Read Dagbani Ɛzɛkiɛl 13 Bible Online

Ɛzɛkiɛl 13 - Dagbani bible

Ɛzɛkiɛl 13

¹Yawɛ daa yɛli ma,

²“Daadam, tɔɣisim’ anabitali yɛtɔɣa n-jɛndi Izraɛl anabinim’ bɛn tɔɣisiri anabitali yɛtɔɣa la, yɛlim’ bɛn zaŋ bɛmaŋmaŋ’ suhuyubu tɔɣisiri anabitali yɛtɔɣa la, ‘Wummiya Yawɛ yɛligu!’ ”

³Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Mbusim be anabi shɛb’ bɛn nyɛ jɛra, ka doli bɛmaŋmaŋ’ suhuyubu, ka bi nyari shɛli ŋɔ zuɣu.

⁴Yi daanabinim’ ŋmanila ŋɔri m-be Izraɛl dikilijina ni.

⁵Yi bi chaŋ dikiya din lu maa ni ti gu voya shee bee m-mali me gooni ti Izraɛlnima din ni chɛ ka tɔbu ti ku daai li luhi Yawɛ dabisili dali.

⁶Bɛ ʒii nyabu nyɛla ʒiri, ka bɛ daanabitali yɛtɔɣa nyɛ ʒiri. Bɛ yɛra, ‘Yawɛ yɛliya.’ Ka di mi pala Yawɛ n-tim ba. Amaa ka bɛ bɔri ni bɛ yɛligu maa niŋ pali.

⁷Yi ni nyari ʒii shɛŋa maa pala ʒiri? Ka yi daanabitali nyɛ ʒiri. Hal n yi bi yɛli shɛli, yi yɛrimi, ‘Yawɛ yɛliya.’ ”

⁸Dinzuɣu Yawɛ ŋun nyɛ yi Duuma ŋɔ ni yɛli shɛm m-bɔŋɔ: “Yi ni ŋmari ʒiri, ka nyari ʒii shɛŋa din pa yɛlimaŋli maa zuɣu, n suhu yiɣisimi bahi yi zuɣu. Yawɛ ŋun nyɛ yi Duuma ŋɔ n-yɛli lala maa.

⁹N ni darigi anabi shɛb’ bɛn nyari ʒii shɛŋa din pa yɛlimaŋli, ka bɛ tɔɣisiri ʒiri anabitali yɛtɔɣa ŋɔ tibili. Bɛ ti ku be n niriba laɣiŋgu ni, bɛ mi ti ku sabi bɛ yuya niŋ Izraɛlnim’ yuya litaafi ni. Bɛ ti ku kpe Izraɛl tiŋgbɔŋ ni. Ka yi baŋ ni mani n-nyɛ yi Duuma Yawɛ.

¹⁰ Yɛlimaŋli, bɛ nyɛla bɛn birigi n niriba ka yɛra, ‘Suhudoo beni.’ ka suhudoo mi kani. Ka n niriba maa yi me gooni, anabinim’ ŋɔ zaŋdila bimpiɛlli paligi li.

¹¹Yɛlim’ ninvuɣ’ shɛb’ bɛn niŋ bini paligi li la ni di ni lu. Sa’ titali ni mi, ka sakuɣ’ kara luna, ka sanʒiɛɣu ʒe.

¹²Ka gooni maa yi ti lu, bɛ ni bɔhi ya, ‘Yi ni daa zaŋ binshɛli paligi li la lee be ya?’ ”

¹³Dinzuɣu Yawɛ ŋun nyɛ yi Duuma ŋɔ ni yɛli shɛm m-bɔŋɔ: “N suhuyiɣisili puuni ka n yɛn chɛ ka sanʒiɛɣu maa ʒe, ka chɛ ka sa’ titali mi n sujee puuni, ka sakuɣ’ kara luna n suhuyiɣisili maa ni saɣim li.

¹⁴Ka n daai yi ni zaŋ bimpiɛlli paligi goon’ shɛli maa luhi tiŋa n-wurim li ka chɛ di tanzahi zali. Di ni ti lu n-kun ya, ka yi baŋ ni mani n-nyɛ Yawɛ.

¹⁵“Lala ka n ti yɛn yiɣisi n suhu bahi gooni maa mini ninvuɣ’ shɛb’ bɛn zaŋ bimpiɛlli paligi li maa zuɣu, ka yɛli ya, ‘Gooni maa lan kani, ka bɛn daa zaŋ bimpiɛlli paligi li maa gba lan kani.’

¹⁶Izraɛl anab’ shɛb’ tɔɣisiri anabitali yɛtɔɣa zaŋ chaŋ Jɛrusalɛm polo, ka nyari ʒiinima zaŋ chaŋ di suhudoo polo, ka suhudoo mi kani.” Yawɛ ŋun nyɛ yi Duuma ŋɔ n-yɛli lala ma.

¹⁷“Ka nyini daadam, lum’ a niriba bɛn bipuɣinsi zaŋ bɛmaŋmaŋ’ tɛha tɔɣisiri anabitali yɛtɔɣa la zuɣu. Tɔɣisim’ anabitali yɛtɔɣa jɛndi ba,

¹⁸ka yɛli ba, Yawɛ ŋun nyɛ ti Duuma ŋɔ ni yɛli shɛm m-bɔŋɔ: Mbusim be paɣ’ shɛb’ bɛn shɛri kana piriti nuchɛhi kam, ka wuɣiri sarisi pari ninvuɣ’ wɔɣila mini ninvuɣ’ jihi zaa zuɣuri ni m-bɔri ni bɛ di ninsalinim’ nyɛviya la zuɣu. Yi yɛn dila nyɛviya n niriba sunsuuni ka lee gbibi yimaŋmaŋ’ nyɛviya?

¹⁹Yi ta ma daɣiri n niriba sani, chi nukurigu pali mini bɔrɔbɔro chɛhi zuɣu. Yi kuri ninvuɣ’ shɛb’ bɛn bi simdi kubu, ka chɛri ninvuɣ’ shɛb’ bɛn bi simdi ni bɛ be, yi ni ŋmari ʒiri n niriba bɛn wumdi ʒiri yɛtɔɣa sani la zuɣu.”

²⁰Dinzuɣu Yawɛ ŋun nyɛ yi Duuma ŋɔ yɛliya: “Nyamiya, n je yi kan’ shɛŋa yi ni pirita ka zaŋ li diri n niriba nyɛviya maa. N ni dari chihi li yi nuhi ni ka chɛ ka yi ni mal’ li doli shɛba ni yi di bɛ nyɛviya kaman noonsi la nya bɛmaŋa.

²¹N ni lan chahi yi sarisi ŋɔ, ka fa n niriba bɛn be yi nuu ni maa bahi, ka bɛ ku lan be yi nuu ni n-nyɛ yi ni yɛn ku shɛba. Ka yi baŋ ni mani n-nyɛ Yawɛ.

²²“Yi ŋmari ʒiri n-chɛ ka wuntizɔriba suhuri gbarigira, hal n ni bi gbarigir’ bɛ suhuri maa zaa yoli; ka kpaŋsiri ninvuɣ’ biɛri kɔba ni ka bɛ bi niŋdi tuuba din ni chɛ ka bɛ tiligi bɛ nyɛviya.

²³Dinzuɣu yi ku lan nya ʒii shɛŋa din nyɛ ʒiri ŋɔ bee n-tum buɣijɛmbo tuma. N ni tiligi n niriba yi nuu ni. Di saha ka yi baŋ ni mani n-nyɛ Yawɛ.”