Read Dagbani Jɛrimia 4 Bible Online

Jɛrimia 4 - Dagbani bible

Jɛrimia 4

¹Yawɛ yɛliya, “Izraɛlnima, yi yi ni labi n sanna, yi yi chɛ din chihira n sani maa tumbu, ka chɛnya ʒiɛhi gili,

²yi yi ni po Yawɛ ŋun be ŋɔ ni yi ni gbibi yɛlimaŋli, ka doli zaligu ni wuntitali, dindina o ni niŋ alibarika niŋ zuliya shɛb’ ni yi zuɣu, ka bɛ ti mal’ o nyuri bara.”

³ Dama Yawɛ ni yɛli Judanim’ mini Jɛrusalɛmnim’ shɛm m-bɔŋɔ: “Jarimiya yi kɔbiti din bi jari ŋɔ, ka miriya ka yi biriti yi bimbira niŋdi gɔhi ni.

⁴Malimiya yimaŋ’ ti Yawɛ. Yinim’ Judanim’ mini Jɛrusalɛmnima, gunimiya yi suhuri ni, di yi pa lala n suhu ni yiɣisi bahi yi zuɣu kaman buɣim la n-diri ka so ku tooi kpihi li, yi ni tum tuumbiɛ’ shɛŋa maa zuɣu.”

⁵Molimi molo Juda mini Jɛrusalɛm yɛli: Piɛbimi kikaa gili tiŋgbani maa ni, ka tahiri pampam yɛra, “Laɣimmiya taba ka ti chaŋ ti kpe bɛ ni me goma gili fɔntin’ shɛŋa ni.”

⁶Tirimiya wuhi soli din kuni Ziɔn. Zomiya yomyom tiligi, ka di niŋya zinchili, dama n yɛn chɛmi ka zaɣ’ biɛɣu yi nuzaa polo na. Ka di ni ti di niriba pam.

⁷Di ni ti ŋmanila gbuɣinli n-yiɣisi o sɔɣisili shee yina; ŋun yɛn ku zuliya pam yi palo. O yi o biɛhigu shee na ni o bahi yi tiŋgbani yoli. Yi fɔntinsi ni wurim, ka so ku lan be di ni.

⁸Dimbɔŋɔ zuɣu somiya buri, ka kum ka fabili, “Yawɛ suhuyiɣisili titali maa na bi miligi ka chɛ ti.”

⁹Yawɛ yɛliya, “Dindali maa, naa mini kpambaliba ti ku lan mali suhukpeeni. Dabiɛm ni ti gbahi maligumaaniba, ka di niŋ anabinim’ alahiziba.”

¹⁰Di saha ka n daa yɛli, “Mbaye, Yawɛ ŋun nyɛ ti Duuma ŋɔ, a daa yɔhim Jɛrusalɛmnim’ pam n-yɛli, ‘Shɛli ti ku niŋ ya,’ amaa ka takɔbi ti be bɛ kukoya ni.”

¹¹Di saha bɛ ni ti yɛli Jɛrusalɛmnima, “Pɔhim tulli ni ti yi n sani daboya zuɣusaa n-ʒe n-yi tiŋgban’ nɛli ni na nti ʒe n-kpa n niriba bɛn yɛla mali nambɔɣu ŋɔ polo, di pala pɔhim shɛli din ni yɛli binyara bee din ni pɔbisi binyara saɣiri chaŋ.

¹²Di ni ti nyɛla pɔhim shɛli din mali kpiɔŋ gari lala. Mani n-kari ba saria pumpɔŋɔ maa.”

¹³Nyama, o kanimina kaman sagbana la, o chɛchɛbunsi ŋmanila pɔhimʒiɛpiliŋga, ka o yuri zɔri yomyom gari tɔrili. Mbusim be ti zuɣu, dama ti bahi yoli.

¹⁴Jɛrusalɛmnima, yihimiya ninvuɣ’ biɛtali yi suhuri ni ka tiligi. Nia biɛri maa kul yɛn bela yi ni sahakam?

