Read Dagbani Jɛrimia 32 Bible Online

Jɛrimia 32 - Dagbani bible

Jɛrimia 32

¹ Juda Naa Zɛdɛkia ni daa di nam ka di ti paai yuun’ pia saha shɛli din daa nyɛ Nɛbukadnɛza nam dibu yuun’ pisaayika ni ka Yawɛ daa tɔɣisi Jɛrimia yɛtɔɣa ŋɔ.

²Di saha maa Babilɔn Naa tɔbbihi daa teei gilila Jɛrusalɛm, ka bɛ daa kpari anabi Jɛrimia niŋ guliba dundɔŋ din daa be Juda nayili la ni.

³Nimaani ka Juda Naa Zɛdɛkia daa zaŋ o kpari maa. Zɛdɛkia daa bɔh’ o mi, “Bɔzuɣu ka a tɔɣisiri anabitali yɛtɔɣa yɛra: Yawɛ yɛliya, ‘N yɛn zaŋla tiŋ’ ŋɔ niŋ Babilɔn naa nuu ni, ka o ŋme n-deei li.

⁴Juda Naa Zɛdɛkia ku yi Kalidianim’ maa nuu ni; amaa biɛhiŋ kani, bɛ ni ti gbaag’ o ti Babilɔn Naa, ka o min’ o nina pali taba, ka bɛ tɔɣisi yɛtɔɣa garigi taba.

⁵Ka o ti zaŋ Zɛdɛkia kuli Babilɔn, ka o ti be nimaani hal ka n ti lan zaŋ n zaɣa labis’ o polo. Hal yi yi tuhi Babilɔnnim’ maa, yi ku di nasara.’ Yawɛ n-yɛli lala maa.”?

⁶Jɛrimia daa yɛliya, “Yawɛ daa yɛli ma,

⁷A bapir’ Shallum bia Hanamɛl ni ka a sanna ti yɛl’ a, ‘Dam’ m puu din be Anatɔt la, dama nyini m-mali soli ni a da li.”

⁸Di nyaaŋa ka m mabia Hanamɛl daa ka n sanna guliba dundɔŋ maa ni kaman Yawɛ ni yɛli shɛm maa nti yɛli ma, “Dam’ m puu din be Anatɔt, Bɛnjamin zuliya tiŋgban’ ni la, dama nyini m-mali soli ni a da li su li, dam’ li ka di leeg’ a dini.” Di saha ka n daa baŋ ni Yawɛ yɛligu la m-bala.

⁹Ka n daa da puu din be Anatɔt maa m mabia Hanamɛl sani, ka daa kali liɣiri maa ti o. Di daa nyɛla anzinfa laɣibaligu pinaayopɔin.

¹⁰Ka n daa dihi n nuu di gbana zuɣu, ka zaŋ n dalinli dihi tabili li, ka chɛ ka shɛhiranim’ kana ka n ti zahim liɣiri maa sania zuɣu.

¹¹Di nyaaŋa ka n daa zaŋ n ni da li ka deei gban’ shɛli ka n dalinli dihi tabili li, ka yɛtɔɣ’ shɛŋa mini zaligu shɛŋa ti ni daa zali be di ni mini di gban shɛli din pahi di zuɣu la

¹²n-ti Nɛria bia Baruk ŋun daa nyɛ Masɛya yaaŋa la, m mabia Hanamɛl mini shɛhiranim’ bɛn daa dihi bɛ nuhi dabu gbana maa zuɣu la ni Judanim’ zaa bɛn daa be guliba dundɔŋ maa ni ninni.

¹³Ka n daa yɛli Baruk bɛ nini maa ni,

¹⁴“Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: Zaŋmi gbana ŋɔ, ti ni dihi ti dalinli tabili dabu gban shɛli zuɣu ŋɔ mini gban shɛli din pahi ŋɔ nti niŋ yaɣiri duɣu ni ka di ku saɣim yoma.

¹⁵Dama Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ yɛliya, ‘Bɛ ni ti lan da yiya mini puri ni wain tihi puri tiŋgbɔŋ ŋɔ ni yaha.’ ”

¹⁶N ni daa zaŋ dabu gbaŋ maa ti Nɛria bia Baruk maa nyaaŋa, ka n daa suhi Yawɛ yɛra,

¹⁷Mbaye, Yawɛ ŋun nyɛ Naawuni ŋɔ, nyini n-daa teeg’ a nuu din mali yiko pam nam zuɣusaa mini dunia. Binshɛli kani din kpɛm’ nyaŋ a.

