Read Dagbani Ɛzɛkiɛl 21 Bible Online

Ɛzɛkiɛl 21 - Dagbani bible

Ɛzɛkiɛl 21

¹Ka Yawɛ daa yɛli ma,

²“Daadam, zaŋm’ a nini kpa Jɛrusalɛm polo n-yihi waazu jɛndi bɛ luɣ’ shɛŋa din be kasi. Tɔɣisim’ anabitali yɛtɔɣa jɛndi Izraɛl tiŋgbɔŋ,

³ka yɛli di tiŋgbɔŋ maa, ‘Yawɛ ni yɛli shɛm m-bɔŋɔ: N je a yɛlli, n ni ŋooi n takɔbi di tɔɣu ni n-ku wuntizɔriba mini ninvuɣ’ biɛri zaa bɛn be a ni.

⁴Ka n ni yɛn ku wuntizɔriba mini ninvuɣ’ biɛri zaa bɛn be a ni maa zuɣu, n takɔbi ni yi di tɔɣu ni n-ku sokam bɛn be nudirigu polo mini nuzaa polo zaa.

⁵Ka sokam ti baŋ ni man’ Yawɛ n-shiri ŋooi n takɔbi maa di tɔɣu ni ka ku lan labisi li su di tɔɣu maa ni yaha.’

⁶Dinzuɣu daadam, ŋuhima; ŋuhimi ni suhusaɣiŋgu mini biɛrim pam bɛ ninni.

⁷Ka bɛ yi bɔh’ a, ‘Bɔzuɣu ka a ŋuhira?’ nyin’ yɛlim’ ba, ‘Lahibali shɛli din kana ŋɔ zuɣu.’ Sokam suhu ni saɣim, ka bɛ bɔɣiri chɔɣisi, ka bɛ tarigi, ka bɛ duna ni chɔɣisi. Nyama di nyɛla din kanna, ka ni niŋ pali. Yawɛ ŋun nyɛ ti Duuma ŋɔ n-yɛli lala maa.”

⁸Ka Yawɛ daa lan yɛli ma,

⁹“Daadam, tɔɣisim’ anabitali yɛtɔɣa yɛli, Ti Duuma ni yɛli shɛm m-bɔŋɔ: Bɛ sahi takɔbi, ka nyɛhi li ka di neei.

¹⁰Bɛ sahi li mi ni bɛ ku niriba, ka so n-neei li ni di nyaɣisira kaman saa nyaɣisibu la. Yi lihi ʒiɛm fiɛbiga mini tibidarigibo kam zaa, wula ka ti lee yɛn niŋ mali suhupiɛlli?

¹¹Bɛ zaŋ takɔbi maa ti ni bɛ nyɛhi li ka di neei, ka bɛ zaŋ li gbibi nuu ni. Bɛ sahi takɔbi maa, ka nyɛhi li ka di neei ni bɛ zaŋ li niŋ ninvuɣ’ so ŋun kuri niriba nuu ni.

¹²Daadam, kummi ka fabili, dama di nyɛla din yɛn lu n niriba zuɣu, di nyɛla din yɛn lu Izraɛl nanim’ zaa zuɣu. Bɛ ni zaŋ takɔbi maa ku bɛ mini n niriba. Mbaye! Kpahimiya yi gbalipina.

¹³Dama zahimmiya: Bɔ n-lee kpalim? Yi yi lihi ʒiɛm fiɛbiga, lala ku niŋ? Yawɛ ŋun nyɛ ti Duuma ŋɔ n-yɛli lala maa.

¹⁴“Dinzuɣu daadam, tɔɣisim’ anabitali yɛtɔɣa. Kpahim’ a nuhi, ka chɛ ka takɔbi din ni ku niriba lu buyi bee buta. Di nyɛla takɔbi din kura, ka nyɛ takɔbi din ni ku niriba pam. Di gili ba mi niŋ sunsuuni.

¹⁵Dinzuɣu niriba suhuri fuŋya, ka niriba pam tuura. N zaŋ takɔbi maa naŋgbancholi zali bɛ dunoya zaa ni. Bɛ mal’ li mi ka di nyaɣisira ka saa la. Ka nyahi neei li ni di ku niriba.

¹⁶Ŋmam’ nudirigu polo, ka ŋma nuzaa polo! Bɛ ni kul zaŋ a noli kpa luɣ’ shɛlikam polo.

¹⁷Man’ gba ni kpahi n nuhi, ka tum n suhuyiɣisili tuma. Man’ Yawɛ n-yɛli lala maa.”

