Read Dagbani Jɛrimia 29 Bible Online

Jɛrimia 29 - Dagbani bible

Jɛrimia 29

¹Anabi Jɛrimia ni sabi gban’ shɛli Jɛrusalɛm n-ti kpamba bɛn daa kpalim mini maligumaaniba ni anabinim’ ni ninvuɣ’ shɛb’ zaa Nɛbukadnɛza ni daa gbahi Jɛrusalɛm n-kuli Babilɔn la puuni yɛtɔɣa m-bɔŋɔ.

² Dimbɔŋɔ daa niŋla Naa Jɛhoyachin min’ o ma ni saria karibu shee kpamba ni Juda mini Jɛrusalɛm kpamba ni nuhi tuumbaŋdiba ni machɛlinim’ ni daa yi Jɛrusalɛm la nyaaŋa.

³Shafan bia Ɛlasa mini Hilikia bia Gɛmaria bɛn daa nyɛ Juda Naa Zɛdɛkia ni daa tim shɛba Babilɔn Naa Nɛbukadnɛza san’ la n-daa zaŋ gbaŋ maa mali chaŋ. Di daa yɛlimi,

⁴“Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛl’ o ni daa chɛ ka bɛ gbahi ninvuɣ’ shɛb’ zaa Jɛrusalɛm kuli Babilɔn la shɛm m-bɔŋɔ:

⁵‘Mɛmiya yiya m-be di ni, ka kɔnya puri n-diri di bindira.

⁶Kpuɣimiya paɣiba n-dɔɣi bidibisi mini bipuɣinsi. Bomiya paɣiba ti yi bidibisi, ka zaŋya yi bipuɣinsi ti dɔbba; nabimiya pahi nimaani, ka di filimya.

⁷Amaa bomiya n ni chɛ ka bɛ gbahi ya kuli tiŋgbɔn’ shɛli ni maa tɔŋsim, ka suhimiya Yawɛ tim’ li, dama di tɔŋsim puuni ka yi gba ni tɔŋ.

⁸Dama Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: Miriya ka yi chɛ ka anabi shɛb’ mini laasabuniŋdib’ shɛb’ bɛn be yi san’ la yɔhim ya. Di gbilisiya tibili wumdi bɛ ni zahindi zahin’ shɛŋa la.

⁹Dama ʒiri anabitali yɛtɔɣa ka bɛ mali n yuli tɔɣisiri maa. Pa mani n-tim ba na. Man’ Yawɛ n-yɛli lala maa.’

¹⁰ Dama Yawɛ yɛliya, “Naɣila yi ni yɛn be Babilɔn yuun’ pisopɔin la saha ti gari, ka n naanyi ka yi sanna nti chɛ ka n ni daa lɔn ya alikauli shɛŋa la niŋ pali, ka n zaŋ ya labisi kpe na.”

¹¹Dama Yawɛ yɛliya, “Biɛhiŋ kani, m mi n ni lɔn ya nia shɛŋa. Di nyɛla nia shɛŋa n ni lo zaŋ chaŋ yi zaɣ’ viɛlli polo ka pa ni yi zaɣ’ biɛɣu polo. N ni chɛ ka yi kul mali dahin’ shɛli biɛhigu tahima.

¹²Di nyaaŋa yi yi ti boli ma n-suhi ma, n ni wum yi suhigu maa.”

¹³ Yawɛ yɛliya, “Yi yi ti bo ma ni yi suhuri zaa, yi ni nya ma.

¹⁴N ni chɛ ka yi nya ma, ka n labisi yi daazichi zaa tin ya, ka yihi ya zuliya shɛb’ ni zaa mini luɣ’ shɛŋa zaa n ni daa kari ya tahi la n-zaŋ ya labisi n ni daa chɛ ka bɛ gbahi ya yi luɣ’ shɛŋa ni chaŋ la na.” Yawɛ n-yɛli lala maa.

¹⁵Dama yi yɛliya, “Yawɛ yihi anabinim’ ti ti Babilɔn.”

¹⁶Dama Yawɛ ni yɛli shɛm zaŋ chaŋ na’ so ŋun ʒi Dauda nam ʒiishee la polo mini ninvuɣ’ shɛb’ bɛn zaa be tiŋ’ puuni ka nyɛ yi dɔɣiriba shɛb’ bɛ ni daa bi gbahi pahi yi zuɣu chaŋ la polo m-bɔŋɔ:

¹⁷Yawɛ ŋun nyɛ Tɔbbihi Naa ŋɔ yɛliya, ‘N ni chɛ ka tɔbu mini kum ni alɔbo lu bɛ zuɣu, ka n chɛ ka bɛ be kaman fiig tiwal’ poma din bie pam ka so ku tooi di li la.