¹⁸Nyini n-wuhiri niriba tusatusa a yurilim din bi taɣira, amaa ka lee darigiri bihi tibili bɛ laamba taali zuɣu. Nyini Naawuni ŋun galisi, ka mali yiko, ka a yuli booni Yawɛ ŋun nyɛ Tɔbbihi Naa ŋɔ,

¹⁹a nyɛla ŋun saɣisiri niriba viɛnyɛliŋga, ka tumdi tuun’ kara. A nyari ninsal’ kam biɛhigu ni nyɛ shɛm, ka tiri bɛ zaa laara kaman bɛ biɛhigu ni nyɛ shɛm ni bɛ tuma ni simdi shɛm.

²⁰Nyini n-daa wuhi shihira mini alahiziba tuma Ijipti tiŋgbɔŋ ni, ka na kul wuhiri li hal ni zuŋɔ dabisili ŋɔ Izraɛl tiŋgbɔŋ ni mini daadamnim’ zaa sani, ka di zuɣu chɛ ka a zali yuli hal ni zuŋɔ dabisili ŋɔ.

²¹Nyini n-daa teeg’ a nuu din mali yiko n-tum shihira mini alahiziba tuma din mali dabiɛm n-yih’ a niriba Ijipti tiŋgbɔŋ ni na

²²nti zaŋ tiŋgbɔŋ ŋɔ ti ba, a ni daa lo bɛ yaannim’ alikauli ni a ni zaŋ tiŋgban’ shɛli din mali atam mini anfaani ti ba la.

²³Ka bɛ daa kpe di ni deei li su. Amaa bɛ daa bi deeg’ a noli bee n-dol’ a zaligunima. Bɛ daa bi niŋ a ni yɛli ba ni bɛ niŋ shɛl’ la. Dinzuɣu ka a chɛ ka zaɣ’ biɛɣu ŋɔ zaa paai ba maa.

²⁴Nyama, bɛ kahi kuɣa duhi n-teei gili tiŋ’ maa ni bɛ ŋme n-deei li. Ka tɔb’ maa mini kum ni alɔbo zuɣu chɛ ka bɛ zaŋ tiŋ’ maa niŋ Kalidianim’ bɛn tuhiri ni bɛ deei li maa nuu ni. A ni daa yɛli shɛm la n-niŋ pali, ka amaŋmaŋ’ dii nya li maa.

²⁵Amaa nyini Yawɛ ŋun nyɛ Naawuni ŋɔ daa yɛli ma, “Zaŋmi liɣiri da puu maa ka bo shɛhiranima hal bɛ ni kul zaŋ tiŋ’ maa niŋ Kalidianim’ nuu ni maa zaa yoli.”

²⁶Ka Yawɛ daa yɛli Jɛrimia,

²⁷“Nyama, man’ Yawɛ n-nyɛ ninsalinim’ zaa Naawuni, ka binshɛli m-beni n-kpɛm’ nyaŋ ma?”

²⁸ Dinzuɣu man’ Yawɛ ni yɛli shɛm m-bɔŋɔ: “N yɛn zaŋla tiŋ’ ŋɔ niŋ Kalidianim’ mini Babilɔn Naa Nɛbukadnɛza nuu ni, ka o ŋme n-dee’ li.

²⁹Kalidianim’ bɛn tuhiri tiŋ’ ŋɔ maa ni ti kana ti niŋ buɣim dabi li n-nyo li tabili bɛ ni daa tuɣindi tulaale zim tiri Baal, ka boori binnyura bahiri buɣa yiya shɛŋa mɔpila zuɣu n-chɛ ka n suhu yiɣisi la.

³⁰Dama Izraɛlnim’ mini Judanim’ na ʒi n-tum shɛli n-naɣi pahila tuumbiɛri ka bɛ tumdi n sani bɛ bilim ni hal ni pɔŋɔ. Izraɛlnim’ na ʒi n-tum shɛli n-naɣi pahila bɛ zaŋla bɛ nuhi tumdi tuun’ shɛŋa din chɛ ka n suhu yiɣisira. Man’ Yawɛ n-yɛli lala maa.

