Read Dagbani Fabilanima 2 Bible Online

Fabilanima 2 - Dagbani bible

Fabilanima 2

¹Ti Duuma suhu yiɣisiya, ka o filim Ziɔn bipuɣiŋga. O zaŋ Izraɛl jilima bahi, ka di yi zuɣusaa lu tiŋ’ na. O suhu ni daa yiɣisi dahin’ shɛli, o daa bi lan teeg’ o napɔntamdigu la yɛla.

²Ti Duuma wurim Yaakubu zuliya ni be luɣ’ shɛŋa zaa, ka bi zo ba nambɔɣu. O suhuyiɣisili pam puuni ka o daa wurim Juda bipuɣiŋga yaa ni be luɣ’ shɛli polo la. O chɛ ka nama mini di nanim’ lu tiŋa n-nya filiŋ.

³O vuui Izraɛlnim’ yaa o suhuyiɣisili puuni. O daa yih’ o nuu ka chɛ ba bɛ dimnim’ ninni. O ŋmanila buɣim niɛm din diri Yaakubu zuliya sunsuuni n-di n-gili luɣilikam.

⁴O no n-gur’ o tɔbu kaman o nyɛla ti dima, ka zaŋ o nudirigu tiri ti kaman ti dim’ la. O ku ti ni daa mali ninvuɣ’ shɛb’ zaa nyuri bara Ziɔn bipuɣiŋga tanti suɣili puuni la. O chɛ ka o suhuyiɣisili yina kaman buɣim la.

⁵Ti Duuma kpalim ŋmanila ti dima. O wurim Izraɛl; O wurim di nanim’ yiya la zaa, ka wurim bɛ kpiɔŋ ni be luɣ’ shɛŋa la. O chɛ ka Juda bipuɣiŋga fabila min’ o kuhigu maan pahi.

⁶O wurim o suɣili la kaman ʒiɛvari puu la. O wurim o jɛmbu duu la. Yawɛ chɛ ka Ziɔnnim’ tam bɛ churi puhibu mini bɛ vuhim dabisa yɛla. O suhu ni yiɣisi pam zuɣu, o zaɣisila naa mini maligumaana.

⁷Ti Duuma zaɣis’ o sara maligu bimbini, ka chɛ o jɛmbu duu bahi. O zaŋ di nayili goma la niŋ bɛ bɛ dimnim’ nuu ni. Bɛ ʒiɛla Yawɛ jɛmbu duu n-yɔri nasara dibu vuri kaman chuɣu dal’ la.

⁸Yawɛ daa pun zali ni Ziɔn bipuɣiŋga gooni ni lu. O daa buɣisi li mi. O daa bi chɛ li wurimbu. O chɛ ka pihi mini goma fabili; di zaa bahila yoli.

⁹O dunɔdaya firi tiŋgban’ ni. Naawuni kabisi o dunokparita n-saɣim li. O naa mini nabihi bela tinzunnim’ sani. So bi lan wuhiri ba Naawuni yɛla, ka o daanabinim’ bi lan nyari ʒii Yawɛ sani.

¹⁰Ziɔn bipuɣiŋga kpamba fomi ʒi tiŋgban’ ni. Bɛ kɔrila taŋkpaɣu puɣi bɛ zuɣuri ka so buri. Jɛrusalɛm paɣisara zaŋla bɛ zuɣuri fi tiŋa.

¹¹N kuhimi hal ka n nimbihi ti fulim. Di biɛri m puuni. Bɛ ni ku n niriba shɛm maa zuɣu, n suhu saɣimmi, dama biliɛri mini biyaɣilima tarigimi lu tiŋ’ maa solɔri zuɣu.

¹²Bɛ kuhirimi niŋdi bɛ manima, “Bindirigu mini wain be ya?” Bɛ tarigiri luri tiŋ’ maa solɔri zuɣu kaman bɛ nyala dansi la, saha shɛli bɛ ni kpiri niŋdi bɛ manim’ nuhi ni la.

