Read Dagbani Jɛrimia 47 Bible Online

Jɛrimia 47 - Dagbani bible

Jɛrimia 47

¹Yawɛ ni daa yɛli anabi Jɛrimia yɛtɔɣ’ shɛŋa zaŋ chaŋ Filistianim’ poli pɔi ka Firawuna daa naanyi ti liri Gazanima m-bɔŋɔ:

²Yawɛ ni daa yɛli shɛm m-bɔŋɔ: “Nyamiya, kom yi nuzaa polo zɔrina ni di ti leei kokpɛɣu. Di ni ti lim tiŋgbɔŋ maa n-tabili binshɛlikam din be di ni, ka lim tiŋ’ maa ni bɛn be di ni. Niriba ni ti kum pam, ka tiŋgbɔŋ maa ni niriba zaa ti fabili.

³O yuri takarifiɛma mini o chɛchɛbunsi gbaya vuri ni ti chɛ ka bihi banim’ ku lan bɔhi bɛ bihi yɛla, bɛ bɔɣiri ti kul yɛn zalizalimi,

⁴dabisi’ shɛli din kanna ni di ti di Filistianim’ zaa ka mɔŋ Taainim’ mini Sidɔnnim’ sɔŋsim shɛŋa din kpalim la zuɣu. Dama Yawɛ yɛn kula Filistianim’ bɛn kpalim be Kriit[9] teeku duli la.

⁵Suhusaɣiŋgu paai Gazanima, ka Ashikɛlɔnnim’ fo. Yinim’ Anaki zuliya niriba bɛn kpalim ŋɔ, bɔ saha ka yi yɛn chɛ binyara zaŋ ŋmahiri yimaŋa?

⁶Mbaye, Yawɛ takɔbi, saha yuusim wula ka a lee kul yɛn ŋmara? Labimi kpe a tɔɣu ni ti dɔni baalim vuhi.

⁷ Yawɛ yi bahi li noli, wula ka di lee yɛn tooi fo? O zal’ li mi ni di liri Ashikɛlɔnnim’ mini bɛn be teeku noli.”