Read Dagbani Jɛrimia 8 Bible Online

Jɛrimia 8 - Dagbani bible

Jɛrimia 8

¹Yawɛ yɛliya, “Di saha maa, bɛ ni ti kurigi Juda nanima mini kpambaliba ni maligumaaniba ni anabinim’ ni Jɛrusalɛmnim’ kɔba bɛ gbala ni;

²n-zaŋ li yɛrigi wuntaŋ’ mini goli ni saŋmarisi zaa ni, din nyɛ bɛ ni daa yuri binshɛŋa ka tumdi di tuma, ka dol’ li, ka jɛmdi li la, ka so ti ku lan va bɛ kɔba maa bee n-zaŋ li pi. Di ti kul yɛn dola tiŋgban’ ni kaman naɣibindi la.

³Ka zuliya biɛɣu ŋɔ ninvuɣ’ shɛb’ bɛn ti yɛn kpalim, ka be n ni kari ba bahi luɣ’ shɛŋa zaa, bɛ ni ti paɣi kum gari biɛhigu. Yawɛ ŋun nyɛ Tɔbbihi Naa ŋɔ n-yɛli lala maa.”

⁴Yawɛ yɛliya, “Bɔhimi ba.” Niriba yi lu, bɛ bi lan yiɣisir’ yaha? Ka bee bɛ yi birigi kpe yɔɣu, bɛ bi lan labirina?

⁵Ka wula ka niriba ŋɔ bɛn’ kpe yɔɣu ka bi lan labina? Bɛ dolila yɔhiŋ soli ka zaɣisi labbuna.

⁶N gbilisi tibili ni n wum, amaa ka bɛ bi tɔɣisi yɛlimaŋli yɛtɔɣa. Bɛ ninvuɣ’ so bi niŋ tuuba o tuumbiɛri zuɣu yɛra, “Bɔzuɣu ka n niŋ lala?” Bɛ zaa kparila bɛ kpabu kaman wɔhu ni sibigi ʒi n-kpɛri tɔb’ gɔɣu ni shɛm la.

⁷Hal shinshingoorɔnim’ mi bɛ yiŋ’ labbu saha. Ka ŋmanʒee mini sakpaleeŋa ni noombihi bɛn daari doli taba zaa gba mi bɛ kandina saha. Amaa n niriba bɛn’ bi mi Yawɛ zaligunima.

⁸Wula ka yi lee yɛn tooi yɛli, “Ti mali yɛm, ka Yawɛ zaligunim’ be ti sani?” Zaligubaŋdib’ ʒirinim’ zaŋ li leei ʒiri.

⁹Bɛ ni ti dihi yɛnnim’ vi. Bɛ ni ti zaŋ ba chaŋ ka di gari ba. Bɛ ni zaɣisi Yawɛ yɛligu ŋɔ, yɛm bɔ ka bɛ lan mali?

¹⁰Dinzuɣu n ni zaŋ bɛ paɣiba ti shɛba, ka zaŋ bɛ puri ti ninvuɣ’ shɛb’ bɛn nyaŋ ba maa, dama bɛ ninkura mini bihi zaa suhu kul yɛla alaha dibu zuɣu. Anabinim’ zaŋ tabili maligumaaniba zaa bi lan gbibi yɛlimaŋli.

¹¹ Bɛ baɣa ka n niriba ni nya dan’ shɛli maa ni, ka naɣ’ yɛrimi, “Suhudoo beni, suhudoo beni.” ka suhudoo mi kani.

¹² Bɛ tum vi tuma, ka tum din chihira, amaa ka vi bi mali ba hal baabiɛla gba. Bɛ daa bi mi vidibo ni nyɛ shɛli. Dinzuɣu bɛ ni ti lu m-pahi bɛn ti yɛn lu zuɣu. N yi ti darigi bɛ tibili saha shɛli, bɛ ni ŋme m-paai ba. Man’ Yawɛ n-yɛli lala maa.

¹³Yawɛ yɛliya, “N daa bɔri ni n laɣim n niriba, amaa ka bɛ daa ŋmanila wain tia din ka wala bee fiig tia din ka wala, hal bɛ ŋmanila tia din vari suui. N ni daa zaŋ binshɛli ti ba la faaya ka chɛ ba.

¹⁴Bɔzuɣu ka ti na kpalim ʒi kpe? Chɛliya ka ti chaŋ bɛ ni me goma gili fɔntin’ shɛŋa la ni nti kpi di ni, dama Yawɛ ŋun nyɛ ti Naawuni ŋɔ zaliya ni ti ni kpi, ka zaŋ kom din mali lɔɣu nti ti ni ti nyu, ti ni tum alahichi o sani zuɣu.

¹⁵Ti bɔrila suhudoo, amaa ka bi nya zaɣ’ viɛlli, Ti bɔrila alaafee nyabu saha, amaa ka dabiɛm n-naɣ’ kul beni.

¹⁶Ti wum ti dimnim’ yuri napɔnchichiba Dan tiŋgban’ ni. Ka bɛ wɔridibisi kumsi chɛ ka tiŋgbɔŋ zaa sɔhigi. Bɛ kana ni bɛ ti saɣim tiŋgbani maa mini binshɛɣukam din be di ni, ka saɣim tiŋ’ maa n-tabili ninvuɣ’ shɛb’ bɛn be di ni.”

¹⁷Yawɛ yɛliya, “Nyamiya, n ni chɛ ka tinvura bɛn nyɛ garinsi lu yi zuɣu n-dimdi ya, ka yi ku tooi niŋ ba tim.”

¹⁸N lan ka suhupiɛlli, suhusaɣiŋgu m-mali ma. Biɛrim be n suhu ni.

¹⁹Wummiya n niriba bɛn yɛla mali nambɔɣu la kuhigu tiŋgbɔŋ maa ni luɣilikam, “Yawɛ lan kala Ziɔn? Di Naa maa lan ka di ni?” (Bɔ n-niŋ ka bɛ zaŋ bɛ binnana mini tinzun’ buɣa n-yiɣisiri n suhu?)

²⁰Puu atam kpuɣibu saha naaya, ka wuuni du, ka ti na bi tiligi.

²¹Dama n niriba bɛn yɛla mali nambɔɣu maa biɛrim nyabu chɛ ka n gba nyala biɛrim. N fabiliya ka di niŋ ma yoli.

²²Tim ka Giliad?[2] Dɔɣite ka nimaani? Ka bɔ n-lee chɛ ka n niriba bɛn yɛla mali nambɔɣu ŋɔ bi nya alaafee?