Read Dagbani Jɛrimia 52 Bible Online

Jɛrimia 52 - Dagbani bible

Jɛrimia 52

¹Zɛdɛkia yuma daa nyɛla yuun’ pisiniyini saha shɛl’ o ni daa di nam. O daa di nam maa ʒini Jɛrusalɛm la yuun’ piniyini. O ma yuli n-daa booni Hamutal. O daa nyɛla Jɛrimia ŋun daa nyɛ Libina nir’ la bipuɣiŋga.

²Zɛdɛkia daa tum alahichi Yawɛ sani kaman Jɛhoyakim ni daa tum shɛm.

³Yɛlimaŋli, Jɛrusalɛmnim’ mini Judanim’ daa chɛ ka Yawɛ suhu yiɣisi pam hal ka o ti kari ba o sani. Zɛdɛkia daa nyɛla ŋun zaɣisi Babilɔn naa noli.

⁴ O nam dibu yuma awɛi ni gol’ so ŋun pahiri pia biɛɣu pia dali, ka Babilɔn Naa Nɛbukadnɛza daa zaŋ o tɔbbihi zaa kana ti liri Jɛrusalɛmnima. Bɛ daa teemi gil’ li, ka me bindura gil’ li ti tuui.

⁵Dinzuɣu bɛ daa kul teei gilila tiŋ’ maa hal ti paai Naa Zɛdɛkia nam dibu yuun’ piniyini saha.

⁶Gol’ so ŋun pahir’ anahi daba awɛi dali ka kum daa muɣisi tiŋ’ maa nim’ pam, ka bindirigu daa lan ka tiŋgbɔŋ maa ni ka niriba maa ni di.

⁷ Di saha ka bɛ daa chibi tiŋ’ maa gooni voli, ka tɔbbihi zaa daa doli voli maa yi goma ayi sunsuuni yuŋ naa puu la polo hal Babilɔnnim’ ni daa teei gili tiŋ’ maa zaa la yoli. Bɛ daa zaŋ kpala Araba polo.

⁸Amaa ka Babilɔn tɔbbihi maa daa kari doli Naa Zɛdɛkia nti gbaag’ o Jɛriko bɔpiɛligu ni, ka o tɔbbihi zaa daa zo ka chɛ o.

⁹Di saha ka bɛ daa gbaai naa maa n-zaŋ o chaŋ Babilɔn naa sani Ribila din be Hamat tiŋgbɔŋ ni la ka o ti di o saria.

¹⁰Ka Babilɔn naa maa daa ku Zɛdɛkia bidibisi mini Juda kpambaliba zaa o ninni Ribila maa.

¹¹ O daa chɛ ka bɛ kpaɣila Zɛdɛkia nina, ka ba o bandi. Ka Babilɔn naa maa daa zaŋ o kuli Babilɔn nti niŋ sarika ni hal ka o ti kpi.

¹²Babilɔn Naa Nɛbukadnɛza nam dibu yuun’ pisiyinika ni gol’ so ŋun pahir’ anu biɛɣu pia dali ka naa guliba sapashin’ kpɛma ŋun yuli daa booni Nɛbuzaradan ka o nyɛ Babilɔn naa kpambal’ la daa kpe Jɛrusalɛm.

¹³ O daa nyo Yawɛ jɛmbu duu mini nayili ni Jɛrusalɛm yiya zaa buɣim; o daa nyo yil’ titali kam buɣim.

¹⁴Ka Babilɔn tɔbbihi bɛn zaa daa be naa guliba sapashin’ kpɛm’ maa sani maa daa daai goon’ shɛŋa din zaa daa gili Jɛrusalɛm la luhi.

¹⁵Ka Nɛbuzaradan ŋun daa nyɛ naa guliba sapashin’ kpɛm’ maa daa gbahi tarimba shɛba mini ninvuɣ’ shɛb’ bɛn daa kpalim tiŋ’ maa ni ni ninvuɣ’ shɛb’ bɛn daa zo n-labi Babilɔn naa polo la ni nuhi tuumbaŋdiba bɛn daa kpalim la n-zaŋ ba chaŋ.

¹⁶Amaa Nɛbuzaradan ŋun daa nyɛ naa guliba sapashin’ kpɛm maa daa chɛ tiŋgbɔŋ maa ni nandaamba shɛb’ bahi ni bɛ maani wain tihi, ka kɔra.

¹⁷Daanya pilanim’ mini tɔrokɔnim’ la ni daanya kɔniŋdi bini din daa be Yawɛ jɛmbu duu la, Babilɔnnim’ naa maa daa wurim li mi, ka va di daanya maa zaa kuli Babilɔn.

¹⁸Bɛ daa kpuɣi duɣuri mini soobuya ni buɣim kpihiri bina ni taha ni chɛriti ni daanya la’ shɛŋa bɛ ni daa mali tumdi tuma Naawuni jɛmbu duu maa ni chaŋ.

