Read Dagbani Ɛzɛkiɛl 17 Bible Online

Ɛzɛkiɛl 17 - Dagbani bible

Ɛzɛkiɛl 17

¹Yawɛ daa yɛli ma,

²“Daadam, yɛlim’ Izraɛlnim’ saliŋ lɔhili. Yɛlim’ ba yɛtɔɣ’ ŋahili ŋɔ,

³yɛlim’ ba, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Tɔrili zaɣ’ titali ŋun daa mali kpiŋkpaŋ’ kara, ka o kpiŋkpan’ piɛma wɔɣa, ka o mali kɔb’ garigari pam daa ti ka Lɛbanɔn na. O daa gbaala sida tia

⁴wulikpani nyoli ni ŋ-ŋmaai di zaɣ’ maani n-zaŋ li chaŋ daabiligu tiŋgbɔŋ ni ti zaŋ li sa kɔhigɔriba tiŋ’ ni.

⁵Di nyaaŋa ka o daa zaŋ tiŋgbɔŋ maa ni bimbiɛlli ti biri kulim shee. Di daa nyɛla bimbilli din ʒe m-baɣi kom pam. O daa biri li mi kaman tia din zoora yomyom la.

⁶Ka di daa bili n-leela yɔɣili din zɔra, amaa ka lee bi do tiŋa, ka ŋmaligi kpala o polo. Ka di nyaɣa kul kpalim ʒe di zaashee. Lala zuɣu di daa leela yɔɣili n-niŋ wula mini vari.

⁷Ka tɔrili zaɣ’ titali so daa lan beni m-mali kpiŋkpan’ kara, ka mali kɔbiri pam. Nyama, ka yɔɣili maa ŋmaligi di nyaɣa kpa o polo, ka teei di wula kpa o polo ni o niŋ kom yɔɣi li, ka bɛ sibigi li bɛ ni biri li luɣ’ shɛli maa

⁸n-zaŋ li ti sa vuhim shee, kom ni be luɣ’ shɛli pam din ni chɛ ka di niŋ wula n-wali wala, ka niŋ yɔɣili din mali jilima.’

⁹Yɛlima, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Di ni baai? O ku darigi vuɣi di mini di nyaɣa, ka di wala pooi ka kuui ka chɛ ka di va’ maha paligi? Di pala nuu din mali kpiɔŋ bee tɔbbihi pam ka bɛ yɛn bona ka bɛ ti sibigi di mini di nyaɣa.

¹⁰Bɛ yi ti sibigi li sa, di ni baai? Wulimpuhili polo pɔhim yi ti ʒe li, di ku kuui zaa, di ku kuui bɛ ni daa biri li luɣ’ shɛli maa?’ ”

¹¹Dimbɔŋɔ nyaaŋa ka Yawɛ daa yɛli ma,

¹² “Pumpɔŋɔ bɔhimi duŋtaariba maa, ‘Yi bi mi dimbɔŋɔnim’ maa gbinni?’ Yɛlim’ ba,‘ Babilɔn naa n-daa ka Jɛrusalɛm na nti gbaai di naa mini di kpambaliba n-zaŋ ba kuli Babilɔn.

¹³Nimaani ka o daa yihi nabi’ yino n-lo o alikauli, ka chɛ ka o po pɔri. Ka o daa zaŋ tiŋ’ maa ni ninvuɣ’ zuɣuri zaa chaŋ

¹⁴ni di chɛ ka bɛ nam maa siɣisi dimaŋa, ka ku duhi dimaŋa. Ka di yi gbibi alikauli maa, dina n-ni chɛ ka di zani.

¹⁵Amaa ka o daa taai duŋ, ka tim tuumba Ijipti ni bɛ ti o yuri mini tɔbbihi pam na. O ni di nasara? Nira ŋun niŋ dimbɔŋɔnima ni tooi tiligi? O ni tooi saɣim alikauli ŋɔ ka tiligi?’ ”

¹⁶Yawɛ ŋun nyɛ ti Duuma ŋɔ yɛliya, “Hal ka mani ŋun be ŋɔ zuɣu, biɛhiŋ kani, na’ so ŋun daa leeg’ o nam ka o yuli ʒiɛm o ni daa po pɔri shɛli la, ka saɣim alikauli maa ni be luɣ’ shɛli din nyɛ Babilɔn maa ni ka o ni kpi.

¹⁷Bɛ ni ti kɔri taŋkpaɣu duhiduhi, ka me teei gili goma ni bɛ ku niriba pam. Firawuna min’ o tɔbbihi pam bɛn mali yaa ku tuhi tɔbu maa sɔŋ o.

¹⁸O ni daa lihi ʒiɛm o ni po pɔri shɛŋa, ka saɣim alikauli maa, ka lan zaŋ o nuu kpɛhi tuun’ shɛŋa ni ŋɔ zuɣu, o ku tiligi.”

¹⁹Yawɛ ŋun nyɛ ti Duuma ŋɔ ni yɛli shɛm m-bɔŋɔ, “Hal ka mani ŋun be ŋɔ zuɣu, biɛhiŋ kani, n ni labisi o ni ʒiɛm m pɔri shɛl’ la min’ o ni saɣim alikauli shɛli la ʒil’ o.

²⁰N ni labi laŋ’ pil’ o gbaag’ o n-zaŋ o chaŋ Babilɔn ti kar’ o saria nimaani, o ni taai duŋ niŋ ma la zuɣu.

²¹Ka bɛ ti zaŋ takɔbi ku o tɔbutuhiri’ biinsi zaa, ka bɛn mi ti gali ni wurim kpe luɣilikam. Ka yi ti baŋ ni man’ Yawɛ n-yɛli lala maa.”

²²Yawɛ ŋun nyɛ ti Duuma ŋɔ ni yɛli shɛm m-bɔŋɔ, “Mmaŋmaŋ’ ni ŋmaai sida tia wulikpani nyoli ni n-zaŋ li sa. N ni lan ŋmaai di wul’ polli din wɔɣa pam nyoli ni n-zaŋ li mmaŋmaŋa ti sa zo’ shɛli din du pam zuɣu.

²³Izraɛl tiŋgbɔŋ ni zo’ shɛli din du pam zuɣu ka n ti yɛn sa li. Ka di teei wula n-wali wala, ka leei sida ti’ titali. Ka noonsi balibu kam ni ti kana ti zaani di gbini. Ka noonsi balibu kam ni ti te bɛ tɛri di wula mahim ni.

²⁴Ka mɔɣu ni tihi zaa ti baŋ ni mani n-nyɛ Yawɛ. Mani n-zaŋdi ti’ wɔɣinli leeri ti’ jia. Mani zaŋdi ti’ jia leeri ti’ wɔɣinli. Mani n-chɛ ka ti’ mahili leeri ti kuŋ, ka chɛ ka ti’ kuŋ leeri ti’ mahili. Man’ Yawɛ n-yɛli lala maa, ka shiri ni niŋ li.”