¹³Mbaye Jɛrusalɛm, wula ka n lee yɛn yɛli zaŋ chaŋ a polo? Bɔ ka n lee yɛn zaŋ a ŋmahindi? Ziɔn bipuɣiŋga ŋun nyɛ paɣipiɛliga ŋɔ, bimbɔ ka n lee yɛn zaŋ a ŋmahindi m-maag’ a suhu? Dama a daashaara maa galisim ŋmanila teeku ni galisi shɛm ŋɔ. Ŋuni n-lee ni tooi tib’ a?

¹⁴A daanabinim’ nyala ʒiinim’ din pa yɛlimaŋli mini ʒiinim’ din nyɛ yɔhiŋ. Bɛ bi kahigir’ a daalahichi wuhir’ a din ni chɛ ka a yi dabitim ni. Amaa bɛ tɔɣisirila anabitali yɛtɔɣa din nyɛ ʒiri, ka di kpɛh’ a yɔɣu.

¹⁵Bɛnkam zaa gariti kpahirila bɛ nuhi niŋd’ a. Bɛ maan’ a la ansarisi, ka gbaɣisiri bɛ zuɣuri niŋd’ a, nyin’ Jɛrusalɛm bipuɣiŋga. “Tin’ shɛli bɛ ni daa booni tin’ viɛlli zaa, ka nyɛ dunia zaa suhupiɛlli shee la m-bɔŋɔ?”

¹⁶A dimnim’ zaa yaala bɛ noya niŋ’ a. Bɛ chahirimi, ka dimdi bɛ nyina, ka kuhiri yɛra, “Ti naag’ o zaa. Ti ni daa guhiri dabisi’ shɛl’ la m-bala, ti bahi nya li.”

¹⁷Yawɛ niŋ o ni daa lo ni o niŋ shɛl’ la; o niŋ o ni daa yɛli kurimbuni ha ni o ni niŋ shɛl’ la. O wurim’ a ka bi lan zo a nambɔɣu. O chɛ ka a dimnim’ mali suhupiɛlli a zaɣ’ biɛɣu nyabu zuɣu, ka chɛ ka a dimnim’ maa nya yaa.

¹⁸Ziɔn bipuɣiŋga gooni, kuhimi pampam niŋ ti Duuma. Chɛ ka a nintam zɔri yuŋ mini wuntaŋ’ ni kaman kɔpaliga la. Miri ka a ti amaŋ’ vuhim, di chɛ ka a nina vuhi.

¹⁹Yiɣisima, kuhimi pampam zaawuni, tiŋguliba ni deeri tab’ tuma saha shɛl’ la. Chɛ ka a suhu saɣim pam ti Duuma tooni. Suhim’ o a bihi nyɛviya zuɣu; kum ni tarigi bi’ shɛb’ sɔŋ solɔɣu kam zuɣu la zuɣu.

²⁰Yawɛ, lihimi nya a ni darigi so tibili maa. Di luhiya ni paɣiba ŋubiri bɛ bihi? Bɛ ni dɔɣi bi’ shɛba? Di luhiya ni bɛ ku maligumaaniba mini anabinim’ ti Duuma jɛmbu duu?

²¹Bɛ ku ninkura mini bihi sɔŋ solɔri zuɣu; bɛ zaŋ takɔbiri ku m paɣisara mini n nachimba. A suhu ni daa yiɣisi dahin shɛl’ la ka a daa ku ba maa. A daa kɔrikɔri ba, ka nambɔzɔbo kani.

²²A chɛ ka n dimnim’ yi bɔba ni yaɣa ni laɣimna, kaman chuɣu dal’ la. Yawɛ suhu ni daa yiɣisi dahin shɛl’ la, bɛ ni so daa bi zo n-tiligi bee n-gali. N dimnim’ daa ku n ni daa dɔɣi bi’ shɛba n-wumsi ba la. N dimnim’ daa ku n ni daa dɔɣi bi’ shɛba n-wumsi ba la.