ chaŋ bɛ biɛhigu pirigili puuni, bɛ ni ti kɔŋ li, ka bɛ bahigu saha, niriba ni ti boli ba jɛra.

¹²Ti jɛmbu duu maa ŋmanila nam ʒiishee din mali jilima, ka nyɛ bɛ ni daa pun duhi shɛli piligu ni ha.

¹³Yawɛ, nyini n-nyɛ Izraɛlnim’ ni mali tahima so sani. Bɛnkam zaɣis’ a ni di vi. Bɛnkam zo ka chɛ a, bɛ ni sabi bɛ yuya niŋ tiŋgban’ ni, dama bɛ zaɣisila Yawɛ ŋun nyɛ nyɛvili kɔbilinini ŋɔ.

¹⁴Yawɛ, tibimi ma, ka n kpaŋ, tiligim’ ma, ka n tiligi, dama nyini n-nyɛ n ni paɣiri so.

¹⁵Wummi bɛ ni bɔhiri ma shɛm, “Yawɛ yɛligu maa lee be ya? Chɛ ka ti wum li.”

¹⁶Amaa n na ʒi n-zo ka chɛ’ piɛgulibo din nyɛ a ni zaŋ tuun’ shɛli ti ma maa bee m-bɔri ni zaɣ’ biɛɣu paa’ ba. A mi yɛtɔɣ’ shɛŋa din yiri n nol’ ni na; dama di daa niŋla a ninni.

¹⁷Miri ka a leei dabiɛm bini n sani, nyini n-nyɛ n ni yɛn sɔɣi so sani m muɣisigu saha.

¹⁸Chɛ ka ninvuɣ’ shɛb’ bɛn niŋdi ma alaka di vi. Amaa di chɛ ka man’ di vi. Chɛ ka dabiɛm gbahi ba, amaa di chɛ ka dabiɛm gbaai ma. Chɛ ka alɔbo lu bɛ zuɣu n-ku ba pam.

¹⁹Yawɛ ni daa yɛli ma shɛm m-bɔŋɔ: “Cham’ ti zani Niriba Dunɔdal’ la ni, Juda nanim’ ni doli shɛli yira, ka lan dol’ li kpɛri la, ka lan chaŋ Jɛrusalɛm dunɔdaya zaa ni

²⁰nti yɛli ba: Yinim’ Juda nanim’ mini Judanim’ zaa ni Jɛrusalɛmnim’ zaa bɛn doli dunɔdaya ŋɔ kpɛra, Wummiya Yawɛ ni yɛli shɛm,”

²¹ Yawɛ yɛliya, “Yimaŋmaŋ’ nyɛviya zuɣu, miriya ka yi ʒi ʒiya Vuhim Dabisili dali bee n-ʒi li doli dunɔdaya ŋɔ kpe Jɛrusalɛm.

²² Ka miriya ka yi ʒi ʒiya yi yinsi bee n-tum tuun’ shɛli Vuhim Dabisili dali, amaa gbibiya Vuhim Dabisili maa ka di nyɛ dabisili kasi kaman n ni daa zali yi yaannim’ shɛm la.

²³Amaa ka bɛ daa niŋ tipawumli n-zaɣisi ni bɛ ku gbilisi tibili wum bee n-deei n wuhibu maa.”

²⁴Yawɛ yɛliya, “Amaa yi yi ni wum n yɛligu, ka ku ʒi ʒiya doli yaŋɔ dunɔdaya ŋɔ kpɛna Vuhim Dabisili dali, amaa ka ni gbibi Vuhim Dabisili maa ka di nyɛ dabisili kasi, ka bi tum tuma dindali,

²⁵dindina na’ shɛb’ bɛn ʒini Dauda nam ʒiishee, ka nyɛ bɛn bari yuri mini chɛchɛbunsi ni bɛ kpamba ni Judanim’ ni Jɛrusalɛmnim’ ni ti doli dunɔdaya ŋɔ kpe. Ka niriba ti pali tiŋ’ ŋɔ ni sahakam.

²⁶Ka niriba ti yi Juda fɔntinsi ni mini tin’ shɛŋa din gili Jɛrusalɛm ni Bɛnjamin zuliya tiŋgban’ ni ni daboya mini zoya ni tinsi ni ni Nɛgɛb n-zaŋ bɛ ni zaŋdi sara shɛli nyɔri buɣim la mini sara pina din nyɛ chi sara ni tulaale zim na. Bɛ ni lan zaŋ wumpaɣibo pina ka Yawɛ jɛmbu duu na.

²⁷Amaa yi yi bi gbilisi tibili wum n yɛligu, ka gbibi Vuhim Dabisili maa kasi din nyɛ yi di ʒi ʒiya doli Jɛrusalɛm dunɔdaya kpe Vuhim Dabisili dal’ la, dindina n ni niŋ buɣim dabi Jɛrusalɛm dunɔdaya maa, ka di di Jɛrusalɛm nanim’ yinsi, ka so ku tooi kpihi li.”