¹⁵Dama molo yi Dan tiŋgbani polo na n-yɛra ni alɔbo yi Ifriim tiŋgbani zoli polo na.

¹⁶Yɛlim’ niriba, “Bɛna m-bɔŋɔ!” Molimi molo jɛndi Jɛrusalɛmnim’ yɛli, “ Bɛn yɛn teei gili ya yi tiŋgban’ shɛli ni katiŋ’ kanna. Bɛ tahirila Juda tinsinim’ zuɣu.

¹⁷Bɛ teei gili ba kaman puguliba ni niŋdi shɛm la, bɛ ni taai duŋ zaɣisi ma la zuɣu.” Yawɛ n-yɛli lala maa.

¹⁸Yi biɛhigu mini yi tuma m-bo yɛlli ŋɔ tin ya. Di mali ya. Di biɛri pam! Di nyooi yi suhuri.

¹⁹N niŋgbunzabili ŋɔ, n niŋgbunzabili ŋɔ! Biɛrim mali ma, ka n lɛbiri ginda. Mbaye, n suhu ni, n suhu kul tɔrila pampam. N ku tooi shini, dama n wumla kikahi kumsi, di nyɛla tɔbuchiriga.

²⁰Alɔbɔnima n-doli taba, tiŋgbani maa zaa bahila yoli. Yim ka bɛ daa ti dii saɣim n suɣa, ka chahi m pateesanima.

²¹Ka daɣila n kul yɛn lihirila tɔbu tuhibu, ka wumdi kikahi kumsi sahakam?

²²Dama n niriba maa nyɛla jɛra; bɛ bi mi ma. Bɛ nyɛla bi’ jɛra, bɛ bi baŋdi binyɛra gbinni. Bɛ mali yɛm din tumdi tuumbiɛri, amaa ka lee bi mi tuun’ viɛla tumbu.

²³N daa lihi dunia ni n-nya ka di bahila yoli, ka binshɛli lan ka di ni, ka n lihi zuɣusaa, ka neesim kani.

²⁴N daa lihi zoya zuɣu n-nya ka di sɔhirimi, ka daboya zaa daa chani tooni ka labiri nyaaŋa.

²⁵N daa lihiya n-nya ka so kani, ka noonsi zaa yiɣi.

²⁶N daa lihiya n-nya ka tiŋgban’ shɛli din daa mali atam pam la leela tiŋgban’ nɛli, ka di fɔntinsi la zaa wurim do Yawɛ tooni, o suhuyiɣisili din galisi zuɣu.

²⁷Yawɛ Yɛliya, “Tiŋgbɔŋ zaa ni ti kpalim dabari, amaa n ti ku saɣim di zaa.

²⁸Dimbɔŋɔ zuɣu, tiŋgban’ ni ti fabili, ka zuɣusaa ti zibigi. Mani n-yɛli lala, m mi pun lola di nia. N ku chɛ n ni lo ni n niŋ shɛli bee n-labi nyaaŋa.

²⁹Wɔribariba mini peentɔriba vuri ni ti chɛ ka fɔŋ kam niriba zo, bɛ ni ti zo n-kpe mɔɣu ni, ka shɛb’ du tampima. Bɛ ni ti zo ka chɛ fɔndi maa zaa, ka so ku lan be di ni.

³⁰Ka nyin’ ŋun zani dabari ŋɔ, bɔzuɣu ka a zaŋ situr’ ʒiɛkpain niŋ amaŋa? Bɔzuɣu ka a zaŋ salima nɛma niŋ amaŋa, ka bali chilo? A kul dihirila amaŋ’ nachiinsi yoli, dama a mamanim’ lihi ʒiɛm a, ka bɔri ni bɛ ku a.

³¹Dama n wumla kuhigu kaman paɣa n-wolisiri ni o dɔɣi la. Ka di biɛrim maa ŋmanila paɣ’ ni yɛn tuui dɔɣi la. Ziɔn bipuɣiŋga n-tarigi vuhibu ka kuhira, ka teeg’ o nuhi ka yɛra, ‘Mbusim paai ma! N tarigiri lurila bɛn yɛn ku ma tooni.’ ”