Read Dagbani Jɛrimia 49 Bible Online

Jɛrimia 49 - Dagbani bible

Jɛrimia 49

¹Yawɛ ni yɛli shɛm m-bɔŋɔ: “Izraɛlnim’ lan ka bidibisi? Bɛ lan ka falidiriba? Bɔzuɣu ka Milikom niriba kari Gaad zuliya ka ʒini bɛ fɔntinsi ni?”

²Dinzuɣu Yawɛ yɛliya, “Biɛhiŋ kani, saha kanna, ka n ni ti ŋme tɔbuchiriga bahi Raba din nyɛ Ammɔnim’ tiŋ’ la zuɣu. Di ni ti zani dabari, ka buɣim di di tiŋkpansi. Di saha ka Izraɛlnim’ mi ti kari ninvuɣ’ shɛb’ bɛn daa kari ba la.” Yawɛ n-yɛli lala maa.

³Hɛshibɔnnima, kuhimiya, dama Ai wurimya. Raba paɣiba, kummiya. Somiya buri; kummiya, ka fiɛbimiya yimaŋ’ fiɛbisi. Dama bɛ ni ti gbahi Milikom min’ o tindaannima ni bɛn jɛmd’ o daba chaŋ.

⁴Bɔzuɣu ka yi mali yi yaa nyuri bara? Yinim’ bɛn bi ʒe yim ŋɔ, yi yaa naarimi maa. Yi niŋ yi daazichi naani ka yɛra, “Ŋuni n-lee ni tooi liri ti?”

⁵Ti Duuma Yawɛ ŋun nyɛ Tɔbbihi Naa ŋɔ yɛliya, “N ni chɛ ka dabiɛm gbahi ya luɣilikam, ka yi wurim, ka sokam kpa o kpabu polo, ka so ku lan beni ŋun ni laɣim kuŋkɔɣinzɔriba luɣ’ yini.

⁶ Amaa di nyaaŋa n ni ti labisi Ammɔnnim’ daazichi ti ba. Man’ Yawɛ n-yɛli lala maa.”

⁷Zaŋ chaŋ Ɛdomnim’ polo. Yawɛ ŋun nyɛ Tɔbbihi Naa ŋɔ ni yɛli shɛm m-bɔŋɔ: “Ɛdomnim’ lan ka yɛm yɔɣo? Yɛnnim’ la bi lan tiri niriba yɛm saɣisigu? Bɛ yɛm maa naami?

⁸Dɛdannima, ŋmaligimiya guui, sɔɣimiya; dama n ni chɛ ka zaɣ’ biɛɣu niŋ Iso zuliya saha shɛli n yi ti yɛn darigi bɛ tibili.

⁹Wain tiwal’ pɔhiriba yi ka yi sanna, bɛ ku pɔhi ka guui zaɣ’ yiha niŋ? Tayiɣisi yi kana yuŋ, bɛ ni kpuɣila bɛ ni bɔri binshɛŋa kɔŋko.

¹⁰Amaa man’ ŋuna, n pun naai Iso zuliya zaa, ka yihi ba bɛ sɔɣisili shee, ka bɛ ku tooi lan sɔɣi. O bihi min’ o dɔɣiriba ni o ʒiʒiinitaba bahi yoli ka so lan kani.

¹¹Chɛliya yi kpibisi; n ni gbib’ ba, ka chɛ ka yi pakoya niŋ ma naani.

¹²Yawɛ yɛliya, “Hal di yi ti kpa ni n darigi ninvuɣ’ shɛb’ bɛn bi simdi tibidarigibo tibili, man’ di darigi bɛ tibili? N ku chɛ yi tibili darigibu. Di simdi ni yi nya tibidarigibo.”

¹³Dama Yawɛ yɛliya “M poya, Bɔzira ni leei dabeenzɔbo mini ansarisimalibo tiŋa, ka zani dabari ni niriba ni yɛn turi shɛli, ka di fɔntinsi ti lu n-dahim doya sahakam.”

¹⁴N wum lahibali Yawɛ sani. O tim tumo zuliya kam sani ti yɛli ba, “Laɣimmiya taba n kana ti lir’ o. Yiɣisimiya tuhi tɔbu.

¹⁵Dama n ni chɛ ka a nya filiŋ zuliya kam sani, ka ninsalinim’ lihi ʒiɛm a.

¹⁶Yi ni kpɛhiri niriba dabiɛm shɛli ŋɔ mini karimbaani din be yi suhuri ni n-yɔhim yinim’ bɛn be tampima lɔna ni zoli kpaakpaanyom ni ŋɔ ha. Hal yi ni kul be katiŋ’ kaman tɔrili tiɛɣu ni be katiŋ’ shɛm la zaa yoli, n ni yihi ya nimaani siɣisi tiŋ’ na.” Yawɛ n-yɛli lala maa.

¹⁷Ɛdom yɛla ni ti mali dabiɛm. Ŋunkam ti gari nimaani dabiɛm ni gbaag’ o, ka di gar’ o yɛlibiɛ’ shɛŋa zaa din yɛn niŋ nimaani la zuɣu.

¹⁸ Kaman Sɔdom mini Gomɔra ni fɔntin’ shɛŋa din baɣi li ni daa wurim shɛm la, lala ka di gba ni wurim; ka so ti ku lan be nimaani, ka so mi ti ku lan ʒini nimaani. Yawɛ n-yɛli lala maa.

¹⁹N ni ti kari Ɛdomnim’ bɛ yiya maa ni bahi kaman gbuɣinli n-tɔhi yi Jɔɔdɛn nyɔŋ ni na nti liri biŋkɔbiri bɛ mɔri ŋubbu shee la, ka zaŋ n ni pii so leei di zuɣulana. Dama ŋuni n-lee be ka mani? Ŋuni n-lee ni tooi tahi ma ʒiishee? Ka na’ ŋuni n-lee ni tooi mo ma?

