Read Dagbani Jɛrimia 43 Bible Online

Jɛrimia 43 - Dagbani bible

Jɛrimia 43

¹Jɛrimia ni daa yɛli niriba maa zaa Yawɛ ŋun nyɛ bɛ Naawuni ŋɔ ni daa zaŋ yɛtɔɣa shɛŋa zaa ti o ka tim o ni o ti yɛli ba la naai,

²ka Hɔshaya bia Azaria mini Karia bia Jɔhanan ni ninvuɣ’ yoya la zaa daa yɛli Jɛrimia, “A ŋmala ʒiri, Yawɛ ŋun nyɛ ti Naawuni ŋɔ bi tim a na ni a ti yɛli ti, ‘Di chaŋya Ijipti ti ʒini nimaani;’

³amaa Nɛria bia Baruk n-wuhir’ a yikombiɛlim zaŋ chaŋ ti polo ni yi zaŋ ti niŋ Babilɔnnim’ nuu ni, ka bɛ ku ti bee n-gbahi ti daba zaŋ ti kuli Babilɔn.”

⁴Dinzuɣu ka Karia bia Jɔhanan mini tɔbbihi sapashin’ kpamba zaa ni niriba maa zaa daa bi deei Yawɛ ni yɛli ba ni bɛ ʒinimi Juda tiŋgbɔŋ ni maa.

⁵Amaa ka Karia bia Jɔhanan mini tɔbbihi sapashin’ kpamba maa zaa daa zaŋ Judanim’ zaa bɛn daa kpalim ka nyɛ bɛn yi bɛ ni daa kari ba tahi tin’ shɛŋa ni zaa n-labina ni bɛ ti ʒini Juda tiŋgbɔŋ ni la,

⁶dɔbba mini paɣiba ni bihi ni nabipuɣinsi ni Nɛbuzaradan ŋun daa nyɛ yiliguliba sapashin’ kpɛm’ la ni daa chɛ ka ninvuɣ’ shɛb’ zaa be Ahikam bia Shafan san’ la chaŋ. Bɛ daa zaŋ anabi Jɛrimia mini Nɛria bia Baruk gba chaŋ.

⁷ Ka bɛ daa kuli Ijipti tiŋgbɔŋ ni, dama bɛ daa bi deei Yawɛ noli. Ka bɛ daa mali hal ti paai Tapanhɛs.

⁸Di nyaaŋa ka Yawɛ daa yɛli Jɛrimia Tapanhɛs maa,

⁹“Zaŋmi kuɣ’ kara niŋ a nuu ni n-chaŋ ti zaŋ li pi bɛ ni zaŋ yaɣiri malimali duno’ shɛli bɛ ni doli kpɛri Firawuna yili shɛli din be Tapanhɛs maa la ni. Chɛ ka Judanim’ maa nya a ni piri li shɛm,

¹⁰ka a yɛli ba, ‘Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: N yɛn timmi nti zaŋ n dabili Babilɔn Naa Nɛbukadnɛza na ka o ti me o nam ʒiishee tam n ni pi kuɣ’ shɛŋa ŋɔ zuɣu, ka ti o sampaa gil’ li.

¹¹O ni ti kana ti saɣim Ijipti tiŋgbɔŋ, ka chɛ ka alɔbo di di ni yɛn di shɛba, ka chɛ ka bɛ gbahi bɛ ni yɛn gbahi shɛb’ daba, ka chɛ ka tɔbu mi di di ni yɛn di shɛba.

¹²O ni ti nyo Ijipti buɣa duri buɣim ka zaŋ bɛ buɣa maa kuli. O ni ti gbahi Ijipti tiŋgbɔŋ ni nim’ kahikahi kaman piɛgula ni gbahiri jɛbɔbiri o situra ni kahikahi shɛm la n-yi nimaani kuli ni alaafee.

¹³O ni ti wurim kuɣa binnana din be Hɛliɔpolis Ijipti tiŋgbɔŋ ni la, ka nyo Ijiptinim’ buɣa jɛmbu duri buɣim.”