Read Dagbani Jɛrimia 30 Bible Online

Jɛrimia 30 - Dagbani bible

Jɛrimia 30

¹Yawɛ ni daa yɛli Jɛrimia yɛtɔɣ’ shɛŋa m-bɔŋɔ:

²Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: “Sabimi n ni yɛl’ a yɛtɔɣ’ shɛŋa maa zaa niŋ litaafi ni.”

³Dama Yawɛ yɛliya, “Biɛhiŋ kani, saha kanna ka n ni ti labisi n niriba Izraɛlnim’ mini Judanim’ daazichi ti ba, ka zaŋ ba labisi n ni daa zaŋ tiŋgbɔn’ shɛli ti bɛ yaannim’ la ni na ka bɛ ti deei li su.”

⁴Yawɛ ni yɛli shɛm zaŋ chaŋ Judanim’ mini Izraɛlnim’ polo m-bɔŋɔ:

⁵Yawɛ yɛliya, “Ti wumla dabiɛm mini abirima lubu kuhigu, pa suhudoo kuhigu.

⁶Bɔhimiya pumpɔŋɔ n-nya doo ni tooi dɔɣi bia? Ka bɔzuɣu ka n nya ka doo kam zaŋ o nuhi tab’ o saɣiŋga ni kaman paɣa n-wolisiri la? Bɔ n-niŋ ka sokam saɣim o ninni?

⁷Mbaye, dabisili maa ni ti nyɛla dabisi’ titali, ka di kpee kani. Di nyɛla Yaakubu suhusaɣiŋgu saha, amaa bɛ ni tilig’ o di ni.”

⁸Yawɛ ŋun nyɛ Tɔbbihi Naa ŋɔ yɛliya, “Dindali maa n ni kabi naɣikɔra dapua o nyiŋgoli zuɣu bahi, ka kabisi o bandi maa, ka tinzunnim’ ku lan zaŋ o leei bɛ dabili.

⁹Amaa bɛ ni ti jɛmdi Yawɛ ŋun nyɛ bɛ Naawuni ŋɔ mini Dauda ŋun nyɛ bɛ na’ so n ni yɛn pii ti ba la.”

¹⁰Yawɛ yɛliya, “Amaa nyini n dabili Yaakubu, di zɔri dabiɛm. Izraɛl, di chɛ ka dabiɛm mal’ a, dama n yɛn tiligila a min’ a bi’ shɛb’ bɛ ni gbahi daba kuli tiŋgbɔn’ shɛli din be katiŋ’ maa ni. Yaakubu zuliya ni ti labina nti beni ni suhudoo, ka so ku lan kpɛhi ba dabiɛm yaha.

¹¹ Dama m be yi sani ni n tiligi ya. Man’ Yawɛ n-yɛli lala maa. N ni ku n-naai n ni kari ya tahi zuliya shɛb’ sani maa zaa balibu. Amaa yinim’ bɛna, n ku naai yi balibu. N kul ni darigila yi tibili kaman di ni simdi shɛm. N kul ku chɛ yi tibili darigibu.”

¹²Dama Yawɛ yɛliya, “Yi daŋ’ maa galisiya pam, di ka tibi kpaŋ.

¹³So kani ŋun ni sɔŋ ya. Tim kani din ni tibi yi daŋ’ maa. Yi ku nya tibbu.

¹⁴Yi yurinim’ zaa tam yi yɛla, bɛ baɣa lan ka yi ni; dama n ŋmɛn ya mi kaman n nyɛla yi dim’ la; n darigila yi tibili kaman dim’ so ŋun bi zɔri nambɔɣu, dama yi taali galisiya pam, ka yi daalahichi mi galisi yaɣi.

¹⁵Bɔzuɣu ka yi kuhiri pampam yi ni nya dan shɛli maa zuɣu? Yi biɛrim maa ka tibbu. Yi taali ni galisi pam, ka yi daalahichi galisi yaɣi ka n niŋ ya lala maa zuɣu.

¹⁶Dinzuɣu ŋunkam kun ya, bɛ ni ku o gba. Bɛ ni gbahi yi dimnim’ zaa daba chaŋ. Bɛnkam fa yi nɛma, bɛ ni fa bɛ gba nɛma. Ka bɛnkam zaa di yi nɛma, n ni chɛ ka bɛ di bɛ gba nɛma.

¹⁷Dama n ni tibi yi dansi maa, ka tin ya alaafee, dama bɛ lihi ya la bɛn ka so. Ziɔn ka bɛ zaŋ niŋ bɛ baɣa ka maa. Man’ Yawɛ n-yɛli lala maa.”

¹⁸Yawɛ ni yɛli shɛm m-bɔŋɔ, “N ni labisi Yaakubu zuliya azichi ti ba, ka zo bɛ ni be luɣ’ shɛŋa zaa nambɔɣu. Tiŋ’ maa ni lan me n-tam di daboli zuɣu, ka nayil’ la ti lan be di ni daa pun be luɣ’ shɛl’ la.

¹⁹Wumpaɣibo yila ni ti yiri di puuni na, ka bɛn puhiri chuɣu ni ti yɔri vuri di puuni. N ni ti chɛ ka bɛ nabi, ka ku lan pɔra. N ni chɛ ka bɛ nya jilima, ka so ku lan mali ba ansarisi.

²⁰Bɛ bihi ni ti be kaman bɛ ni daa pun be shɛm kurimbuni ha la, bɛ ʒilɛli maa ni ti nya zaa zani n sani, ka n ti darigi bɛn zaa daa nahindi ba la tibili.

²¹Bɛmaŋmaŋ’ nira n-ti yɛn nyɛ bɛ naa, bɛ naa ti yɛn yila bɛ sunsuuni na. N ni voog’ o mirina, ka o ti be n sani. Dama so ku tooi ka n sanna omaŋmaŋ’ yiko ni. Man’ Yawɛ n-yɛli lala maa.

²²Yi ni ti nyɛ n niriba, ka m mi nyɛ yi Naawuni.”

²³Nyama, Yawɛ suhuyiɣisili sanʒiɛɣu yiɣisiya, di nyɛla sanʒiɛ’ biɛɣu din ʒiɛri gariti ninvuɣ’ biɛri zuɣuri zuɣu.

²⁴Yawɛ suhuyiɣisili titali maa ku maai, faashee o niŋla o ni lo o suhu ni ni o niŋ shɛli maa. Dabisi’ shɛŋa din bahindi nyaaŋa puuni, ka yi ni baŋ dimbɔŋɔ gbinni.