¹⁹Naa guliba sapashin’ kpɛm’ maa daa lan kpuɣi la’ bihi mini buɣim moori bina ni taha ni duɣuri ni firilatamdisi ni chɛriti ni salima mini anzinfa la’ shɛŋa bɛ ni daa mali niŋdi sara maligu kom la.

²⁰Naa Sulemaana ni daa mali pila diba ayi shɛŋa la mini kɔniŋdi bini ni daanya naɣilahi pinaayi bɛn daa be kɔniŋdi bini maa lɔŋni la ni di ni tam binshɛŋa zuɣu la ni daanya la’ shɛŋa zaa zali Yawɛ jɛmbu duu maa ni la daa galisiya pam hal ka nira ku tooi zaŋ sania zahim li.

²¹Pilanim’ maa zaɣ’ yini kam wɔɣilim daa nyɛla mita anii, ka di barilim nyɛ mita anu ni biɛla; di daa nyɛla zaɣ’ yɔri, ka di tibisim nyɛ milimita pisopɔinnaanu.

²²Bɛ daa zaŋla daanya mali biŋkpila tam di zuɣu. Biŋkpilli zaɣ’ yini kam dubu daa nyɛla mita ayi ni biɛla. Ka bɛ zaŋ daanya mali pumpɔrinchihi kɔtomsi kɔɣili biŋkpilli maa zuɣusaa gili n-dihi li nachiinsi. Ka daantaliga din pahi ayi gba daa mali pumpɔrinchihi kɔtomsi maa.

²³ Pumpɔrinchihi kɔtomsi maa daa nyɛla bini pihiwɛinaayɔbu m-be di luɣa zuɣu. Ka pumpɔrinchihi din daa gɔhigɔhi kur’ shɛŋa din gabigabi taba gili maa zaa kalinli daa nyɛla kɔbiga.

²⁴Ka naa guliba sapashin’ kpɛm’ maa daa gbahi maligumaaniba zuɣulan’ Sɛraya mini Zɛfania ŋun daa nyɛ maligumaana m-pa o zuɣu la ni dunɔguliba ata.

²⁵O daa lan nya tɔbbihi sapashin’ kpɛm’ mini niriba ayopɔin bɛn daa nyɛ naa saawaranim’ tiŋ’ maa puuni gbahi ba. Ka o daa lan nya tɔbbihi sapashin’ kpɛm’ gbaŋŋmara ŋun daa su bɛ tiŋgbɔŋ maa ni niriba laɣimbu tuma la mini dɔbba pihiyɔbu tiŋ’ maa puuni gbahi ba.

²⁶Di nyaaŋa ka naa guliba sapashin’ kpɛm’ Nɛbuzaradan daa zaŋ ba chaŋ Ribila nti ti Babilɔn naa.

²⁷Ka Babilɔn naa daa ku ba Ribila din be Hamat tiŋgbɔŋ ni la. Di saha ka bɛ daa gbahi Judanim’ daba n-yi bɛ tiŋgbɔŋ maa ni chaŋ.

²⁸Nɛbukadnɛza ni daa gbahi ninvuɣ’ shɛb’ daba kalinli m-bɔŋɔ: Yuun’ shɛli din pahir’ ayopɔin ni, o daa gbahila Judanim’ ninvuɣ’ tusaata ni pisinaata.

²⁹Nɛbukadnɛza nam dibu yuun’ pisaayika ni, o daa gbahila ninvuɣ’ kɔbisinii ni pihitanaayi Jɛrusalɛm.

³⁰Nɛbukadnɛza nam dibu yuun’ pisinaata saha ka Nɛbuzaradan ŋun daa nyɛ naa guliba sapashin’ kpɛm’ maa daa gbahi Judanim’ ninvuɣ’ kɔbisiyopɔin ni pihinahinaanu daba n-zaŋ ba chaŋ. Niriba maa zaa kalinli daa nyɛla ninvuɣ’ tusaanahi ni kɔbisiyɔbu.

³¹Bɛ ni daa gbaai Juda Naa Jɛhoyachin chaŋ, di yuun’ pihitanaayopɔin gol’ so ŋun pahiri pinaayi biɛɣu pisinaanu dali, ka Ivilmɛrɔdak ŋun daa di nam Babilɔn di yuuni maa la daa niŋ Juda Naa Jɛhoyachin nirilim n-yih’ o sarika ni.

³²O daa tɔɣis’ o nirilim yɛtɔɣa, ka ti o nam din du n-gari na’ shɛb’ bɛn daa be o sani Babilɔn maa nama.

³³Ka Jɛhoyachin daa yeeg’ o sarika binyɛra sɔŋ, ka o mini naa daa kul laɣindi diri bindirigu sahakam hal ni o nyɛvili tariga.

³⁴Ka Babilɔn naa maa daa kul tir’ o o dabisili kam laɣidira hal ni o nyɛvili tariga.