¹⁸Ka Yawɛ daa lan yɛli ma,

¹⁹“Daadam, malimi soya ayi ka di zaa yi tiŋgbɔn yin’ ni na, ka Babilɔn naa dol’ li kana. Sabimi pa dapaɣa zuɣu n-zaŋ li sa sochira zuɣu wuhi so’ shɛli din kpɛri tiŋ’ puuni.

²⁰Malimi soli ti takɔbi maa ka di ka Raba din nyɛ Ammɔnnim’ tiŋ’ la ni na bee n-ka Juda mini Jɛrusalɛm din nyɛ bɛ ni me gooni gili tin’ shɛli la ni na.

²¹Dama Babilɔn naa maa ʒiɛla sochira zuɣu ni o vihi nya o ni yɛn doli so’ shɛli. O chaɣisi piɛma,[6] ka niŋ buɣa saawara, ka vihi maligu biŋkɔbigu binsabili.

²²Din yɛn ku Jɛrusalɛmnim’ maa yɛn yila nudirigu polo na, ka o ti me tɔbutuhiri’ bimbina din sirigi tiŋa. O ni ti moli ninvuɣ’ kubo molo, ka bu tɔbu zambu. O ni kɔri tɔbutuhiri’ bimbina duhiduhi dunɔdaya ni, ka me bimbina, ka me teei gili binwɔɣila.

²³Amaa bɛn’ sani, di ni ti ŋmanila ʒiri baɣiri, bɛ pun po pɔri, amaa ŋun’ teeri ba la bɛ taali ni nyɛ shɛli ni di chɛ ka bɛ gbahi ba.

²⁴Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ, ‘Yi ni chɛ ka bɛ teei yi tuumbiɛri yɛla, ka yi biriginsim yi palo, ka yi daalahichi yi palo yi tuuni kam puuni, ka di zuɣu chɛ ka bɛ teei yi yɛla la zuɣu, bɛ ni gbahi ya bɛ nuhi ni.

²⁵Ka nyini Izraɛl na’ biɛɣu ŋun dabisa pali ŋɔ, a tibidarigibo din bahindi nyaaŋa saha paaya.

²⁶Yawɛ ŋun nyɛ ti Duuma ŋɔ ni yɛli shɛm m-bɔŋɔ: Viligim’ a baŋtabiga, ka piligi a nam zuɣupiligu. Binyara bi la yɛn be kaman di ni daa be shɛm. Duhimiya tarimba, ka siɣisi bɛn duhiri bɛmaŋa.

²⁷Wurimbu, wurimbu, n ni wurim li! Di tatabo na ʒi n-niŋ. Naɣila ŋun mali soli ni o su li maa ti kana, ka n zaŋ li ti o.’ ”

²⁸Ka nyini daadam, tɔɣisim’ anabitali yɛtɔɣa yɛli, ‘Yawɛ ŋun nyɛ ti Duuma ŋɔ ni yɛli shɛm zaŋ chaŋ Ammɔnnim’ mini bɛ vi tuma polo m-bɔŋɔ: Yɛlima, ‘Takɔbi, bɛ ŋooi takɔbi ni bɛ ku niriba! Bɛ nyɛhimi neei li ni di ku niriba, ka di nyaɣisiri kaman saa la.

²⁹Bɛ nyarila ʒiinim’ din nyɛ ʒiri tir’ a, bɛ buɣirila ʒiri baɣiri tir’ a. Bɛ zaŋ a mi pa ninvuɣ’ yoya mini ninvuɣ’ biɛri nyiŋgoya zuɣu. Ninvuɣ’ shɛb’ bɛn dabisili pali, ka nyɛ tibidarigibo din bahindi nyaaŋa saha.

³⁰Labisim’ li su di tɔɣu ni. N yɛn kari ya la saria n ni daa nam ya luɣ’ shɛl’ la, tiŋgban’ shɛli din nyɛ yi piligu shee la ni ka n yɛn kari ya saria.

³¹N ni ti yiɣisi n suhu pam bahi yi zuɣu, ka pɔbisi n suhuyiɣisili buɣim bahi yi zuɣu, ka zaŋ ya niŋ putɔɣunim’ bɛn mi niriba kubu looloochi nuu ni.

³² Bɛ ni ti zaŋ ya leei dari mali buɣim, ka yi ʒim ti kpe tiŋgban’ ni, ka so ku lan teei yi yɛla.’ Man’ Yawɛ n-yɛli lala maa.”