Read Dagbani Jɛrimia 48 Bible Online

Jɛrimia 48 - Dagbani bible

Jɛrimia 48

¹Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: Mbusim paai Nɛbonima, di zani dabari. Kiriataimnim’ di vi, bɛ ŋme n-deei li. Bɛ daai di goondaa luhi n-dihi ba vi.

²Mɔabnim’ yudua la naaya. Bɛ lo ba zaɣ’ biɛɣu Hɛshibɔn. “Kamiyana ka ti wurim li, ka di ku lan beni.” Ka nyini yinyahi tiŋ’ ŋɔ gba, bɛ ni ti chɛ ka a fo. Takɔb’ ni ti dol’ a.

³Wummiya Hɔrɔnaimnim’ kuhigu na. “Damili dambu mini saɣiŋgu pam!”

⁴Bɛ saɣim Mɔab, ka di bihi kuhira.

⁵Dama bɛ kumdila pampam duri Luhit zoli, ka wum biɛrim mini nandahima kuhigu Hɔrɔnaim zolɔŋni.

⁶Zomiya tiligi yi nyɛviya. Zomiya kaman mɔɣu ni buŋa m-be tiŋgban’ nɛl’ ni la.

⁷Biɛhiŋ kani, yi ni niŋ yi kpiɔŋ ni be luɣ’ shɛli mini yi daazichi naani la zuɣu, bɛ ni ti gbahi yi gba chaŋ ka gbaai Chɛmɔshi min’ o maligumaaniba, ni o kpambaliba la daba chaŋ.

⁸Ŋun saɣindi maa ni ti liri tiŋ’ kam, ka tin’ shɛli ti ku yi. O ni ti wurim vinvamli ni tinsi, ka saɣim bɔpiɛligu ni tinsi, kaman Yawɛ ni yɛli shɛm.

⁹Bomiya yalim ti Mɔab tiŋgbɔŋ ka di ku yiɣi,[10] dama di ni wurim; di fɔntinsi ni zani dabari, ka so ku lan be di ni.

¹⁰Ŋun baɣa ka Yawɛ tuma ni, noli ni di o, ka ŋun bi bɔri ni o zaŋ takɔbi ku niriba, noli ni di o.

¹¹Mɔabnim’ suhuri kul ʒimi bɛ piligu ni hal ni zuŋɔ. Bɛ ŋmanila bɛ ni zaŋ wain shɛli le duɣu ni, ka bi kpaari li loori duɣu shɛl’ ni; ka so mi na bi gbahi ba daba chaŋ luɣ’ shɛli. Dinzuɣu ka bɛ na kul mali binshɛlikam, ka bɛ binshɛli bi saɣim maa.

¹²Dinzuɣu biɛhiŋ kani, saha kanna, ka n ni ti chɛ ka ninvuɣ’ shɛb’ kana ti kpaag’ o kaman bɛ ni kpaari wain di duɣuri ni shɛm la, ka ŋme n-wurim o duɣuri. Yawɛ n-yɛli lala maa.

¹³Di saha Chɛmɔshi yɛla ni ti gbaai Mɔabnim’ vi kaman Izraɛlnim’ ni daa niŋ Bɛtɛl naani ka di yɛla ti gbahi ba vi shɛm la.

¹⁴Wula ka yi ni tooi yɛli, “Ti nyɛla gandammoya ka nyɛ tɔbutuhiri’ biinsi?”

¹⁵Naa ŋun yuli booni Yawɛ, ka o nyɛ Tɔbbihi Naa ŋɔ yɛliya, “Ŋun yɛn wurim Mɔabnim’ fɔntinsi ka ku bɛ nachimbihi viɛla la kana.

¹⁶Mɔabnim’ mbusim nyabu saha miriya, ka bɛ bahi yoli saha paari yomyom.

¹⁷Yinim’ bɛn zaa nyɛ bɛ ʒiʒiinitab’ ŋɔ mini yinim’ bɛn zaa mi bɛ yuli ŋɔ, fabilimiya bɛ zuɣu. Yɛlimiya, “Nyamiya nam jaaŋgbe’ kpiɔŋ din mali jilima la ni kabigi shɛm!”

¹⁸Yinim’ Dibɔnnim’ bɛn ʒi nam ʒiishee ŋɔ, yiɣisimiya jilima ʒiishee maa ti ʒini tiŋgban’ ni. Dama ŋun saɣindi Mɔab la kana ti liri ya. O saɣim yi kpiɔŋ ni be luɣ’ shɛli la.

¹⁹Yinim’ Aroanima, zanimiya palli noli lihira! Doo bee paɣa yi ti zɔri garita, ka yi bɔh’ o, “Bɔ n-lee niŋ?”

²⁰Bɛ dihila Mɔab vi, dama bɛ wurim li. Kuhimiya ka fabili. Molimiya di yɛla Arinɔn mɔɣili duli ni Mɔab lu n-dahim.

²¹Tin’ shɛŋa din be tintan’ zuɣu nya saria karibu. Dina n-nyɛ: Holɔn mini Jaaza ni Mɛfaat

²²ni Dibɔn ni Nɛbo ni Bɛtidibilateem

²³ni Kiriataim ni Bɛtigamul ni Bɛtimɛɔn

²⁴ni Kɛriɔt ni Bɔzira ni Mɔab tiŋgbɔŋ fɔntinsi zaa din be yoma mini katiŋa.

²⁵Yawɛ yɛliya, “Mɔab yaa naaya. Di lan ka yiko.”

²⁶Chɛ ka Mɔabnim’ nyu dam kuli bɛ ni duhi bɛmaŋ’ pam niŋ Yawɛ la zuɣu. Bɛ ni dɔni bɛmaŋmaŋ’ tiri ni bilim. Bɛ gba ni leei niriba ni yɛn lari shɛba.

