Read Dagbani Jɛrimia 27 Bible Online

Jɛrimia 27 - Dagbani bible

Jɛrimia 27

¹ Juda Naa Jɔsia bia Zɛdɛkia nam dibu piligu ni ka Yawɛ daa yɛli Jɛrimia yɛtɔɣa ŋɔ,

²“Zaŋmi gbantolima mini dapua m-mali naɣikɔra dapua n-zaŋ pa a nyiŋgoli zuɣu.

³Chɛ ka tuumba bɛn ka Juda naa Zɛdɛkia sanna Jɛrusalɛm maa zaŋ lahibali ti ti Ɛdom naa mini Mɔab naa ni Ammɔn naa ni Taai naa ni Sidɔn naa.

⁴Zaŋmi yɛtɔɣa ŋɔ yɛli ba ka bɛ zaŋ mali kuli ti yɛli bɛ nanima ni Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: Yi ni ti yɛn yɛli yi nanim’ maa shɛm m-bɔŋɔ:

⁵N yiko din galisi puuni ka n daa teei n nuu nam dunia mini ninsalinima ni biŋkɔbiri bɛn be di ni, ka zaŋdi li tiri n nini ni tiɣi so.

⁶Pumpɔŋɔ n zaŋla tiŋgbana ŋɔ zaa ti Babilɔn Naa Nɛbukadnɛza ŋun nyɛ n dabili ŋɔ, ka zaŋ mɔɣu ni biŋkɔbiri ti o ni bɛ jɛmd’ o.

⁷Zuliya kam zaa ni ti jɛm’ o min’ o bia ni o yaaŋa hal ka omaŋmaŋ’ tiŋgbɔŋ lubu saha ti paai, ka zuliya pam mini na’ kara ti zaŋ o leei bɛ dabili.

⁸Amaa zuliya shɛli bee na’ so yi ku jɛm Babilɔn Naa Nɛbukadnɛza ka zaŋ bɛ nyiŋgoya niŋ Babilɔn Naa naɣikɔra dapua lɔŋni, dindina n ni darigi di zuliya maa tibili ka chɛ ka tɔbu mini kum ni alɔbo lu bɛ zuɣu hal ka n ti chɛ ka o zaŋ o nuu naai ba zaa. Yawɛ n-yɛli lala maa.

⁹Dinzuɣu miriya ka yi wumdi yi daanabinim’ mini yi laasabuniŋdiba bee yi zahinzahindiba ni yi baɣisi bee yi bukpahinim’ bɛn yɛri ya ni yi di jɛm Babilɔn Naa la yɛligu.

¹⁰Dama bɛ tɔɣisiri ya la ʒiri anabitali yɛtɔɣa ni di chɛ ka bɛ yihi ya yi tiŋgbɔŋ ŋɔ ni n-zaŋ ya tahi katiŋa. N ni kari ya bahi ka yi ti kpi.

¹¹Amaa zuliya shɛli din zaŋ di nyiŋgoli niŋ Babilɔn Naa naɣikɔra dapua lɔŋni n-jɛmd’ o, n ni chɛ di zuliya maa ʒili bɛmaŋmaŋ’ tiŋgbɔŋ ni ka bɛ be nimaani kɔra. Man’ Yawɛ n-yɛli lala maa.”

¹²Lala ka n yɛli Juda Naa Zɛdɛkia, “Zaŋm’ a nyiŋgoli niŋ Babilɔn Naa naɣikɔra dapua lɔŋni, ka jɛm o min’ o niriba ka be.

¹³Bɔ n-niŋ ka a yɛn chɛ ka tɔbu mini kum ni alɔbo ku a min’ a niriba kaman Yawɛ ni daa yɛli shɛm jɛndi zuliya shɛli din zaɣisi ni di ku jɛm Babilɔn Naa la?

¹⁴Miri ka a deei anab’ shɛb’ bɛn yɛr’ a ni a di jɛm Babilɔn Naa la yɛligu, dama bɛ tɔɣisir’ a la ʒiri anabitali yɛtɔɣa.

¹⁵Yawɛ yɛliya, ‘M bi tim ba yi sanna, amaa bɛ zaŋ n yuli tɔɣisirila ʒiri anabitali yɛtɔɣa ni di chɛ ka n kari ya bahi ka yi mini bɛna anabinim’ bɛn tɔɣisiri ya anabitali yɛtɔɣa maa ti kpi.’ ”

¹⁶Di nyaaŋa ka n daa tɔɣisi maligumaaniba mini niriba maa zaa yɛtɔɣa yɛli, “Yawɛ ni yɛli shɛm m-bɔŋɔ: ‘Miriya ka yi gbilisiri tibili wumdi yi daanab’ shɛb’ bɛn tɔɣisiri ya anabitali yɛtɔɣa n-yɛra: Bɛ ni zaŋ Yawɛ jɛmbu duu lahi la yi Babilɔn labisina pumpɔŋɔ la yɛligu. Dama bɛ tɔɣisiri ya la ʒiri anabitali yɛtɔɣa.

¹⁷Di wumya bɛ yɛtɔɣa. Jɛmmiya Babilɔn Naa ka be. Bɔzuɣu ka yi yɛn chɛ ka tiŋ’ ŋɔ zani dabari?

¹⁸Bɛ yi shiri nyɛla anabinima, ka Yawɛ yɛligu maa be bɛ sani, dindina bɛn’ suhimi Yawɛ ŋun nyɛ Tɔbbihi Naa ŋɔ ni o di chɛ ka bɛ zaŋ la’ shɛŋa din kpalim be Yawɛ jɛmbu duu mini Juda nayili ni Jɛrusalɛm la kuli Babilɔn.

¹⁹Dama Yawɛ ni yɛli shɛm zaŋ chaŋ daantalisi la mini kɔniŋdibin’ la ni di ni tam binshɛŋa zuɣu la ni la’ shɛŋa din kpalim tiŋ’ ŋɔ,

²⁰ka Babilɔn Naa Nɛbukadnɛza daa bi kpuɣi li kuli Babilɔn saha shɛl’ o ni daa gbaai Jɛhoyakim bia Jɛhoyachin ŋun daa nyɛ Juda Naa la min’ o kpambaliba zaa ni Jɛrusalɛm kpambaliba zaa kuli Babilɔn la polo m-bɔŋɔ:

²¹Yawɛ ŋun nyɛ Tɔbbihi Naa ka nyɛ Izraɛlnim’ Naawuni ŋɔ ni yɛli shɛm zaŋ chaŋ la’ shɛŋa din kpalim be Yawɛ jɛmbu duu mini Juda nayili ni Jɛrusalɛm la polo m-bɔŋɔ:

²²“Bɛ ni zaŋ li kuli Babilɔn, ka di ti kpalim be nimaani hal ti paai dabisi’ shɛli n ni lan yɛn zaŋ n zaŋsim labisi di polo. Di saha ka n ti lan yɛn zaŋ li nimaani na ti zali kpe yaha. Man’ Yawɛ n-yɛli lala maa.”