Read Dagbani Ɛzɛkiɛl 20 Bible Online

Ɛzɛkiɛl 20 - Dagbani bible

Ɛzɛkiɛl 20

¹Yuun’ shɛli din daa pahiri yuma ayopɔin puuni gol’ so ŋun pahir’ anu biɛɣu pia dali ka Izraɛl kpamba shɛba daa kana ti ʒini n tooni ni bɛ bɔhi Yawɛ baŋ binshɛli.

²Ka Yawɛ daa yɛli ma,

³“Daadam, tɔɣisim’ Izraɛl kpamba maa yɛtɔɣa yɛli ba, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Bɔzuɣu ka yi kana? Yi yɛn bɔhi ma mi baŋ binshɛli? Yawɛ ŋun nyɛ ti Duuma ŋɔ yɛliya, Hal ka mani ŋun be ŋɔ zuɣu, yi ku bɔhi ma baŋ binshɛli.’

⁴Daadam, a ni kari ba saria? A ni kari ba saria? Di nyaaŋa ka a chɛ ka bɛ baŋ bɛ yaannim’ ni daa tum din chihiri shɛŋa,

⁵ka yɛli ba, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni daa pii Izraɛlnim’ dahin’ shɛli la, n daa po pɔri bɛn’ Yaakubu zuliya maa sani, ka zaŋ mmaŋ’ wuhi ba Ijipti tiŋgbɔŋ ni. N daa po pɔri yɛli ba, “Man’ Yawɛ n-nyɛ yi Naawuni.”

⁶ Dindali maa ka n daa po pɔri ni n ni yihi ba Ijipti tiŋgbɔŋ ni n zaŋ ba tahi tiŋgbɔn’ shɛli n ni pun bo n-zali ba ka di nyɛ tiŋgban’ shɛli din mali bihim mini shiri pam[4] ni, ka lan nyɛ tiŋgbɔn’ shɛli din mali jilima gari tiŋgbɔna zaa.

⁷N daa yɛli ba, “Yi zaa zaŋmiya yi ni yuri bimbiɛ’ shɛŋa la zaa labi, ka miriya ka yi zaŋ Ijipti buɣa la n-saɣim yimaŋa. Mani n-nyɛ Yawɛ ŋun nyɛ yi Naawuni.”

⁸Amaa ka bɛ daa taai duŋ niŋ ma, ka zaɣisi n yɛligu wumbu. Bɛ ninvuɣ’ yino gba daa bi zaŋ bɛ ni yu binshɛŋa ka Yawɛ je li maa bahi bee n-chɛ Ijiptinim’ buɣa la jɛmbu. Di saha ka n daa tɛhi ni n ni yiɣisi n suhu pam bahi bɛ zuɣu Ijipti tiŋgbɔŋ maa ni.

⁹Amaa n daa je ni n yuli saɣim bɛ mini zuliya shɛb’ bɛn be maa sani, dama bɛ zaa ninni ka n daa zaŋ mmaŋ’ wuhi ba, ka yihi ba Ijipti tiŋgbɔŋ maa ni.

¹⁰Dinzuɣu ka n daa yihi ba Ijipti tiŋgbɔŋ ni n-zaŋ ba chaŋ tiŋgban’ nɛli ni.

¹¹N daa wuhi ba n zalikpana mini n zaligu shɛŋa din pahi. Ka ŋunkam dol’ li ni be di zuɣu.

¹² Din pahi nyɛla n daa lan zaŋ n vuhim dabisa ti ba ka di leei shihirili m mini ba sunsuuni din ni chɛ ka bɛ baŋ ni man’ Yawɛ m-maani ba ka bɛ be kasi.

¹³ Amaa ka Izraɛlnim’ daa taai duŋ niŋ ma tiŋgban’ nɛli maa ni. Bɛ daa bi doli n zalikpana la, ka zaɣisi n zaligu shɛŋa din pahi la dolibu, din nyɛ nira ni yɛn doli shɛli ka mali nyɛvili la. Bɛ daa saɣim n vuhim dabisa maa pam. Ka n daa tɛhi ni n ni yiɣisi n suhu bahi bɛ zuɣu n-kpihim bɛ birili mɔɣu maa ni.

¹⁴Amaa n daa je ni n yuli saɣim n ni daa yihi ba zuliya shɛb’ ninni maa sani.

¹⁵ Din pahi nyɛla n daa po pɔri yɛli ba tiŋgban’ nɛli maa ni ni n ku lan zaŋ ba tahi n ni daa zaŋ tiŋgbɔn’ shɛli din mali bihim mini shiri pam, ka lan nyɛ tiŋgbɔn’ shɛli din mali jilima gari tiŋgbɔna zaa la ni,

¹⁶bɛ ni daa zaɣisi n zalikpana la mini n zaligu shɛŋa din pahi, ka saɣim n vuhim dabisa la zuɣu. Dama bɛ suhuri daa kul bela bɛ buɣa jɛmbu ni.