²⁷Yi daa lari Izraɛlnima, hal yi ni daa kul bi gbahi ba tayiɣisi ni maa zaa yoli, yi daa yi tɔɣisiri bɛ yɛla yi viinila yi zuɣuri.

²⁸Yinim’ Mɔabnima, yimiya yi fɔntinsi ni chaŋ ti be tampima ni. Benya kaman ŋman’ so ŋun te o tiɛɣu vokabili noli ni la.

²⁹Ti wum Mɔabnim’ karimbaani yɛla. Bɛ mali karimbaani pam. Ti lan wum bɛ duhimaŋtali mini bɛ karimbaani ni bɛ barinyubo ni bɛ nyarimaŋtali yɛla.

³⁰Mmaŋmaŋ’ mi bɛ yudua mini bɛ barikuma nyubu ni bɛ ʒiri tuma yɛla. Yawɛ n-yɛli lala maa.

³¹Dinzuɣu n ni fabili Mɔabnim’ zuɣu. N ni kum Mɔabnim’ zaa zuɣu pam, ka fabili Kirihɛrɛsinim’ zuɣu.

³²N fabili yi zuɣu gari n ni fabindi Jazanim’ zuɣu shɛm. Yinim’ Sibimanima, yi ŋmanila wain tia din wula baai du teeku n-zo hal ti paai Jaza. Ŋun saɣindi la lu yi siɣili saha tiwala mini yi wain tiwala zuɣu.

³³Bɛ yihi suhupiɛlli mini nyaɣisim Mɔab tiŋgbɔn’ shɛli din niŋdi bindira pam la ni. N chɛ ka wain tɔɣibu ŋmaai wain tɔɣiri bɔɣa ni. So bi lan tɔɣiri wain ka yɔri vuri ni suhupiɛlli. Bɛ ni yɔri vu’ shɛli maa pala suhupiɛlli vuri.

³⁴Hɛshibɔnnim’ mini Ɛlialɛnim’ kuhiya, ka bɛ kuhigu maa chaŋ ti paai Jahaz mini Zɔa ni Hɔrɔnaim ni Ɛgilatishɛlishia. Dama hal Nimrim kom gba nyuuya.

³⁵Yawɛ yɛliya, “N ni chɛ ka bɛnkam maani maligu buɣa jɛmbu shee, ka tuɣindi tulaale zim tiri bɛ wuna Mɔab la chɛ li niŋbu.”

³⁶Dinzuɣu ka n fabindi Mɔabnim’ mini Kirihɛrɛsinim’ zuɣu kaman kalambua ka bɛ piɛbiri la, dama bɛ ni daa nya bun’ shɛli zaa la naaya.

³⁷Dama bɛ zaa pinila bɛ zuɣuri mini bɛ teensi, ka chihi bɛ bɔɣiri zaa chiha ka so buri.

³⁸Mɔab yili kam zuɣusaa mini di dahi ni, shɛli lan kani n-naɣi pahila fabila kɔŋko, dama n wurim Mɔab kaman so ni lan je duɣ’ shɛli.” Yawɛ n-yɛli lala maa.

³⁹Mɔab wurimya, ka Mɔabnim’ kuhira, ka ŋmaligi chaŋ ni vi. Dinzuɣu Mɔabnim’ leela bɛ ni yɛn maani shɛb’ ansarisi, ka bɛ yɛla gbahi bɛ ʒiʒiinitab’ zaa dabiɛm.

⁴⁰Yawɛ ni yɛli shɛm m-bɔŋɔ: Nyama, o ni pɔbilina kaman tɔrili la nti yirigi o kpiŋkpama na ti to Mɔabnima.

⁴¹Bɛ ni ti ŋme n-deei bɛ fɔntinsi mini bɛ kpiɔŋ ni be luɣ’ shɛŋa la. Dindali maa Mɔab tɔbbihi suhuri ni ti bemi kaman paɣa ni wolisiri ni o dɔɣi ka o suhu be shɛm la.

⁴²Bɛ ni ti wurim Mɔab, ka di niriba ku lan beni, bɛ ni duhi bɛmaŋ’ ti yaɣi Yawɛ san’ la zuɣu.

⁴³Yinim’ Mɔabnima, dabiɛm mini bɔɣa ni tɔna dola yi tooni, Yawɛ n-yɛli lala maa.

⁴⁴Ŋunkam ti zɔri ni o yi dabiɛm maa ni ni ti lu bɔɣili ni. Ka ŋunkam ti yiri bɔɣili maa ni na, tɔŋ ni gbaag’ o. Dama Mɔabnim’ tibidarigibo dali, n ni ti chɛ ka dimbɔŋɔnim’ niŋ ba. Yawɛ n-yɛli lala maa.

⁴⁵Kuŋkɔɣinzɔriba ni ti tarigi n-kpalim zani Hɛshibɔn, dama buɣim yi Hɛshibɔn na ka buɣim niɛm yi naa Sihɔn yiŋ’ na. Di di Mɔabnim’ ninvuɣ’ zuɣuri, ka di duŋtaariba zuɣuŋmana.

⁴⁶Mbusim be yinim’ Mɔabnim’ zuɣu. Bɛ ku Chɛmɔshi niriba, ka gbahi yi bidibisi mini yi bipuɣinsi daba chaŋ.

⁴⁷ Yawɛ yɛliya, “N ni ti lan labisi Mɔabnim’ daazichi ti ba dabisa shɛŋa din bahindi nyaaŋa puuni. Mɔabnim’ tibidarigibo tariga m-bala.”