Read Dagbani Jɛrimia 40 Bible Online

Jɛrimia 40 - Dagbani bible

Jɛrimia 40

¹Yawɛ daa yɛli Jɛrimia yɛtɔɣ’ shɛŋa Nɛbuzaradan ŋun daa nyɛ yiliguliba sapashin’ kpɛm’ la ni daa bah’ o, ka o yi Rama chaŋ la nyaaŋa. Bɛ daa lo o la zoligɔnima m-pahi bɛ ni daa gbahi Jɛrusalɛm mini Juda ninvuɣ’ shɛb’ daba n-zaŋ ba kuni Babilɔn la zuɣu.

²Ka yiliguliba sapashin’ kpɛm’ maa daa yihi Jɛrimia ka yɛl’ o, “Yawɛ ŋun nyɛ a Naawuni ŋɔ daa yɛli ni o ni chɛ ka alɔbo ŋɔ lu tiŋgbɔŋ ŋɔ zuɣu,

³ka pumpɔŋɔ o shiri niŋ o ni daa yɛli ni o ni niŋ shɛm maa, yi zaa ni tum alahichi Yawɛ sani ka bi deeg’ o nol’ la zuɣu. Dinzuɣu ka yɛlli ŋɔ paai ya maa.

⁴Pumpɔŋɔ nyama, n gaai zoligɔnim’ ŋɔ a nuu ni zuŋɔ ka bah’ a. A yi bɔri ni a doli ma kuli Babilɔn, nyin’ kamina, n ni gbib’ a viɛnyɛliŋga, amaa a yi bi bɔri ni a doli ma kuli Babilɔn, nyin’ di kana. Nyama, tiŋgbani maa zaa n-do a tooni maa, cham’ luɣ’ shɛli a ni tɛhi ni di viɛl’ ka tuhi ni a chaŋ.

⁵A yi kpalim kpe, nyin’ labimi Ahikam bia Gɛdalia ŋun nyɛ Shafan yaaŋa, ka nyɛ Babilɔn naa ni zaŋ so leei Juda tinsi Gomna la sani m-pahi niriba maa zuɣu bee nyin’ cham’ a ni tɛhi ni di tuhiya ni a chaŋ luɣ’ shɛli.” Di saha ka yiliguliba sapashin’ kpɛm’ maa daa ti o bindirigu mini pini, ka chɛ ka o chaŋ.

⁶Di saha ka Jɛrimia daa chaŋ Ahikam bia Gɛdalia sani Mizipa nti be o sani pahi ninvuɣ’ shɛb’ bɛn kpalim tiŋgbɔŋ maa ni zuɣu.

⁷Sapashin’ kpamba zaa bɛn daa be mɔɣu ni mini bɛ tɔbbihi ni daa wum ni Babilɔn naa zaŋla Ahikam bia Gɛdalia leei tiŋgbɔŋ maa ni gomna, ka zaŋ dɔbba mini paɣiba ni bihi ni bɛn daa nyɛ nandaamba tiŋgbɔŋ maa ni ka bɛ bi zaŋ ba kuli Babilɔn la niŋ o nuu ni,

⁸bɛ daa kulila Gɛdalia sani Mizipa. Bɛna n-daa nyɛ Nɛtania bia Ishimail mini Karia bia Jɔhanan ni Tanhumɛt bia Sɛraya ni Ɛfaai ŋun daa nyɛ Nɛtɔfa nir’ la bidibisi ni Jɛzania ŋun daa nyɛ Maakati nir’ la ni bɛ tɔbbihi.

⁹ Ka Ahikam bia Gɛdalia Shafan yaaŋa maa daa po pɔri yɛli bɛ mini bɛ tɔbbihi maa, “Di zɔriya dabiɛm ni yi tum tuma ti Babilɔnnima. Ʒinimiya tiŋgbani ŋɔ ni n-jɛmdi Babilɔn naa, ka biɛhigu niŋ viɛnyɛla tin ya.

¹⁰Man’ yɛn bela Mizipa n-ʒe yi zaani Babilɔnnim’ bɛn yɛn ka kpe na sani. Amaa yinim’ kul benya yi ni be tin’ shɛŋa ni maa, ka tɔɣimiya wain mini kpam, ka pɔhiri tiwala n-zaŋdi li niŋdi binyara ni zaana.”

¹¹Judanim’ bɛn daa be Mɔab mini bɛn daa be Ammɔnnim’ sani ni bɛn daa be Ɛdom ni tiŋgbɔn’ shɛŋa ni la zaa ni daa wum ni Babilɔn naa chɛla ninvuɣ’ shɛb’ bɛn kpalim niŋ Juda, ka zaŋ Ahikam bia Gɛdalia Shafan yaaŋa la leei bɛ Gomna maa,

¹²di saha ka Judanim’ maa zaa daa yi bɛ ni woliwoli tab’ be luɣ’ shɛŋa ni n-labi Juda tiŋgbɔŋ maa ni Gɛdalia sani Mizipa nti tɔɣiri wain, ka pɔhiri tiwala pam.

¹³Karia bia Jɔhanan mini tɔbbihi sapashin’ kpamba bɛn daa be mɔɣu ni la zaa daa ka Gɛdalia sanna Mizipa

¹⁴ti yɛl’ o, “A bi mi ni Ammɔnnim’ naa Baalis timla Nɛtania bia Ishimail na ni o ti ku a?” Amaa ka Ahikam bia Gɛdalia daa bi niŋ ba yɛda.

¹⁵Di nyaaŋa ka Karia bia Jɔhanan daa sɔɣi yɛli Gɛdalia ashilɔni Mizipa, “Chɛ ka n chaŋ ti ku Nɛtania bia Ishimail maa ka so ku baŋ. Bɔzuɣu ka a yɛn chɛ ka o ku a ka chɛ ka Judanim’ bɛn zaa laɣimna ti be a sani ŋɔ lan wurim, ka di zuɣu chɛ ka Judanim’ bɛn kpalim ŋɔ birili kpihim?”

¹⁶Amaa ka Ahikam bia Gɛdalia daa yɛli Karia bia Jɔhanan, “Di niŋ lala, dama ʒiri ka a ŋma m-pa Ishimail maa.”