¹⁷Amaa n daa zo ba nambɔɣu, ka daa bi ku ba tiŋgban’ nɛli maa ni bee n-kpihim bɛ birili.

¹⁸N daa yɛli bɛ bihi tiŋgban’ nɛli maa ni, “Miriya ka yi doli yi banim’ zaligunim’ la bee n-gbibi bɛ kaya la bee n-zaŋ bɛ buɣa la jɛmbu saɣim yimaŋa.

¹⁹Man’ Yawɛ n-nyɛ yi Naawuni. Doliya n zalikpana la, ka gbibiya n zaligu shɛŋa din pahi la viɛnyɛliŋga,

²⁰ka zaŋya n vuhim dabisa la leei dabisa kasi, ka di leei shihirili m mini ya sunsuuni, ka yi baŋ ni man’ Yawɛ n-nyɛ yi Naawuni.”

²¹Amaa ka bɛ bihi maa daa taai duŋ niŋ ma. Bɛ daa bi doli n zalikpana la bee n-gbibi n zaligu shɛŋa din pahi la viɛnyɛliŋga. Din nyɛ nira ni yɛn doli shɛŋa ka mali nyɛvili la. Bɛ daa saɣim n vuhim dabisa. Di saha ka n daa tɛhi ni n ni yiɣisi n suhu bahi bɛ zuɣu tiŋgban’ nɛli maa ni.

²²Amaa n daa bi lan niŋ lala, dama n daa je ni n yuli saɣim lala zuliyanim’ maa sani. Dama bɛ ninni ka n da yihi ba na.

²³ Din pahi nyɛla n daa lan po pɔri tiŋgban’ nɛli maa ni ni n ni wurim ba kpɛhi zuliya shɛb’ ni mini tiŋgbɔŋ shɛŋa ni,

²⁴bɛ ni daa bi doli n zalikpana maa, amaa ka zaɣisi n zaligu shɛŋa din pahi la dolibu, ka saɣim n vuhim dabisa, ka chɛ ka bɛ nini kul moola bɛ yaannim’ buɣa jɛmbu zuɣu la.

²⁵Ka din pahi nyɛla n daa zaŋ zalikpan’ shɛŋa din bi viɛla mini zaligu shɛŋa din ni chɛ ka bɛ ku be n-ti ba.

²⁶Ka n daa ta ba daɣiri bɛmaŋmaŋ’ pina tibu ni din nyɛ bɛ bidib’ tuuli kam zaŋ mali sara puuni ni di chɛ ka bɛ suhuri saɣim din ni chɛ ka bɛ baŋ ni mani n-nyɛ Yawɛ.’

²⁷Dinzuɣu daadam, tɔɣisim’ Izraɛlnim’ yɛtɔɣa yɛli, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Dimbɔŋɔ puuni yi yaannim’ daa lan mo ma bɛ ni daa bi ʒe ma yim la puuni.

²⁸Dama n ni daa zaŋ ba tahi tiŋgbɔn’ shɛli n ni daa pɔ pɔri ni n ni zaŋ ti ba la ni, di saha bɛ daa yi kul nya daboli din du bee ti’ mahali kam, bɛ maanila maligunim’ nimaani n-chɛ ka n suhu yiɣisira bɛ maligunim’ maa zuɣu. Nimaani ka bɛ daa tuɣindi bɛ tulaale zim, ka maani binnyura maligunima.

²⁹Ka n daa bɔhi ba, “Buɣ’ din’ ni ka yi lee chani maa?” Dinzuɣu ka bɛ booni nimaani yuli Bama[5] hal ni zuŋɔ.’

³⁰Dinzuɣu yɛlim’ Izraɛlnima, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Yi yɛn saɣim la yimaŋa kaman yi yaannim’ ni daa saɣim bɛmaŋ’ shɛm maa, ka gba birigi jɛmdi n ni je bɛ binshɛŋa maa?

³¹Yi ni maani yi maligunima, ka zaŋdi yi bidibisi nyɔri buɣim la, yi tarila yimaŋ’ daɣiri n-tabili yi buɣa maa hal ni zuŋɔ. Izraɛlnima, yi bɔri ni yi bɔhi ma baŋ shɛli n sani?’ Yawɛ ŋun nyɛ ti Duuma ŋɔ yɛliya, ‘Hal ka mani ŋun be ŋɔ zuɣu, yi ku bɔhi ma baŋ shɛli.

³²Yi ni lo shɛli yi suhuri ni maa ku niŋ. Yi ni tɛhi shɛm nyɛla, ‘chɛ ka ti gba be kaman zuliya shɛb’ ni be shɛm tiŋgbɔn’ shɛŋa ni, ka jɛmdi dari mini kuɣa.’

