Read Dagbani Jɛrimia 28 Bible Online

Jɛrimia 28 - Dagbani bible

Jɛrimia 28

¹ Zɛdɛkia ni daa di Juda nam, di piligu ni yuun’ shɛli din pahiri yuma anahi gol’ so ŋun pahir’ anu puuni ka Azur ŋun daa nyɛ Gibiɔn nir’ la bia anabi Hanania daa tɔɣisi ma yɛtɔɣa Yawɛ jɛmbu duu maligumaaniba mini niriba zaa sani yɛli,

²“Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: N kabi Babilɔn Naa naɣikɔra dapua la.

³Zaŋ chaŋ yuma ayi saha n ni zaŋ Babilɔn Naa Nɛbukadnɛza ni daa kpuɣi Yawɛ jɛmbu duu la’ shɛŋa zaa kpe n-kuli Babilɔn la labisi kpe na.

⁴N ni lan zaŋ Jɛhoyakim bia Jɛhoyachin ŋun nyɛ Juda naa la mini bɛ ni daa gbahi ninvuɣ’ shɛb’ zaa Juda n-zaŋ ba kul Babilɔn la labisi kpe na; dama n ni kabi Babilɔn Naa naɣikɔra dapua.” Yawɛ n-yɛli lala maa.

⁵Di saha ka anabi Jɛrimia daa yɛli anabi Hanania maligumaaniba mini ninvuɣ’ shɛb’ bɛn zaa daa ʒe Yawɛ jɛmbu duu maa puuni ninni.

⁶Anabi Jɛrimia daa yɛlimi, “To! Yawɛ shiri niŋmi lala. Yawɛ chɛ ka a ni tɔɣisi anabitali yɛtɔɣ’ shɛŋa ŋɔ niŋ pali, ka o zaŋ ŋun’ Yawɛ jɛmbu duu la’ shɛŋa mini ninvuɣ’ shɛb’ zaa bɛ ni daa gbahi n-zaŋ ba kuli Babilɔn la labisi kpe na.

⁷Amaa pumpɔŋɔ a mini niriba ŋɔ zaa wummiya n ni yɛn yɛli yɛtɔɣ’ shɛŋa ŋɔ.

⁸Anabi shɛb’ bɛn daa daŋ m min’ a tooni na kurimbuni ha la daa tɔɣisiri anabitali yɛtɔɣa n-yɛri tɔbu tuhibu mini kum ni alɔbo yɛtɔɣa n-jɛndiri tiŋgbɔna mini nam shɛŋa din niriba mali kpiɔŋ.

⁹Ka anabi so daa yi tɔɣisiri anabitali yɛtɔɣa n-yɛri suhudoo yɛla, anabi maa yɛligu daa yi ti niŋ pali, di saha ka bɛ baŋdi ni Yawɛ n-shiri tim o na ni yɛlimaŋli.”

¹⁰Di saha ka anabi Hanania daa paai naɣikɔra dapua maa anabi Jɛrimia nyiŋgoli zuɣu n-kabigi li.

¹¹Ka Hanania daa tɔɣisi yɛtɔɣa niriba maa zaa sani yɛli, “Yawɛ ni yɛli shɛm m-bɔŋɔ: ‘Ŋ-ŋɔ ka n yɛn kabi Babilɔn Naa Nɛbukadnɛza naɣikɔra dapua la zuliya kam nyiŋgoya ni yuma ayi puuni.’ ” Dimbɔŋɔ nyaaŋa ka anabi Jɛrimia daa ŋmaligi chaŋ o chandi.

¹²Anabi Hanania ni daa kabigi naɣikɔra dapua maa anabi Jɛrimia nyiŋgoli zuɣu maa nyaaŋa, ka Yawɛ daa yɛli Jɛrimia,

¹³“Cham’ ti yɛli Hanania, Yawɛ ni yɛli shɛm m-bɔŋɔ: ‘A kabigila dapua, amaa m bo kurigu dapua n-zali di zaani.

¹⁴Dama Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: N zaŋla kurigu dapua ga zuliya kam nyiŋgoya’ ni ni bɛ jɛm Babilɔn Naa Nɛbukadnɛza, ka bɛ mi shiri ni jɛm’ o ni yɛlimaŋli. Hal n zaŋla mɔɣu ni biŋkɔbiri gba ti o.’ ”

¹⁵Ka anabi Jɛrimia daa yɛli anabi Hanania, “Hanania, wumma, pa Yawɛ n-tim a na ka a ti chɛ ka niriba ŋɔ niŋ ʒiri yɛda maa.

¹⁶Dinzuɣu Yawɛ ni yɛli shɛm m-bɔŋɔ: ‘N yɛn chɛmi ka a yi dunia ni. A ni kpi yuuni ŋɔ puuni a ni tɔɣisi duŋtaabo yɛtɔɣa jɛndi Yawɛ maa zuɣu.’ ”

¹⁷Di yuuni maa puuni, gol’ so ŋun pahir’ ayopɔin ni, ka anabi Hanania daa shiri kpi.