Read Dagbani Jɛrimia 23 Bible Online

Jɛrimia 23 - Dagbani bible

Jɛrimia 23

¹Yawɛ yɛliya, “Mbusim be piɛgul’ shɛb’ bɛn ku m piɛri, ka wurim ba kpɛhi yɔɣu ŋɔ zuɣu.

²Dinzuɣu man’ Yawɛ ŋun nyɛ Izraɛlnim’ Naawuni ŋɔ ni yɛli shɛm zaŋ chaŋ zuɣulaan’ shɛb’ bɛn guli n niriba la polo m-bɔŋɔ: Yinima n-wurim n niriba, ka kari ba bahi, ka bi biɛhi bɛ naba; dinzuɣu n ni darigi yi tibili yi tuumbiɛri maa zuɣu. Man’ Yawɛ n-yɛli lala maa.

³Dimbɔŋɔ nyaaŋa mmaŋmaŋ’ ni laɣisi m piɛ’ shɛb’ bɛn kpalim maa n ni kari ba bahi tiŋgbɔn’ shɛl’ ni maa na nti zaŋ ba niŋ bɛ biɛhigu shee, ka bɛ dɔɣi bihi ka nabi.

⁴N ni bo zuɣulaannim’ bɛn ni guli ba, ka bɛ ku lan zɔri dabiɛm bee n-gbarigi bee ka bɛ ni so ti bɔrigi. Man’ Yawɛ n-yɛli lala maa.”

⁵Yawɛ yɛliya, “Biɛhiŋ kani, saha kanna ka n ni ti pii wuntizɔr’ so Dauda daŋ ni, ka o ti di nam n-zaŋ yɛm su niriba, ka niŋdi din tuhi, ka tumdi wuntitali tuma tiŋgbɔŋ ŋɔ ni.

⁶ O ʒiɛman’ ni ka Judanim’ ni ti nya tiliginsim, ka Izraɛlnim’ mi be ni alaafee. O yuli ti yɛn boonila, ‘Yawɛ n-nyɛ ti wuntia.’ ”

⁷Yawɛ yɛliya, “Dinzuɣu saha kanna ka bɛ ti ku lan yɛli, ‘Hal ka Yawɛ ŋun be ka nyɛ ŋun daa yihi Izraɛlnim’ Ijipti tiŋgbɔŋ ni na ŋɔ zuɣu,’

⁸amaa bɛ ni ti yɛrimi, ‘Hal ka Yawɛ ŋun be, ka nyɛ ŋun daa yihi Izraɛlnim’ o ni daa kari ba tahi nuzaa polo tin’ shɛŋa zaa ni la zuɣu.’ Di saha bɛ ni ti be bɛmaŋmaŋ’ tiŋgbɔŋ ni.”

⁹Zaŋ chaŋ anabinim’ polo: N suhu saɣimmi zaa, ka n kɔba ni chɔɣisi. N ŋmanila ŋun nyu dam kuli ka ŋmani ŋun nyu wain buɣi, Yawɛ min’ o yɛligu kasi zuɣu.

¹⁰Dama tiŋgbɔŋ maa kul palila zinaniŋdiba. Noli yɛlibu la zuɣu, tiŋgbɔŋ maa kumdimi ka biŋkɔbiri mɔri ŋubbu shee kuui. Bɛ tuma nyɛla tuumbiɛri, ka bɛ kpiɔŋ tuma pala din tuhi.

¹¹Anabinim’ mini maligumaaniba zaa nyɛla bɛn bi zɔri Naawuni. Hal n jɛmbu duu puuni n nya bɛ tuumbiɛri maa. Yawɛ n-yɛli lala maa.

¹²Dinzuɣu bɛ soya maa ni ti nyɛla sariginli soya din be zibisim ni, bɛ ni ti yɛn kari ba bahi so’ shɛli zuɣu ka bɛ ti lu. Dama n yi ti yɛn darigi bɛ tibili yuun’ shɛli n ni chɛ ka zaɣ’ biɛɣu paai ba. Yawɛ n-yɛli lala maa.

