Read Dagbani Jɛrimia 9 Bible Online

Jɛrimia 9 - Dagbani bible

Jɛrimia 9

¹N di bi zaɣisi ka n zuɣu nyɛ kɔbiliga, ka n nina nyɛ nintam kɔbilinini ka n di tooi kuhiri bɛ ni ku n niriba bɛn yɛla mali nambɔɣu maa zuɣu yuŋ ni wuntaŋ’ ni.

²N di bi zaɣisi ka m mali sochandiba kpɛhili shee tiŋgban’ nɛli ni, n di naan chɛ n niriba ŋɔ ka zo, dama bɛ zaa nyɛla zinaniŋdiba ni nyaanyiriba.

³Bɛ gɔŋla bɛ zilima ka di be kaman tɔbiri la; bɛ mali yaa pam tiŋgbani maa ni zaŋ chaŋ ʒiri ŋmabu polo, ka pa ni yɛlimaŋli polo. Dama bɛ kul tumdila tuumbiɛri, ka bi mi ma, Yawɛ n-yɛli lala maa.

⁴Niŋmiya siɣa zaŋ chaŋ yi ʒiʒiinitaba polo, ka miriya ka yi niŋ yi mabia kam naani, dama mabihi zaa nyɛla yɔhindiba, ka ʒiʒiinikpee kam nyɛ ŋun chani saɣindi niriba yuya.

⁵Bɛ zaa nyɛla bɛn yɔhindi bɛ ʒiʒiinitaba, ka so bi yɛri yɛlimaŋli. Bɛ wuhila bɛ zilima ʒiri ŋmabu. Bɛ tum tuumbiɛri ka di gbarigi ba hal ka bɛ ku lan tooi niŋ tuuba.

⁶Nahiŋgu balibu kam n-kul beni, ka yɔhiŋgu balibu kam beni! Bɛ zaɣisiya ni bɛ ku baŋ ma. Yawɛ n-yɛli lala maa.

⁷Dinzuɣu Yawɛ ŋun nyɛ Tɔbbihi Naa ŋɔ yɛliya, Pumpɔŋɔ n ni mali ba, ka bɛ neei kaman machɛli ni maani kurugu shɛm la, ka buɣisi ba nya. Dama wula ka n lee lan yɛn niŋ n niriba bɛn nyɛ alahichinim’ ŋɔ?

⁸Bɛ zilima ŋmanila piɛm din mali lɔɣu, di tɔɣisirila ʒiri yɛtɔɣa. Bɛ zaa tɔɣisirila zɔsimdi yɛtɔɣa bɛ ʒiʒiinitab’ sani, amaa bɛ suhuri ni, bɛ nyɛla bɛn sɔɣi dɔni gu ni bɛ tum barina.

⁹Yawɛ bɔhiya, “N di darigi bɛ tibili dimbɔŋɔnim’ zuɣu? N di bɔhi zuliya ŋ-ŋɔ tatabo biɛri?”

¹⁰N ni kum ka fabili zoya zuɣu, ka fabili mɔɣu ni biŋkɔbiri mɔri ŋubbu shee zuɣu, dama di bahila yoli doya ka so bi lan gariti nimaani. So bi lan wumdi niɣi kumsi nimaani. Noombihi mini biŋkɔbiri zaa yi nimaani zo.

¹¹N ni chɛ ka Jɛrusalɛm leei tampuli, ka leei kunduna biɛhigu shee. N ni chɛ ka Juda fɔndi zan’ dabari, ka so ku lan be di ni.

¹²Ŋuni n-lee mali yɛm viɛnyɛliŋga din ni baŋ dimbɔŋɔ gbinni? Banim’ ka Yawɛ lee tɔɣisi yɛtɔɣa ŋɔ, ka bɛ ni tooi zaŋ li moli? Bɔ n-lee chɛ ka tiŋgbani maa bahi yoli doya kaman tiŋgban’ nɛli, ka so bi lan gariti nimaani?