³¹Tiŋ’ ŋɔ nim’ kul kuri ma la suli ka chɛ ka n suhu yiɣisira saha shɛli bɛ ni daa me li hal ni zuŋɔ, dinzuɣu n ni wurim li;

³²dama Izraɛlnim’ mini Judanima ni bɛ nanim’ ni bɛ kpamba ni bɛ maligumaaniba ni bɛ daanabinim’ tum zaɣ’ biɛɣu n-chɛ ka n suhu yiɣisi.

³³Bɛ lɛbila bɛ nyaansi biri ma ka pa bɛ tooni. Hal n ni daa kul wuhiri ba sahakam maa zaa yoli, bɛ zaɣisiya ni bɛ ku wum wuhibu ka deei saɣisigu.

³⁴ Bɛ daa zaŋla binshɛŋa din niŋbu chihira n-zali n jɛmbu duu n-ta li daɣiri.

³⁵ Bɛ daa mɛla Baal jɛmbu shee zali Hinnom Bidibisi Vinvamli ni ni bɛ zaŋdi bɛ bidibisi mini bɛ bipuɣinsi maani Molɛk, hal n ni daa kul bi zali ba ni bɛ tum li, ka di mi tɛha daa bi ka n suhu ni na ni bɛ ni tum din chihiri ŋɔ n-kpɛhi Judanim’ alahichi ni la zaa yoli.

³⁶Dinzuɣu pumpɔŋɔ man’ Yawɛ ŋun nyɛ Izraɛlnim’ Naawuni ŋɔ ni yɛli shɛm zaŋ chaŋ tin’ shɛli yi ni yɛra, “Tɔbu mini kum ni alɔbo ŋɔ zuɣu chɛ ka bɛ zaŋ li niŋ Babilɔn naa nuu ni la’ polo m-bɔŋɔ:

³⁷Nyamiya, n ni daa kari ba bahi tiŋgbɔn’ shɛŋa ni zaa ni sujee mini suhuyiɣisili pam la, n ni yihi ba nimaani n-zaŋ ba labisi kpe na nti chɛ ka bɛ ʒiya ni alaafee.

³⁸Ka bɛ ti nyɛ n niriba, ka m mi nyɛ bɛ Naawuni.

³⁹N ni ti chɛ ka bɛ mali suhu yini, ka chɛ ka bɛ doli so’ yini din ni chɛ ka bɛ luri ma sizuura sahakam bɛmaŋmaŋ’ zaɣ’ viɛlli zuɣu mini bɛ bihi bɛn yɛn doli bɛ nyaaŋa gba zaɣ’ viɛlli zuɣu.

⁴⁰N ni lo ba alikauli din ka bahigu din ni chɛ ka n ku lan chɛ ba zaɣ’ viɛlli niŋbu. N ni ti chɛ ka bɛ luri ma sizuura bɛ suhuri ni din ni chɛ ka bɛ ku lan ŋmaligi ka chɛ ma.

⁴¹N ni ti niŋdi ba din viɛla ni suhupiɛlli, ka zaŋ ba ʒili tiŋgbɔŋ ŋɔ ni ni ʒiɛyimtali ni n suhu zaa ni n shia zaa.”

⁴²Dama Yawɛ yɛliya, “Kaman n ni daa kul chɛ ka zaɣ’ biɛ’ titaŋa paai niriba ŋɔ shɛm, lala ka n lan yɛn chɛ ka n ni lo ba zaɣ’ viɛl’ shɛŋa zaa alikauli pumpɔŋɔ ŋɔ paai ba.

⁴³Bɛ ni ti lan da puri tiŋgbɔn’ shɛli bɛ ni yɛra, ‘Di leela dabari, ka ninsalinim’ bee biŋkɔbiri lan ka di ni, bɛ zaŋ li niŋla Kalidianim’ nuu ni la.’

⁴⁴Bɛ ni ti zaŋ liɣiri da puri, ka dihi bɛ nuhi di gbana zuɣu, ka zaŋ bɛ ni mali binshɛli dalindi binyara, ka bɛ di shɛhira Bɛnjamin zuliya tiŋgban’ ni mini tin’ shɛŋa din gili Jɛrusalɛm ni Juda fɔntinsi ni ni zoya ni fɔntinsi ni ni Shɛfɛla fɔntinsi ni ni Nɛgɛb fɔntinsi ni, dama n ni labisi bɛ daazichi ti ba. Yawɛ n-yɛli lala maa.”