¹³Samaria anabinim’ sani, n nya binshɛli din bi viɛla. Bɛ malila Baal yuli tɔɣisiri anabitali yɛtɔɣa, ka chɛ ka n niriba birigi.

¹⁴ Amaa n nya binshɛli Jɛrusalɛm anabinim’ sani ka din’ dii kɔŋ tim. Bɛ niŋdila zina, ka ŋmari ʒiri. Bɛ kpaŋsirila tuumbiɛtumdiba kɔba ni, ka di zuɣu chɛ ka so bi bɔri ni o zo n-yi tuumbiɛri tumbu ni. Bɛ zaa ŋmanila Sɔdom n sani, ka di niriba mi ŋmani Gomɔra.

¹⁵Dinzuɣu Yawɛ ŋun nyɛ Tɔbbihi Naa ŋɔ ni yɛli shɛm zaŋ chaŋ anabinim’ maa polo m-bɔŋɔ: “N yɛn zaŋla bintɔri dihi ba, ka zaŋ kom din mali lɔɣu nyuhi ba. Dama tuumbiɛri maa yila Jɛrusalɛm anabinim’ maa sani n-gili tiŋgbɔŋ maa zaa ni.”

¹⁶Yawɛ ŋun nyɛ Tɔbbihi Naa ŋɔ ni yɛli shɛm m-bɔŋɔ: “Di wumdi ya anabi shɛb’ bɛn be yi sani ŋɔ yɛligu. Bɛ ŋmari ya la ʒiri; bɛ suhuyubu yɛtɔɣa ka bɛ tɔɣisiri maa. Di pala Yawɛ noli ni yɛtɔɣa.

¹⁷Bɛ kul yɛrila ninvuɣ’ shɛb’ bɛn lihi ʒiɛm man’ Yawɛ yɛligu ni binshɛɣukam ni niŋ viɛnyɛliŋga bɛ sani, ka yɛri ninvuɣ’ shɛb’ bɛn niŋ tipawumli doli bɛ tipawumli suhuyubu maa mi ni zaɣ’ biɛɣu ku paai ba.”

¹⁸Dama ŋuni n-lee nyɛ Yawɛ saawaralana n-nya o ka wum o yɛligu? Ŋuni n-lee wum o yɛligu ka nyɛ ŋun ni tooi mol’ li?

¹⁹Nyamiya Yawɛ sanʒiɛɣu, suhuyiɣisili titali. Di ŋmanila pɔhimʒiɛpiliŋga, di ni lu ninvuɣ’ biɛri zuɣu.

²⁰Yawɛ suhuyiɣisili maa ku chɛ hal ka o ti niŋ o suhu ni lo ni o niŋ shɛli maa naai. Dahin shɛli kanna ka yi ni ti baŋ di gbinni viɛnyɛliŋga.

²¹N daa bi tim anabinim’ maa, amaa ka bɛ yiɣisi guui chaŋ. N daa bi zaŋ n yɛligu ti ba, amaa ka bɛ tɔɣisiri anabitali yɛtɔɣa.

²²Bɛ yi di nyɛla n saawaranima, dindina bɛ naan moli n yɛligu maa n niriba sani; bɛ naan yihi ba bɛ biɛriyoli ni, ka yihi ba bɛ ni tumdi tuumbiɛ’ shɛŋa ni.

²³Yawɛ bɔhiri ya, “N nyɛla Naawuni ŋun kul be yomayoma ka pa Naawuni ŋun be katiŋ’ gba?”

²⁴Yawɛ yɛliya, “Banima n-lee ni tooi sɔɣi ashilɔni luɣ’ shɛli ka n ku tooi nya ba? M bi bela zuɣusaa mini dunia ni zaa? Man’ Yawɛ n-yɛli lala maa.

²⁵N wum anab’ shɛb’ bɛn mali n yuli ŋmari ʒiri yɛra, ‘N zahimla zahindi, n zahimla zahindi.’

²⁶Saha yuusim wula ka anabi shɛb’ bɛn tɔɣisiri anabitali yɛtɔɣa din nyɛ ʒiri, ka tɔɣisiri bɛ suhuyubu anabitali yɛtɔɣa din nyɛ yɔhiŋ ŋɔ lee yɛn chɛ lala niŋbu?

