Read Dagbani Jɛrimia 20 Bible Online

Jɛrimia 20 - Dagbani bible

Jɛrimia 20

¹Ka maligumaana Pashihur ŋun daa nyɛ Imɛr bia, ka nyɛ Yawɛ jɛmbu duu kpɛm’ la daa wum Jɛrimia anabitali yɛtɔɣa zaŋ chaŋ binyara ŋɔ polo,

²ka o chɛ ka bɛ bu Jɛrimia, ka ba o bandi ʒili Bɛnjamin dunɔdali din daa be zuɣusaa din be Yawɛ jɛmbu duu polo la.

³Biɛɣu ni daa neei, ka Pashihur chɛ ka bɛ baai Jɛrimia bandi maa, ka Jɛrimia yɛl’ o, “Yawɛ daa bi bol’ a yuli Pashihur, amaa o daa bol’ a yuli la Dabiɛm be luɣilikam zaa.

⁴Dama Yawɛ ni yɛli shɛm m-bɔŋɔ: N ni chɛ ka a yɛla mal’ a dabiɛm amaŋmaŋ’ sani zaŋ tabili a zɔnim’ zaa, ka chɛ ka bɛ dimnim’ ti zaŋ takɔbiri ku ba ka a ʒiɛya lihira. N ni ti zaŋ Judanim’ zaa niŋ Babilɔn naa nuu ni, ka o gbahi ba daba kuli Babilɔn. O ni ti zaŋ takɔbi ku ba.

⁵N ni ti zaŋ tiŋ’ ŋɔ ni daazichi zaa mini di nyamma zaa ni di binshɛɣukam zaa din mali anfaani ni Juda nanim’ daazichi zaa niŋ bɛ dimnim’ nuu ni, ka bɛ ŋme n-di li n-zaŋ li kuli Babilɔn.

⁶Ka bɛ ni ti gbaai nyin’ Pashihur mini bɛn be a yiŋ’ zaa daba n-zaŋ ya kuli Babilɔn, ka a min’ a zɔnim’ zaa ti kpi nimaani, ka bɛ sɔɣi ya nimaani. A zɔnim’ shɛba a ni yi tɔɣisiri ʒiri anabitali yɛtɔɣa la.”

⁷Yawɛ, nyini n-kpɛhi ma kɔre, ka kɔre maa gbaa’ ma. A mali yaa gari ma, ka nyaŋ ma. N leela bɛ ni lari so asiba hal ni yuŋ; sokam maani ma la ansarisi.

⁸Dama n yi kul tɔɣisiri yɛtɔɣa n ti kuhirimi ka tahi yɛli, “Duŋtaabo mini saɣiŋgu!” Dama nyin’ Yawɛ yɛligu maa leela turi mini ansarisi bini n sani asiba hal ni yuŋ.

⁹N yi yɛli ni n ku lan bol’ a bee n-zaŋ a yuli tɔɣisi yɛtɔɣa, di saha a yɛligu maa ŋmanila buɣim be n kɔba ni dira, ka di gbibbu ti wum ma, ka n ku lan tooi gbib’ li.

¹⁰Dama n wum bɛ ni sɔɣiri yɛra, “Dabiɛm kul bela luɣilikam. Zaɣisimiy’ o, chɛliya ka ti zaɣis’ o.” N zɔsimnim’ kul guhirimi ni n tuui lu, ka yɛra, “Di pa shɛli ti ni kpɛh’ o kɔre n-nyaŋ o, ka bɔh’ o biɛri.”

¹¹Amaa Yawɛ bela n sani kaman tɔbbia ŋun yɛla mali dabiɛm la. Dinzuɣu ninvuɣ’ shɛb’ bɛn niŋdi ma alaka maa ni tuui lu. Bɛ ku nyaŋ ma. Bɛ ni di vi kara, dama bɛ ku di nasara. Bɛ ni nya filiŋ sahakam, ka di yɛla ka tambu.

¹²Yawɛ ŋun nyɛ Tɔbbihi Naa ŋɔ, nyini n-zahindi wuntizɔriba, nyini n-nyari din be ninsal’ suhu ni min’ o tɛha ni; chɛ ka n nya a ni yɛn bɔhi ba biɛri shɛm, dama n zaŋ n yɛla maa niŋla a nuu ni.

¹³Yilimiya yila jɛm Yawɛ. Paɣimiya Yawɛ, dama o tiligi tarimba nyɛviya tuumbiɛrinim’ nuu ni.

¹⁴Mbusim be bɛ ni daa dɔɣi ma dabisi’ shɛli ni maa zuɣu! Di chɛ ka alibarika be m ma ni daa dɔɣi ma dabisi’ shɛli maa ni!

¹⁵Mbusim be ninvuɣ’ so ŋun daa yɛli m ba, “A paɣa dɔɣi bidibiga” ka o suhu paligi la zuɣu.

¹⁶Chɛ ka dilan’ maa biɛhigu ti be kaman Yawɛ ni daa wurim fɔntin’ shɛŋa ka bi zo li nambɔɣu la. Chɛ ka o kul wumdi kuhigu asiba, ka wumdi tɔbuchiriga wuntaŋ’ zuɣusaa saha.

¹⁷Dama o daa bi ku ma niŋ m ma pul’ ni, ka lala zuɣu chɛ ka m ma puli maa leei n gballi, ka o puli maa kul bara sahakam.

¹⁸ Bɔzuɣu ka n daa yi m ma puli ni na ni n ti nyari muɣisigu mini suhugarigu, ka vi kul yɛn diri ma hal ni n nyɛvili tariga?