Read Dagbani Fabilanima 1 Bible Online

Fabilanima 1 - Dagbani bible

Fabilanima 1

¹Fɔntin’ shɛli ni niriba ni daa kul palila n-leei dabari maa! Tin’ shɛli din daa nyɛ tin’ titali niriba sani la nti be kaman pakoli maa. Tin’ shɛli din daa nyɛ nabipuɣiŋga fɔntinsi ni la leela dabili.

²Yuŋ yi paai, o[1] kul kumdila pampam, ka nintam zo n-tiɛl’ o kparima. O mamanim’ la zaa so lan kani ŋun ni maag’ o suhu. O zɔnim’ zaa yila o nyaaŋa; bɛ leela o dimnima.

³Bɛ gbahi Judanim’ daba n-zaŋ ba chaŋ ka bɛ ti diri wahala, ka tumdi dabitim tuma. Pumpɔŋɔ bɛ bela tiŋgbɔn’ shɛŋa ni, ka bi nya vuhim shee. Bɛn daa kari doli ba maa zaa gbahi ba bɛ nandahima pam puuni.

⁴So’ shɛŋa din kuni Ziɔn kumdimi, dama so bi lan kanna ti puhiri churi. Bɛ chɛ o dunɔdaya zaa bahi, ka o maligumaaniba ŋuhira. O paɣisara malila nandahima; o nya naŋgbantom pam.

⁵O dimnima n-leei bɛn su o; o dimnim’ maa kul tɔŋdimi, dama Yawɛ chɛ ka o nya wahala. O biriginsim din galisi zuɣu; o dimnim’ gbah’ o bihi chaŋ ti leei daba.

⁶Ziɔn bipuɣiŋga jilima zaa naaya. O nanim’ ŋmanila bambu’ dibisi bɛn bi nyari mɔri. Bɛ bela bɛn kariti ba tooni n-zɔri ka yaa kani.

⁷Jɛrusalɛm wahala mini o yɔɣu dabu dabisa la puuni, ka o teei o ni daa mali bin’ viɛl’ shɛŋa kurimbuni ha la yɛla. Saha shɛli o dimnim’ ni daa nyaŋ o niriba ka so kani ŋun ni sɔŋ ba la, ka o dimnim’ maa daa yuun’ o ni lu maa, ka maani o ansarisi.

⁸Jɛrusalɛm tum alahichi pam, dinzuɣu ka o leei tabizahim niriba sani. Bɛnkam zaa daa tiri o jilima lihimi ʒiɛm o, dama bɛ nya o gbini. Omaŋmaŋ’ ŋuhirimi, ka ŋmalig’ o nini labi kpaŋa.

⁹O daɣiri maa daa yila palo, ka o baɣa daa ka yɛl’ shɛŋa din yɛn paag’ o ni. O lubu maa daa mali alahiziba, ka so daa kani ŋun ni maag’ o suhu. Yawɛ, lihimi n ni nyari nahiŋgu shɛm, dama n dimnim’ di nasara.

¹⁰O dimnim’ fa o bin’ viɛla zaa. Hal o nya zuliya shɛba ni kpe Naawuni jɛmbu duu la puuni; a ni daa zali ni di chihiri ni zuliya shɛb’ kpe a niriba laɣiŋgu ni la.

¹¹Tiŋ’ maa niriba zaa bɔrila bindirigu ka kul ŋuhira. Bɛ zaŋ bɛ daazichi zaa taɣi bindirigu ni bɛ lan nya yaa. Yawɛ, lihimi nya n ni bahi yoli shɛm.

¹²Yinim’ bɛn zaa gariti ŋɔ, yi baɣa kani? Lihimiya nya, so suhugarigu na mi m-paai n suhugarigu ŋɔ? Suhugarigu shɛli din paai ma, ka nyɛ Yawɛ ni zaŋ shɛli ti ma o suhu ni daa yiɣisi pam dahin shɛl’ la.

¹³O tim buɣim ka di yi zuɣusaa na, ka di nyooi ma hal ti kpe n kɔba ni. O bari zana, ka di gbaai n naba. O kari ma labisi. O chɛ ka bɛ zaɣisi ma, ka n tarigi doya dabisili kam zaa puuni.

¹⁴O daa laɣisi m biriginsim zaa n-lo li kaman naɣikɔra dapua la. O nuhi ka o daa zaŋ lo li tabili taba n-zaŋ li pa n nyiŋgoli zuɣu, ka n yaa daa naai. N Duuma daa zaŋ ma tila n ni ku tooi zabi ninvuɣ’ shɛba.

¹⁵Yawɛ zaɣisi n tɔbbihi zaa bɛn be n sani. O zali ma saha shɛl’ o ni yɛn ku n nachimba. N Duuma no Juda paɣisarili ŋun nyɛ paɣipiɛliga sɔŋ kaman bɛ ni nɔri wain di bɔɣili ni shɛm la.

¹⁶Dimbɔŋɔnim’ zuɣu ka n kuhira, ka nintam zɔri n ninni maa; dama ŋun yɛn maai n suhu be katiŋa. Ŋuna n-nyɛ ŋun yɛn ti ma suhukpeeni. Bɛ zaɣisi m bihi; dama n dim’ nyaŋ ma.

¹⁷Ziɔnnim’ teei bɛ nuhi, amaa ka so kani ŋun ni maai bɛ suhuri. Yawɛ daa yɛli Yaakubu ni o ʒiʒiinitaba ni ti leeg’ o dimnima. Jɛrusalɛm leela binshɛli din nyɛ daɣiri bini bɛ sani.

¹⁸Yawɛ mali yɛlimaŋli, dama n zaɣis’ o yɛligu. Amaa zuliya kam zaa, wummiya, nyamiya n ni diri wahala shɛm. Bɛ gbahi m paɣisara mini n nachimba n-zaŋ ba chaŋ ti leei daba.

¹⁹N daa kuhi boli n zɔnima, amaa ka bɛ yɔhim ma. M maligumaaniba mini n kpamba daa kpila tiŋ’ maa ni, saha shɛli bɛ ni daa bɔri bindirigu ni bɛ di n-nya yaa la.

²⁰Yawɛ, lihimi n ni be fitiina shɛli ni, di biɛri m puuni, ka n suhu dam, n ni daa nyɛ ŋun zaɣis’ a noli zuɣu. Bɛ daa malila takɔbiri be soya zuɣu kuri niriba, ka kpibu be yiŋa.

²¹Bɛ daa wum n ni ŋuhiri shɛm, ka so kani ŋun ni maai n suhu. N dimnim’ zaa daa wum m muɣisigu maa yɛla. A ni niŋ shɛm maa mali ba la suhupiɛlli. Chɛ ka a ni daa yɛli dabisi’ shɛli yɛla la paana, ka chɛ ka bɛ gba be kaman n ni be shɛm ŋɔ.

²²Chɛ ka bɛ tuumbiɛri yi palo a sani, ka a niŋ ba kaman a ni niŋ ma shɛm n tuumbiɛri zaa zuɣu ŋɔ. Dama n ŋuhibu maa yaɣiya; ka n suhu saɣim.