Read Dagbani Fabilanima 4 Bible Online

Fabilanima 4 - Dagbani bible

Fabilanima 4

¹Nyam’ salima la ni daɣi shɛm. Nyam’ salima alali la ni daɣi shɛm. Ka Naawuni jɛmbu duu kuɣ’ viɛla la wurim do soya zuɣu luɣilikam.

²Ziɔn nachimbihi daa ŋmanila salima ti sani. Nyam’ bɛ ni niŋ ba shɛm kaman yaɣiri duɣ’ shɛŋa yaɣimɛra ni zaŋ o nuhi me la.

³Hal kunduna gba chɛ ka bɛ bihi mɔɣira, amaa n niriba maa bɛn’ malila ninkuunsi kaman taatahi bɛn be mɔɣu ni la.

⁴Kɔnyuri gbaai biliɛɣu hal ka o lɔŋni ti kuui zaa. Bihi suhiri bindirigu, amaa ka so bi tiri ba shɛli.

⁵Bɛn daa diri bindir’ viɛla la nti kpiri kum solɔri zuɣu ŋɔ. Bɛ ni daa zaŋ nɛma nyaɣinyaɣi wumsi shɛb’ la nti do tampuya zuɣu ŋɔ.

⁶ Dama n niriba ŋɔ tibidarigibo maa galisi gari Sɔdomnim’ tibidarigibo la, din daa wurim nini pɔbbu ni neebu ka so nuu daa bi shihi li la.

⁷Di nabihi daa be kasi gari sakuɣa, ka piɛli gari bihim. Bɛ niŋgbuna daa mali alaafee. Bɛ zabiri viɛlim daa ŋmanila safaya kuɣa viɛlim.

⁸Pumpɔŋɔ bɛ nina ni sabigimi gari sala. So bi lan baŋdi ba soya zuɣu. Bɛ niŋgbuŋgbana kuumi pa bɛ kɔba zuɣu; di kuumi kaman dari la.

⁹Bɛ ni daa ku shɛb’ tɔb’ ni la daa so kum ni daa ku shɛba la. Bɛ daa mɔŋ ba puri ni bindirigu, ka kum ʒi ba chaŋ.

¹⁰ Hal paɣ’ shɛb’ bɛn nini zɔri nambɔɣu gba daa ti zaŋdila bɛ bihi duɣira. Bɛna n-daa leei bɛ bindirigu, bɛ ni daa kuri n niriba maa saha shɛli maa.

¹¹Yawɛ suhu daa yiɣisiya pam. O suhuyiɣisili din daa kɔŋ tim maa zuɣu ka o daa niŋ buɣim juui Ziɔn ka di di li zaa.

¹²Dunia ŋɔ nanim’ daa bi niŋ yɛda bee dunia ŋɔ ninvuɣ’ so ti niŋ yɛda ni dimnim’ ni tooi kpe Jɛrusalɛm puuni.

¹³Di daa nyɛla di daanabinim’ mini di maligumaaniba bɛn daa ku wuntizɔriba di puuni la daalahichi mini bɛ tuumbiɛri zuɣu.

¹⁴Bɛ daa leela zoomba n-dari gindi soya zuɣu, ka ʒim varim ba hal ka so ti ku tooi shihi bɛ binyɛra.

¹⁵Niriba daa tahirila bɛ zuɣu, “Wariya, daɣirinim’ ŋɔ. Wariya, wariya, di shihiya ti.” Dinzuɣu ka bɛ daa leei kuŋkɔɣinzɔriba mini bɛn dari ginda. Ka zuliya shɛb’ daa yɛri taba, “Bɛ ku lan be kpe yaha.”

¹⁶Yawɛ maŋmaŋa n-wurim ba, o baɣa lan ka bɛ ni. Maligumaaniba lan ka jilima, ka niriba bi lan niŋdi kpamba nirilim.

¹⁷Ti daa yulila sɔŋsim soli hal ka ti nini ti sabi, ti daa yuunila zuliya shɛb’ soli ni bɛ tiligi ti, ka bɛ daa bi tooi tiligi ti.

¹⁸Bɛ daa kul karitimi doli ti hal ka ti ti kɔŋ ti soya dolibu. Ti bahigu saha miriya; bɛ pun kali ti dabisa. Ti bahigu saha paaya.

¹⁹Bɛn daa kari doli ti maa daa guuri gari tɔrili ni yiɣiri zuɣusaa shɛm la. Bɛ daa kari doli ti la zoya zuɣu, bɛ daa gu ti la soli mɔɣu ni.

²⁰Yawɛ ni pii so, ka o nyɛ ti nyɛviya vuhim ŋɔ, bɛ daa gbaag’ o bɛ bɔɣa ni chaŋ. Ŋuna n-nyɛ ti ni daa yɛli ni ti ni kpe so mahim ni ka be dunia ŋɔ ni la.

²¹Nyin’ Ɛdom bipuɣiŋga ŋun be Uzi ŋɔ, kul lam’ ni suhupiɛlli. Bɛ ni zaŋ pipia maa ti a gba, ka a gba nyu n-kuli, ka pirig’ a zaɣim.

²²Ziɔn bipuɣiŋga, Naawuni darigi a tibili naai a tuumbiɛri maa zuɣu, o ku lan chɛ ka a be tinzun’ tiŋ’ ni. Amaa nyini Ɛdom bipuɣiŋga, a tuumbiɛri maa zuɣu, o ni darig’ a tibili. O ni yih’ a daalahichi maa palo.