Read Dagbani Jɛrimia 3 Bible Online

Jɛrimia 3 - Dagbani bible

Jɛrimia 3

¹Doo yi yih’ o paɣa, ka paɣ’ maa yi o yiŋa n-chaŋ ti kuli do’ so, o ni tooi lan biɛhi o paɣ’ maa naba? Di tiŋgbani maa ku saɣim pam? Yi tum zina yi mamanim’ pam sani, ka lan yɛn labi n sanna? Yawɛ n-yɛli lala maa.

²Lihimiya daboya zuɣusaa nya, luɣ’ dini ka yi mini so lee bi dɔni? Yi daa ʒila soya naŋgban’ kpansi n-guhiri yi mamanima kaman Laribu m-be tiŋgban’ nɛli ni la. Yi zaŋ zina niŋbu mini yi ninvuɣ’ biɛtali n-ta tiŋgbani maa daɣiri.

³Dinzuɣu ka sanzali zani, ka siɣili saa bi lan mira. Amaa ka yi nini kul moola zina niŋbu zuɣu, ka vi bi mali ya.

⁴Pa pumpɔŋɔ ka yi boli ma, “Ti ba, a nyɛla ŋun daa yuri ti ti bilim ni.

⁵A ni saɣi je suli niŋ ti sahakam? A ni yiɣis’ a suhu bahi ti zuɣu sahakam?” Yi ni yɛli shɛm m-bala, amaa yi tum tuumbiɛ’ shɛlikam yin’ ni tooi tum.

⁶ Naa Jɔsia ʒiɛman’ ni ka Yawɛ daa yɛli ma, “A nya Izraɛlnim’ bɛn ka ba maa ni daa niŋ shɛm, bɛ ni daa chaŋ daboli kam din du zuɣu mini ti’ mahali kam gbini ti niŋ zina shɛm bebɔ?

⁷N daa tɛhiya ni bɛ ni daa niŋ dimbɔŋɔnim’ maa zaa nyaaŋa bɛ ni labi n sanna, amaa ka bɛ daa bi labina, ka bɛ mabihi Judanim’ bɛn nyɛ ʒirinim’ maa daa nya li.

⁸Bɛ daa nya n ni zaɣisi Izraɛlnim’ ka kari ba bahi bɛ ni daa bi ʒe ma yim ka niŋ zina shɛŋa zaa la zuɣu, amaa ka dabiɛm daa bi gbahi bɛ mabihi Judanim’ bɛn nyɛ ʒirinim’ maa. Amaa ka bɛn’ gba daa chaŋ ti niŋ zina.

⁹Dama bɛ zina niŋbu maa daa bi muɣisi ba. Bɛ daa saɣim tiŋgbani maa, ka niŋ zina kuɣili kam mini tia kam gbini.

¹⁰Amaa dimbɔŋɔnim’ maa zaa yoli, bɛ mabihi Judanim’ bɛn nyɛ bɛ ʒiri mabihi maa daa bi labi n sanna ni bɛ suhuri zaa, amaa ka naɣ’ ŋmarila ʒiri.” Yawɛ n-yɛli lala maa.

¹¹Di saha ka Yawɛ daa yɛli ma, Izraɛlnim’ bɛn bi ʒe ma yim maa wuhiya ni bɛ taali bi paai Judanim’ bɛn nyɛ ʒirinim’ maa taali.

¹²Cham’ nuzaa polo ti moli yɛligu ŋɔ n-yɛli, “Izraɛlnim’ bɛn bi ʒe yim ŋɔ, labimiyana. N ku lan yiɣisi n suhu bahi yi zuɣu, dama n nyɛla nambɔzɔra. N ku je suli niŋ ya sahakam.” Yawɛ n-yɛli lala maa.

¹³“ Kul’ zanimiyala yim saɣi ni yi tum taali, ni yi daa taai duŋ zaɣisi man’ Yawɛ ŋun nyɛ yi Naawuni ŋɔ, ka zaŋ yi yurilim yaɣiri saamba sani ti’ mahili kam gbini ka bi deei n noli.” Yawɛ n-yɛli lala maa.

