Read Dagbani Fabilanima 5 Bible Online

Fabilanima 5 - Dagbani bible

Fabilanima 5

¹Yawɛ, teemi din niŋ ti la yɛla; lihimi ti ni nya filiŋ shɛm.

²Bɛ zaŋ ti fali ti saamba, ka zaŋ ti yiya ti tinzunnima.

³Ti leela kpibisi bɛn ka banima; ti manim’ nyɛla pakoya.

⁴Timaŋmaŋ’ kom ka ti lan ŋmaligi dari nyura, ka lan ŋmaligi yɔri timaŋmaŋ’ dari zuɣu.

⁵Bɛ zaŋ ʒi’ tibisa ʒili ti n-daari ti chana; di wum ti, ka bɛ bi chɛ ka ti vuhi.

⁶Ti daa lola Ijiptinim’ mini Asirianim’ alikauli ni bɛ tiri ti bindirigu ka ti diri tiɣira.

⁷Ti yaannim’ daa tum alahichi, bɛ lan kani, ka ti diri wahala bɛ daalahichi maa zuɣu.

⁸Daba n-su ti, ka so kani ŋun ni fa ti bɛ nuu ni bahi.

⁹Ti zaŋdila ti nyɛviya pari talima n-chani ti bɔri bindirigu na, dama tɔbutuhiriba be mɔɣu ni.

¹⁰Kum chɛ ka ti niŋgbuna biimi kaman duduhugu puuni la.

¹¹Bɛ bili paɣiba Ziɔn tiŋ’ puuni, ka bili paɣisara bɛn na ʒi dɔbba Juda fɔntinsi ni.

¹²Bɛ daa lo nanim’ nuhi n-zaŋ ba yili zuɣusaa. Bɛ bi tiri kpamba jilima.

¹³Bɛ daa muɣisiri nachimba ka bɛ niɛmdi zim, ka chɛ ka bidibisi ʒiri dabɔb’ kara chani ʒiɛhira.

¹⁴Ninkura yiɣisi dunɔdali gbini, ka nachimba chɛ bɛ biŋkumda ŋmɛbu.

¹⁵Ti suhupiɛlli la naaya. Ti wahi wabu la leela kuyila.

¹⁶Nam zuɣupiligu yi ti zuɣu ni lu. Mbusim be ti zuɣu, dama ti tum alahichi.

¹⁷Lala zuɣu ti suhuri saɣimmi; dimbɔŋɔnim’ zuɣu ti nina fulimmi.

¹⁸Ziɔn Zoli ni kpalim dabari, ka kunduna be di zuɣu gɔra.

¹⁹Amaa nyin’ Yawɛ n-su nam sahakam. A nam kul ʒiɛla ʒiɛmani kam ni.

²⁰Bɔzuɣu ka a tam ti yɛla zaa? Bɔzuɣu ka a chɛ ti bahi dabisi’ gbaliŋ ŋɔ zaa?

²¹Yawɛ, zaŋm’ ti labis’ a sani, ka chɛ ka ti lan lab’ a sanna. Chɛ ka ti lan labi ti biɛr’ kurili la ni.

²²Bee a kul zaɣisi ti mi zaa, ka a suhuyiɣisili maa lan ka maabu?