Read Dagbani Ɛzɛkiɛl 22 Bible Online

Ɛzɛkiɛl 22 - Dagbani bible

Ɛzɛkiɛl 22

¹Ka Yawɛ daa bɔhi ma,

²“Nyin’ daadam, a ni kari saria, a ni kari tin’ shɛli nim’ bɛn kuri niriba ŋɔ saria? Di nyaaŋa ka a yɛli ba bɛ ni tum din chihiri shɛŋa zaa.

³A ni ti yɛli, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Tin’ shɛli puuni bɛ ni kuri niriba, ka maani buɣa n-ta bɛmaŋ’ daɣiri la saha paaya.

⁴Yi kpe taali ni yi ni ku ninvuɣ’ shɛb’ la zuɣu, ka ta yimaŋ’ daɣiri yi ni maani buɣa la zuɣu. Yi chɛ ka yi dabisili mirina. N ni daa zali ya yuun’ shɛl’ la paaya. Dinzuɣu n ni chɛ ka yi di vi zuliya kam sani, ka tiŋgbɔn’ shɛŋa nim’ mali ya ansarisi.

⁵Tin’ shɛŋa din be yoma mini tin’ shɛŋa din be katinsi zaa ni ti mali ya ansarisi, tin’ shɛli din yuli bi du ka gadama pali di ni ŋɔ.

⁶Izraɛl zuɣulaannim’ bɛn be a ni zaŋla bɛmaŋmaŋ’ yiko kuri niriba.

⁷ Bihi banim’ mini bihi manim’ nya filiŋ a ni. Ka bɛ fari saamba bɛn be bɛ sani nɛma, ka niŋdi kpibisi mini pakoya din bi tuhi.

⁸ Yi lihi ʒiɛm m binshɛŋa din be kasi la, ka bi tiri n vuhim dabisa jilima.

⁹Ninvuɣ’ shɛb’ be a ni ŋ-ŋmari ʒiri ka kuri niriba, ka shɛb’ be a ni n-diri bindira zoya zuɣu ka be biɛriyoli.

¹⁰Bɛ mali bɛ banim’ paɣiba doon’ a ni. Bɛ muɣisiri paɣ’ shɛb’ bɛn nya sɔrilim ka di na bi naai m-mali ba doon’ a ni.

¹¹ Shɛb’ mali bɛ tab’ paɣiba doon’ a ni, ka shɛb’ mi tumdi daɣiri tuma, ka mali bɛ bihi paɣiba doon’ a ni, ka shɛb’ mi mali bɛ tizɔpaɣiba bɛn nyɛ bɛ manim’ nyintahi bipuɣinsi doon’ a ni.

¹² Bɛ diri birapu ka kuri niriba a ni. Yi paŋdi niriba binyara ka niŋdi ba nyɔri, ka pahiri yi nɛma daa n-fari yi taba nyari buni ka tam n yɛla. Yawɛ ŋun nyɛ ti Duuma ŋɔ n-yɛli lala maa.

¹³Nyama, n kpahi n nuhi bah’ a zuɣu a ni zaŋ zalinsi soya nya bun’ shɛŋa maa min’ a ni ku ninvuɣ’ shɛb’ a ni la zuɣu.

¹⁴N yi ti yɛn darig’ a tibili dahin’ shɛli, a ni tooi mali suhukpeeni bee a nuhi ni tooi mali yaa? Man’ Yawɛ n-yɛli lala maa, ka mi ni niŋ li.

¹⁵N ni wurim ya kpɛhi zuliya shɛb’ ni, ka kari ya kpɛhi tiŋgbɔn’ shɛŋa ni, ka lala maa chɛ ka m paɣi yi ni daɣiri maa bahi.