¹⁴Yawɛ yɛliya, “Yinim’ bi’ shɛb’ bɛn bi ʒe yim ŋɔ, labimiyana, dama mani n-sun ya. N ni yihi yi ninvuɣ’ yinoyino yi fɔntinsi ni na, ka yihi yi niriba ayiyi yi daŋ kam ni na n-zaŋ ya ka Ziɔn na.

¹⁵N ni pii mmaŋmaŋ’ nini ni tiɣi zuɣulaan’ shɛb’ tin ya, ka bɛ zaŋ yɛm mini baŋsim sun ya.”

¹⁶Yawɛ yɛliya, “Yi yi ti nabi n-yɛligi pali tiŋgbɔŋ maa, di saha bɛ ti ku lan yɛra, ‘Yawɛ Daalikauli Adaka.’ Di yɛla ti ku lan be bɛ tɛha ni bee ka bɛ ti teei di yɛla. Bɛ ti ku lan zaŋ di yɛla muɣisi bɛmaŋa bee nti lan mali shɛli yaha.

¹⁷Di saha bɛ ni ti booni Jɛrusalɛm la Yawɛ nam ʒiishee, ka zuliya’ kam zaa ti laɣim ka Yawɛ tooni na Jɛrusalɛm maa, ka bɛ ti ku lan niŋ tipawumli n-doli bɛ maŋmaŋ’ suhuyubu din nyɛ zaɣ’ biɛɣu la.

¹⁸Di dabisa maa ni, Judanim’ ni ti chaŋ ti pahi Izraɛlnim’ zuɣu ka bɛ laɣim taba n-yi nuzaa polo tiŋgban’ ni n-ka n ni daa zaŋ tiŋgban’ shɛli ti yi yaannim’ ni bɛ su li la ni na.”

¹⁹N daa tɛhila n ni yɛn zaŋ ya kpɛhi m bihi ni shɛm, ka tin ya tiŋgban’ viɛlli. Tiŋgban’ shɛli din viɛli gari dunia tiŋgbana zaa. Ka n daa tɛhi ni yi ni boli ma yi ba ka ku zo ka chɛ ma dolibu.

²⁰Amaa kaman paɣ’ so ŋun bi ʒe o yidan’ yim ni zo ka chɛ o shɛm, lala ka yinim’ lzraɛlnim’ gba bi ʒe ma yim. Yawɛ n-yɛli lala maa.

²¹Ti wum vuri zoya zuɣu. Di nyɛla Izraɛlnim’ fabila kuhigu bɛ ni tum tuumbiɛ’ shɛŋa zuɣu. Bɛ tamla Yawɛ ŋun nyɛ bɛ Naawuni ŋɔ yɛla.

²²Yinim’ bɛn bi ʒe yim ŋɔ, labimiyana. N ni yihi ya yi bi ʒiɛyimtali maa ni. Ti ka a sanna, dama nyini n-nyɛ Yawɛ ŋun nyɛ ti Naawuni.

²³Yɛlimaŋli, daboya mini zoya zuɣu buɣa jɛmbu nyɛla yɔhiŋ. Yɛlimaŋli, Izraɛlnim’ tiliginsim’ bela Yawɛ ŋun nyɛ ti Naawuni ŋɔ sani.

²⁴Amaa vi tuma maa nyɛla din di ti yaannim’ ni daa tum tuma bo binshɛlikam zaa zali ti ti bilim ni hal ni zuŋɔ la, dina n-nyɛ bɛ biŋkɔbbaligu mini bɛ niɣi ni bɛ bidibisi ni bɛ bipuɣinsi.

²⁵Chɛliya ka ti dɔni ti vi zuɣu, ka zaŋ ti filiŋ pili timaŋa. Dama ti mini ti yaannim’ tum alahichi Yawɛ ŋun nyɛ ti Naawuni ŋɔ sani ti bilim ni hal ni zuŋɔ, ka bi saɣi doli Yawɛ ŋun nyɛ ti Naawuni maa noli.