²⁷Bɛ loya ni bɛ zaŋ bɛ zahima maa n-chɛ ka n niriba tam n yɛla saha shɛli bɛ ni tɔɣisiri tab’ di yɛla maa, kaman bɛ yaannim’ ni daa tam n yɛla ka jɛmdi Baal shɛm la.

²⁸Chɛ ka anabi so ŋun zahim zahindi yɛlila zahindi maa yɛtɔɣa, amaa ŋun mi mali n yɛligu ŋun’ tɔɣisim’ n yɛligu maa yɛla ni ʒiɛyimtali. Mɔri mini alikama nyɛla yim? Man’ Yawɛ n-yɛli lala maa.

²⁹N yɛligu bi bemi kaman buɣim bee zali din nyɛ bɛ ni mali shɛli ŋmɛri wurindi kuɣa la? Man’ Yawɛ m-bɔhi lala maa.”

³⁰Yawɛ yɛliya, “Dinzuɣu nyamiya, n je anabi shɛb’ bɛn zuri n yɛligu bɛ tab’ sani la.”

³¹Yawɛ yɛliya, “Nyamiya, n je anabi shɛb’ bɛn mali bɛmaŋmaŋ’ yɛtɔɣa tɔɣisiri ka yɛra, ‘Yawɛ n-yɛli lala maa.’ ”

³²Yawɛ yɛliya, “N je anabi shɛb’ bɛn mali ʒiri zahima tɔɣisiri anabitali yɛtɔɣa, ka zaŋ bɛ ʒiri maa mini bɛ biɛriyoli m-birigiri n niriba la. Di mi pala mani n-tim ba bee n-zali ba. Dinzuɣu bɛ ka niriba ŋɔ nyɔri shɛli hal baabiɛla gba. Man’ Yawɛ n-yɛli lala maa.”

³³Yawɛ yɛliya, “Niriba ŋɔ bee anabi bee maligumaana yi ti bɔh’ a, ‘Yɛlimuɣisirili din yi Yawɛ sanna lee nyɛ dini?’, nyin’ yɛlim’ ba, ‘Yawɛ yɛliya: Yinima n-nyɛ yɛlimuɣisirili maa. N ni kari ya bahi.’ ”

³⁴Ka di yi nyɛla anabi mini maligumaana bee niriba bɛn yɛra, “Yɛlimuɣisirili din yi Yawɛ sanna la,” n ni darigi bɛ mini bɛ yinsinim’ tibili.

³⁵Yi ni yɛn bɔhi tab’ shɛm m-bɔŋɔ: “Wula ka Yawɛ lee garigi yɛli?” bee “Wula ka Yawɛ lee yɛli?”

³⁶Amaa miriya ka yi lan yɛli yɛlimuɣisirili din yi Yawɛ sanna yɛla, dama yɛlimuɣisirili maa nyɛla sokam maŋmaŋ’ yɛligu, ka lala zuɣu chɛ ka yi taɣi Yawɛ ŋun nyɛ ti Naawuni ka nyɛ ŋun be ka nyɛ Tɔbbihi Naa ŋɔ yɛligu.

³⁷Yi ni yɛn bɔhiri anabinim’ shɛm m-bɔŋɔ: “Wula ka Yawɛ lee garigi yɛli ya?” bee “Yɛtɔɣ’ bɔ ka Yawɛ lee yɛli?”

³⁸Amaa yi yi yɛli, “Yɛlimuɣisirili din yi Yawɛ sanna”, Yawɛ ni yɛli shɛm m-bɔŋɔ: Yi ni yɛra, ‘Yɛlimuɣisirili din yi Yawɛ sanna ŋɔ’ zuɣu, m pun tim na ti yɛli ya, “ Di lan yɛliya, ‘Yɛlimuɣisirili din yi Yawɛ sanna.’ ”

³⁹Dinzuɣu n ni kpuɣi yi mini n ni daa zaŋ tiŋgbɔn’ shɛli ti yi mini yi yaannim’ ŋɔ zuɣusaa n sani n-zaŋ labi katiŋa,

⁴⁰ka filim ya, ka yi di vi din ka naabu, ka ku tam di yɛla.