¹⁸N ni ti zaŋ tɔbu mini kum ni alɔbo doli ba, ka chɛ ka bɛ yɛla gbaai dunia ŋɔ nanim’ zaa dabiɛm. Ka bɛ ti leei niriba ni yɛn turi shɛba, ka n chɛ ka bɛ yɛla mali niriba dabiɛm ka bɛ je ba. Ka n yi ti kari ba tahi luɣ’ shɛlikam, zuliya kam ni mali ba ansarisi,

¹⁹bɛ ni daa zaɣisi n yɛligu wumbu la zuɣu. Yawɛ n-yɛli lala maa. N daa kul timdila n daba bɛn nyɛ anabinim’ la bɛ sani waawaayili, amaa ka yi gba zaɣisi wumbu. Yawɛ n-yɛli lala maa.’

²⁰Amaa pumpɔŋɔ yinima ninvuɣ’ shɛb’ zaa n ni daa chɛ ka bɛ gbahi Jɛrusalɛm n-kuli Babilɔn la wummiya Yawɛ ni yɛli shɛm:

²¹“Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm zaŋ chaŋ Kolaya bia Ɛhab mini Maasɛya bia Zɛdɛkia bɛn zaŋ n yuli tɔɣisiri ya ʒiri anabitali yɛtɔɣa la polo m-bɔŋɔ: ‘N ni zaŋ ba niŋ Babilɔn Naa Nɛbukadnɛza nuu ni ka o ku ba yi ninni.’

²²Ka bɛ ni daa gbahi ninvuɣ’ shɛb’ zaa Juda n-zaŋ ba kuli Babilɔn la yi ti yɛn yɛli noli ti so, bɛ ni yɛli, ‘Yawɛ niŋm’ a kaman Babilɔn Naa ni daa chɛ ka bɛ zaŋ Zɛdɛkia mini Ɛhab she buɣim ni shɛm la.

²³Dama bɛ daa tum tuumbiɛri pam Izraɛl tiŋgbɔŋ ni, ka tum zina ni bɛ tab’ paɣiba, ka lan zaŋ n yuli tɔɣisi ʒiri yɛtɔɣa, ka di pa n ni wuhi ba shɛm. Mani n-nyɛ ŋun mi dimbɔŋɔ, ka lan di li shɛhira.’ ” Yawɛ n-yɛli lala maa.

²⁴Yɛlim’ Shɛmaya ŋun nyɛ Nɛhilam nir’ la,

²⁵Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: “A zaŋla amaŋmaŋ’ yuli sabi gbaŋ ti ninvuɣ’ shɛb’ bɛn zaa be Jɛrusalɛm mini maligumaana Zɛfania ŋun nyɛ Maasɛya bia la ni maligumaaniba zaa n-yɛra,

²⁶“Yawɛ maŋmaŋ’ m-piig’ a leei maligumaana n-zali maligumaana Jɛhɔiada zaashee ni a guli Yawɛ jɛmbu duu, ka yinyaa yi zaŋ omaŋ’ leeg’ a anabi, yi n-gbaam’ o n-zaŋ zoligo ga o, ka zaŋ baŋ yɛl’ o nyiŋgol’ ni.

²⁷Dinzuɣu pumpɔŋɔ bɔ n-niŋ ka a bi kpahi Jɛrimia ŋun nyɛ Anatɔt nira, ka zaŋ omaŋ’ leeg’ anabi yi sani la zuɣu ni?

²⁸Dama o shiri timla Babilɔn na ti yɛli ti, ‘Di ni yuui pam. Mɛmiya yiya m-be di ni, ka kɔnya puri n-diri di bindira.’ ”

²⁹Ka maligumaana Zɛfania daa karim gbaŋ maa ka anabi Jɛrimia wum.

³⁰Di saha ka Yawɛ daa yɛli Jɛrimia,

³¹“Timmi bɛ ni gbahi ninvuɣ’ shɛb’ zaa chaŋ maa sani ti yɛli ba, ‘Yawɛ ni yɛli shɛm zaŋ chaŋ Shɛmaya ŋun nyɛ Nɛhilam nir’ la polo m-bɔŋɔ: “Shɛmaya ni tɔɣisi ya anabitali yɛtɔɣa n-chɛ ka yi niŋ ʒiri yɛda ka di pala mani n-tim o na la zuɣu,

³²man’ Yawɛ ni yɛli shɛm m-bɔŋɔ: N yɛn darigila Shɛmaya ŋun nyɛ Nɛhilam nir’ maa min’ o zuliya tibili. O ninvuɣ’ so ti ku lan be niriba ŋɔ ni ŋun ni ti nya zaɣ’ viɛl’ shɛli n ni yɛn niŋ n niriba ŋɔ, dama o tɔɣisi duŋtaabo yɛtɔɣa jɛndi man’ Yawɛ.” Yawɛ n-yɛli lala maa.