Read Dagbani Jɛrimia 39 Bible Online

Jɛrimia 39 - Dagbani bible

Jɛrimia 39

¹Juda Naa Zɛdɛkia nam dibu yuma awɛi ni, gol’ so ŋun pahiri chir’ pia puuni ka Babilɔn naa Nɛbukadnɛza min’ o tɔbbihi zaa daa kana ti liri Jɛrusalɛm n-teei gil’ li.

²Zɛdɛkia nam dibu yuun’ piniyini, gol’ so ŋun pahir’ anahi daba awɛi dali ka bɛ daa kabi Jɛrusalɛm goondaa luhi.

³Bɛ ni daa ŋme n-deei Jɛrusalɛm, ka Babilɔn naa kpambaliba zaa daa kana ti ʒini sunsuuni dunɔdal’ la gbini, bɛna n-daa nyɛ Nɛrigalisharɛza mini Samgarinɛbo ni Sarisɛkim ŋun daa nyɛ kpambal’ kpɛm’ la, ni Nɛrigalisharɛza so ŋun gba daa nyɛ kpambal’ kpɛm la, ni Babilɔn kpamba zaa bɛn pahi.

⁴Juda Naa Zɛdɛkia min’ o tɔbbihi zaa ni daa nya ba, ka bɛ zo n-kpe naa ʒiɛvari puu ni nti yi dunɔdali shɛli din daa be goma ayi sunsuuni la n-zaŋ bɛ zuɣuri ʒi Araba polo.

⁵Amaa ka Babilɔn tɔbbihi daa kari doli ba nti gbaai Zɛdɛkia Jɛriko bɔpiɛligu ni n-zaŋ o tahi ti ti Babilɔn Naa Nɛbukadnɛza Ribila din daa be Hamat tiŋgbɔŋ ni la. Ka o daa kar’ o saria nimaani.

⁶Ka Babilɔn naa daa ku Zɛdɛkia bidibisi o ninni Ribila maa; Babilɔn naa maa daa lan ku Juda kpambaliba zaa.

⁷Ka o daa chɛ ka bɛ fɔɣi Zɛdɛkia nina, ka ba o bandi ni bɛ zaŋ o kuli Babilɔn.

⁸Ka Babilɔnnim’ daa nyo nayili mini niriba yiya buɣim, ka daai Jɛrusalɛm goma luhi.

⁹Di nyaaŋa ka Nɛbuzaradan ŋun daa nyɛ yiliguliba sapashin’ kpɛm’ la daa zaŋ ninvuɣ’ shɛb’ bɛn daa kpalim tiŋ’ maa puuni ka nyɛ bɛn daa zo n-chaŋ o sani mini bɛn daa kpalim tiŋ’ maa ni la kuli Babilɔn.

¹⁰Nɛbuzaradan ŋun daa nyɛ yiliguliba sapashin’ kpɛm’ maa daa chɛla ninvuɣ’ shɛb’ bɛn nyɛ nandaamba ka ka binshɛli niŋ tiŋgbɔŋ maa ni. Di saha maa o daa ti ba wain tihi puri mini pu’ shɛŋa pahi.

¹¹Ka Babilɔn Naa Nɛbukadnɛza daa bahi Nɛbuzaradan ŋun daa nyɛ yiliguliba sapashin’ kpɛm’ maa noli zaŋ chaŋ Jɛrimia polo yɛli,

¹²“Zaŋm’ o ti lih’ o viɛnyɛliŋga, ka miri ka a niŋ o zaɣ’ biɛɣu, amaa niŋm’ o ni yɛl’ a ni a niŋmi shɛli.”

¹³Lala zuɣu ka Nɛbuzaradan ŋun daa nyɛ yiliguliba sapashin’ kpɛm’ maa mini Nɛbushaziban ŋun daa nyɛ kpambal’ kpem’ la ni Nɛrigalisharɛza ni Babilɔn naa sapashin’ kpamba zaa

¹⁴daa tim ka bɛ chaŋ yiliguliba dundɔŋ ni ti zaŋ Jɛrimia na; ka bɛ daa zaŋ o niŋ Ahikam bia Gɛdalia ŋun daa nyɛ Shafan yaaŋa la nuu ni ni o zaŋ o kuli. Dimbɔŋɔ zuɣu daa chɛ ka o be omaŋmaŋ’ niriba sani.

¹⁵Saha shɛli Jɛrimia ni daa be yiliguliba dundɔŋ la ni ka Yawɛ daa yɛl’ o,

¹⁶“Cham’ ti yɛli Ɛbɛdimɛlɛk ŋun nyɛ Itiɔpia nir’ la ni Yawɛ ŋun nyɛ Tɔbbihi Naa ka nyɛ Izraɛlnim’ Naawuni ŋɔ ni yɛli shɛm m-bɔŋɔ: ‘N ni chɛ ka n ni daa yɛli yɛtɔɣ’ shɛŋa jɛndi tiŋ’ ŋɔ la niŋ pali. Di ti yɛn nyɛla zaɣ’ biɛɣu, ka pa zaɣ’ viɛlli. Di ni ti niŋ pali a ninni dindali maa.’ ”

¹⁷Amaa Yawɛ yɛliya, “Dindali maa n ni tilig’ a, ka bɛ ku zaŋ a niŋ a ni zɔri ninvuɣ’ shɛb’ la nuu ni.

¹⁸Dama n shiri ni tilig’ a, ka bɛ ku zaŋ takɔbi ku a, amaa a ni zaŋ a nyɛvili zo n-tiligi, a ni niŋ ma naani la zuɣu. Yawɛ n-yɛli lala maa.”