¹⁶Ka bɛ ti tan ya daɣiri zuliyanim’ maa ninni, ka yi baŋ ni mani n-nyɛ Yawɛ.’ ”

¹⁷Ka Yawɛ daa yɛli ma,

¹⁸“Daadam, Izraɛlnim’ leela saɣiri n sani. Bɛ zaa bɛn nyɛ anzinfa mini daanya ni samafuu ni kurugu ni dalima ŋɔ, bɛ nyɛligibu shee ka bɛ daa leei saɣiri.

¹⁹Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: Yi zaa ni leei saɣiri maa zuɣu, n ni laɣim ya sɔŋ Jɛrusalɛm tiŋ’ sunsuuni.

²⁰Kaman niriba ni kul zaŋdi anzinfa mini daanya ni kuriti ni samafuu ni dalima n-niŋdi binshɛli din nyɛligiri binyara ni, ka vibiri buɣim niŋdi li ni di nyɛligi shɛm la, lala ka n ti yɛn zaŋ ya niŋ n sujee mini n suhuyiɣisili puuni n-nyɛligi ya.

²¹N ni ti zaŋ ya niŋ ka vibi n suhuyiɣisili buɣim niŋ ya, ka yi ti nyɛligi di puuni.

²²Kaman anzinfa ni nyɛligiri binshɛli din nyɛligiri binyara puuni shɛm la, lala ka yi ni ti nyɛligi di puuni, ka yi ti baŋ ni man’ Yawɛ n-yiɣisi n suhu bahi yi zuɣu maa.”

²³Ka Yawɛ daa yɛli ma,

²⁴“Daadam, yɛlim’ di tiŋgbani maa ni di nyɛla tiŋgban’ shɛli din bi yi daɣiri ni bee saa ni bi mi n-niŋ tiŋgban’ shɛli ni suhuyiɣisili dabisili dali.

²⁵Anabinim’[7] bɛn be di puuni naala noli n-lo nia biɛri. Bɛ ŋmanila gbuɣima n-dariti tɔhiri bɛ ni gbahi binshɛŋa ka ŋumda. Bɛ di ninsalinim’ nyɛviya, ka fa azichi mini binviɛla, ka chɛ ka pakoya galisi.

²⁶ Di maligumaaniba birigi n zaligunima, ka ta m binshɛŋa din be kasi daɣiri. Bɛ bi woligiri binshɛŋa din be kasi mini binshɛŋa din bi be kasi. Bɛ mi bi wuhiri niriba binshɛŋa din be kasi mini binshɛŋa din bi be kasi kɔŋkɔba ni nyɛ shɛm. Ka bɛ baɣa ka n vuhim dabisa ni; ka lala zuɣu chɛ ka bɛ ta ma daɣiri bɛ sani.

²⁷Kpambaliba bɛn be di ni ŋmanila kunduna n-dariti tɔhiri bɛ ni gbahi binshɛŋa, ka kuri niriba ni bɛ doli bibiɛlim soya nya buni.

²⁸Di daanabinim’ zanila bɛ zaani n-zaŋ piɛnta piɛlli paligi bɛmaŋa, ka nyari ʒii shɛŋa din nyɛ ʒiri, ka buɣiri ba ʒiri baɣiri yɛra, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ.’ Amaa ka Yawɛ bi yɛli shɛli.

²⁹Tiŋgbɔŋ maa nim’ nyɛla bɛn fari niriba mini ŋmɛnditoya. Bɛ muɣisiri faranim’ mini nandaamba, ka fari saamba nɛma, ka bi labisiri li tiri ba.

³⁰Ka n daa lihi bɔri bɛ ni ninvuɣ’ so ŋun ni mali me gooni maa zali, ka zani tiŋgbɔŋ maa nim’ zaani gooni maa voli ni n tooni din ni chɛ ka n ku wurim li, amaa ka bi nya so.

³¹Dinzuɣu ka n daa yiɣisi n suhu bahi bɛ zuɣu, ka chɛ ka n suhuyiɣisili buɣim di ba, ka n labisi bɛ tuumbiɛri maa ʒili ba. Yawɛ ŋun nyɛ ti Duuma ŋɔ n-yɛli lala maa.”