²⁰Dinzuɣu wummiya n ni lo nia shɛli zaŋ chaŋ Ɛdomnim’ polo mini n ni yɛn niŋ Tɛmannim’ shɛm. Biɛhiŋ kani, bɛ ni dari bɛ bihi chaŋ, ka bɛ yɛla gbahi bɛ niriba dabiɛm.

²¹Bɛ lubu vuri ni ti dam tiŋgbani, ka bɛ kuhigu ti paai Teeku Ʒiɛɣu ni.

²² Nyamiya, o ni ti du zuɣusaa m-pobilina kaman tɔrili la nti yirig’ o kpiŋkpama to Bɔziranima. Dindali maa Ɛdom tɔbbihi suhuri ni ti bemi kaman paɣ’ ŋun wolisiri ni o dɔɣi suhu ni be shɛm la.

²³Zaŋ chaŋ Damaskusnim’ polo. Hamatinim’ mini Aripadnim’ birimmi, dama bɛ wumla lahiba’ biɛɣu. Dabiɛm kpe ba pam, ka bɛ kɔŋ ʒiya kaman teeku kom din ku tooi fo n-doya la.

²⁴Damaskusnim’ lan ka yaa, ka ŋmaligi ni bɛ guui, ka dabiɛm kpe ba. Biɛrim mini suhugarigu mali ba mi kaman paɣ’ so ŋun wolisiri ni o dɔɣi.

²⁵Bɔzuɣu ka bɛ chɛ tin’ shɛli din yuli daa du pam ŋɔ bahi? Di nyɛla n suhu ni piɛli tiŋ’ shɛli zuɣu.

²⁶Dinzuɣu di nachimba ni ti lu di zama laɣiŋgu shee, ka bɛ ti ku di tɔbbihi zaa dindali maa. Yawɛ ŋun nyɛ Tɔbbihi Naa ŋɔ n-yɛli lala maa.

²⁷ N ni ti nyo Damaskus gooni la buɣim, ka di di Bɛnhadad kpiɔŋ ni be luɣ’ shɛŋa la.

²⁸Zaŋ chaŋ Kɛdar zuliya mini Hazɔr nam sulinsi polo, Babilɔn Naa Nɛbukadnɛza ni daa tuhi nyaŋ shɛb’ la, Yawɛ yɛliya, ‘Yiɣisimiya, lirimiya Kɛdarinima, wurimmiya wulimpuhili zuliya maa.

²⁹Deemiya bɛ suɣa mini bɛ biŋkɔbbaligu ni bɛ pateesanima ni bɛ nɛma zaa. Taɣimiya bɛ laakuma chaŋ ti leei yi dini. Ka bɛ ŋme kuŋ yɛli, “Yɛlibiɛɣu gili ti luɣilikam zaa.

³⁰Yawɛ yɛliya, “Hazɔrinima, zomiya chaŋ katiŋa, sɔɣimiya voya ni. Dama Babilɔn Naa Nɛbukadnɛza lo nia biɛɣu zaŋ chaŋ yi polo, ka mali shili gun ya.

³¹Yawɛ yɛliya, “Yiɣisimiya, chamiya ti liri zuliya shɛb’ bɛn ka yɛlimuɣisir’ shɛli ŋɔ. Bɛ tiŋ’ maa ka dunɔdaya bee dunokparitisi. Di ʒiɛla di ko.

³²Bɛ laakuma mini bɛ niɣi ni ti leei yi ni ŋme tɔbu di shɛba. N ni ti wurim buɣijɛmdiba bɛn pindi zuɣukpina ŋɔ kpɛhi yɔɣu, ka chɛ ka yɛlibiɛɣu yi luɣilikam na ti lu bɛ zuɣu.

³³Hazɔr ni ti lu n-dahim doya sahakam, ka yɔbahi ti gɔri di ni. So ti ku lan be nimaani bee ka so ti lan ʒini di ni.” Yawɛ n-yɛli lala maa.

³⁴Yawɛ daa tɔɣisi anabi Jɛrimia yɛtɔɣa zaŋ chaŋ Ɛlamnim’ polo Juda Naa Zɛdɛkia nam dibu piligu ni.

³⁵Yawɛ ŋun nyɛ Tɔbbihi Naa ŋɔ ni daa yɛli shɛm m-bɔŋɔ: N yɛn kabisila Ɛlamnim’ tɔbiri din nyɛ bɛ yaa la.

³⁶N ni chɛ ka pɔhim yi zuɣusaa yaɣa anahi ŋɔ na ti ʒe Ɛlamnima, ka n chɛ ka pɔhim maa ʒe ba bahi luɣilikam, ka Ɛlam kuŋkɔɣinzɔriba ti zo n-kuli zuliya kam ni.

³⁷N ni chɛ ka dabiɛm gbahi Ɛlamnim’ bɛ dimnim’ bɛn bɔri ni bɛ ku ba sani. N ni yiɣisi n suhu pam bahi bɛ zuɣu n-chɛ ka yɛlibiɛɣu lu bɛ zuɣu. N ni chɛ ka tɔbu lu bɛ zuɣu hal ka n ti kpihim bɛ birili.” Yawɛ n-yɛli lala maa.

³⁸Yawɛ lan yɛli, “N ni ku bɛ naa min’ o kpambaliba, ka zali n nam ʒiishee Ɛlam.

³⁹Amaa di yi niŋ daba ayi ha, n ni lan labisi Ɛlamnim’ nyamma ti ba.” Yawɛ n-yɛli lala maa.