¹³Ka Yawɛ yɛli, “Bɛ ni zaɣisi n ni daa zali ba zaligu shɛŋa la dolibu, ka bi deei n noli,

¹⁴amaa ka niŋ tipawumli n-dolila bɛmaŋmaŋ’ suhuyubu n-jɛmdi Baalinima kaman bɛ yaannim’ ni daa wuhi ba shɛm la zuɣu.”

¹⁵Dinzuɣu Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: “N yɛn zaŋla yabiga nyuhi niriba ŋɔ, ka zaŋ lɔɣu ni be ko’ shɛl’ ni nyuhi ba.

¹⁶N ni wurim ba kpɛhi tinzun’ shɛba ni bɛ yaannim’ ni daa bi mi, ka bɛn’ gba bi mi ba, ka chɛ ka tɔb’ lu bɛ zuɣu hal ka n ti kpihim bɛ birili.”

¹⁷Yawɛ ŋun nyɛ Tɔbbihi Naa ŋɔ ni yɛli shɛm m-bɔŋɔ: Tɛhimiya, ka boli paɣ’ shɛb’ bɛn mi fabila ka bɛ kana; ka tim boli paɣ’ shɛb’ bɛn mi kuyila ka bɛ kana.

¹⁸Chɛliya ka bɛ kum kuyila bahi ti zuɣu yomyom, ka nintam yi ti nina ni na, ka nintam ti tɛli ti niŋkari zaa.

¹⁹Dama ti wum kuhigu damli Ziɔn. Ti bahi yoli. Ti di vi zaa! Di simdi ni ti yi ti tiŋgban’ ni, dama bɛ daai ti yinsi luhi.

²⁰Paɣiba, wummiya Yawɛ yɛligu. Chɛliya ka o nol’ ni yɛligu kpe yi tiba ni. Wuhimiya yi bipuɣinsi kuyila, ka sokam wuh’ o ʒiʒiinikpee fabila.

²¹Kum doli ti takɔriti ni kpe na. Di kpe ti nanim’ yinsi ni di ku bihi solɔri zuɣu ka ku nachimba mi zama laɣiŋgu shee.

²²Yawɛ yɛliya, “Yɛlima, kpiimba ni ti doya kaman naɣibina n-do mɔɣu ni la, bee kaman chi ni dɔndo kachɛriba nyaaŋa shɛm la, ka so ti ku kpuɣi ba.”

²³Yawɛ yɛliya, “Bɛn mali yɛm di nyuri bara bɛ yɛm zuɣu, ka bɛn mali yaa di nyuri bara bɛ yaa zuɣu. Ka bɛn gba mali buni di nyuri bara bɛ buni zuɣu.

²⁴ Amaa di simdi ka bɛ nyuri bara la bɛ ni baŋ ma, ka mi n ni nyɛ so la zuɣu. Bɛ baŋya ni mani n-nyɛ Yawɛ. Ka m mali yurilim din galisi mini zaligu soli ni nimmaŋtali tumdi tuma dunia ni. Dimbɔŋɔ zuɣu ka m mali suhupiɛlli. Yawɛ n-yɛli lala maa.”

²⁵Yawɛ yɛliya, “Biɛhiŋ kani, dabisa kanna ka n ni ti darigi ninvuɣ’ shɛb’ bɛn guni bɛ niŋgbuna ni kɔŋko la tibili, bɛna n-nyɛ:

²⁶Ijiptinim’ mini Judanim’ ni Ɛdomnim’ ni Ammɔnnim’ ni Mɔabnim’ ni bɛnkam zaa nyɛ bɛn be tiŋgban’ nɛl’ ni, ka wahiri bɛ zabiri,[3] ka kpɛri bɛ jɛmbu duri la. Dama zuliyanim’ ŋɔ zaa nyɛla bɛn gunda, amaa ka bi doli di ni nyɛ zaligu shɛli ŋmahinli, ka Izraɛlnim’ zaa mi nyɛ bɛn bi guni bɛ suhuri ni.”