³³Yawɛ ŋun nyɛ ti Duuma ŋɔ yɛliya, ‘Hal ka mani ŋun be ŋɔ zuɣu, biɛhiŋ kani, n yɛn zaŋla nuu din mali kpiɔŋ mini bɔɣu din teei ni suhuyiɣisili pam ka di nyɛ yi naa sun ya.

³⁴N ni zaŋ nuu din mali kpiɔŋ mini bɔɣu din teei ni suhuyiɣisili pam maa yihi ya yi ni wurim be zuliya shɛb’ sani tiŋgbɔn’ shɛŋa zaa ni na

³⁵nti zaŋ ya chaŋ niriba maa tiŋgban’ nɛli ni, ka m mini ya gbɛri ti kpa taba, ka n kari ya saria.

³⁶N ni daa kari yi yaannim’ saria Ijipti tiŋgbɔŋ ni tiŋgban’ nɛli ni shɛm la, lala ka n yɛn kari yi gba saria. Yawɛ ŋun nyɛ ti Duuma ŋɔ n-yɛli lala maa.

³⁷N ni zaŋ n jaaŋgbee taɣi ya, ka lɔn ya alikauli.

³⁸N ni ti yihi yi ni bɛn nyɛ duŋtaariba la mini bɛn birigi n sani la bahi. N ni ti yihi ba bɛ ni be tiŋgbɔn’ shɛli ni nyɛ saamba la na, amaa bɛ ti ku kpe Izraɛl tiŋgbɔŋ ni. Di saha ka yi ni ti baŋ ni mani n-nyɛ Yawɛ.’

³⁹Yawɛ ŋun nyɛ ti Duuma ŋɔ ni yɛli shɛm m-bɔŋɔ: ‘Yinim’ Izraɛlnima, yi yi ku wum n yɛligu, sokam ŋun cham’ ti jɛm o buɣa pumpɔŋɔ zaŋ chana. Amaa miriya ka yi lan zaŋ yi buɣa mini yi pina ta n yuli din be kasi ŋɔ daɣiri.’

⁴⁰Yawɛ ŋun nyɛ ti Duuma ŋɔ yɛliya, ‘N zoli din be kasi ka nyɛ Izraɛl zoli din du pam la zuɣu ka Izraɛlnim’ zaa ni ti jɛm ma tiŋgbɔŋ maa ni. Nimaani ka n ni ti deei ba. Nimaani ka n ni ti bɔri ni yi zaŋdi tɔtɔnim’ mini yi pin’ gahinda ni bin suma zaa na ti tiri ma.

⁴¹N yi yihi ya yi ni wurim be tiŋgbɔn’ shɛŋa ni maa zaa na, n ni ti deei ya kaman sara shɛli din nyom viɛl’ la, ka chɛ ka n kasitali yi zahira yi sani yi ni be zuliya shɛb’ sani maa ninni.

⁴²Ka n yi ti zaŋ ya tahi Izraɛl tiŋgbɔŋ ni, n ni daa po pɔri ni n ni zaŋ tiŋgbɔn’ shɛli ti yi yaannim’ la ni, yi ni baŋ ni mani n-nyɛ Yawɛ.

⁴³Nimaani ka yi ni ti teei yi biɛhigu mini yi ni daa tum tuun’ shɛŋa zaa n-saɣim yimaŋ’ la yɛla, ka galim yimaŋa yi ni daa tum tuumbiɛ’ shɛŋa maa zuɣu.

⁴⁴Yinim’ Izraɛlnima, n yi ti niŋ ya din viɛla n yuli zuɣu ka pa ni yi tuumbiɛri mini yi biɛri yoli ni simdi shɛm zuɣu, yi ni baŋ ni mani n-nyɛ Yawɛ.’ Yawɛ ŋun nyɛ ti Duuma ŋɔ n-yɛli lala maa.”

⁴⁵Ka Yawɛ daa yɛli ma,

⁴⁶“Daadam, zaŋm’ a nini kpa nudirigu polo n-yihi waazu jɛndi nudirigu polo maa, ka tɔɣisi anabitali yɛtɔɣa jɛndi Nɛgɛb nyɔŋ.

⁴⁷Yɛlim’ Nɛgɛb nyɔŋ maa, ‘Wummi Yawɛ yɛligu. Yawɛ ŋun nyɛ ti Duuma ŋɔ yɛliya: N ni niŋ buɣim juug’ a ka di di ti’ mahili kam mini ti’ kuŋ kam din be a ni. Ka di buɣim zilima ti ku kpi, ka di ni ti wɔbi nudirigu polo mini nuzaa polo nim’ zaa nina ni.

⁴⁸Ka sokam ti nya ka di nyɛla man’ Yawɛ n-juui buɣim maa, ka di ku kpi.’ ”

⁴⁹Di saha ka n daa yɛli, “Oi, Yawɛ ŋun nyɛ ti Duuma ŋɔ! Bɛ kul yɛrila n yɛla yɛra, ‘Pa saliŋ lɔha ka o lɔhi maa?’ ”