Read Dagbani Ɛzɛkiɛl 23 Bible Online

Ɛzɛkiɛl 23 - Dagbani bible

Ɛzɛkiɛl 23

²“Daadam, paɣiba ayi n-daa beni, bɛ daa nyɛla paɣ’ yino bihi.

³Ka bɛ daa be Ijipti n-tumdi pagɔrisigu tuma. Bɛ bilim ni ka bɛ daa kul tumdi pagɔrisigu tuma maa. Nimaani ka bɛ daa tabisi bɛ biha, ka zaŋ ba saɣim.

⁴Kpɛm’ sani yuli n-daa booni Ohola,[8] ka o tizo maa mi yuli booni Oholiba.[9] Ka n daa kpuɣi ba leei m paɣiba, ka bɛ dɔɣi bidibisi mini bipuɣinsi. Bɛ yuya maa ni wuhi shɛm m-bɔŋɔ: Ohola nyɛla Samaria, ka Oholiba mi nyɛ Jɛrusalɛm.

⁵Ohola ni daa kul nyɛ m paɣa maa zaa yoli, o daa na kul tumdila pagɔrisigu tuma. O kɔre daa kul bela o mamanim’ bɛn nyɛ Asirianim’

⁶bɛn daa nyɛ tɔbbihi bɛn ye binyɛr’ sabilifaa la ni. Bɛ shɛb’ daa nyɛla Gomnanima, ka shɛb’ nyɛ sapashinnima. Bɛ zaa daa nyɛla nachimbihi viɛla bɛn nyɛ wɔribariba.

⁷O daa niŋ Asiria ninvuɣ’ gahinda zaa nirilim, ka saɣim omaŋa o ni niŋ ninvuɣ’ shɛb’ kɔre maa buɣa jɛmbu ni.

⁸O daa bi chɛ o ni daa tumdi pagɔrisigu tuun’ shɛli Ijipti tiŋgbɔŋ ni maa. Dama o bilim ni ka dɔbba daa pun niŋ o kɔre n-zaŋ o saɣim.

⁹Dinzuɣu ka n daa zaŋ o niŋ o mamanim’ bɛn nyɛ Asirianim’ shɛb’ o ni daa niŋ kɔre maa nuu ni.

¹⁰Ka bɛ daa pirig’ o o zaɣim, ka fa o bidibisi mini bipuɣinsi, ka zaŋ takɔbi ku o. Bɛ daa kar’ o saria, ka o leei paɣiba ni maani so ansarisi.

¹¹O tizo Oholiba daa nya dimbɔŋɔ, amaa ka o pagɔrisigu tumbu min’ o kɔre daa bie n-gar’ o biɛli maa dini.

¹²O daa niŋ Asiria Gomnanim’ mini sapashinnim’ ni tɔbbihi bɛn zaŋ tɔbutuhiri’ nɛma niŋ bɛmaŋa ni bɛn nyɛ wɔribariba kɔre. Bɛ zaa daa nyɛla nachimbihi viɛla.

¹³Ka n daa nya ka o saɣim pam. Bɛ niriba ayi maa zaa daa dolila so’ yini.

¹⁴Amaa ka o daa zaŋ o pagɔrisigu tuma maa chaŋ katiŋa. O daa nya bɛ ni mali dɔbba kɔtomsi pa dukpini zuɣu. Di daa nyɛla Babilɔnnim’ anfooni ka bɛ mali pa dukpina zuɣu, ka bɛ ye neen ʒiɛfaa,

¹⁵ka zaŋ gbana lo bɛ shɛhi ni, ka vili baŋtab’ viɛla, bɛ zaa daa ŋmanila sapashinnima. Bɛ daa nyɛla Babilɔnnima bɛn daa nyɛ Kalidia tiŋbihi la.

¹⁶O ni daa kul nya ba, ka o kɔre kpe bɛ ni, ka o tim tuumba bɛ sani Kalidia tiŋgbɔŋ ni.

¹⁷Ka Babilɔnnim’ maa daa kana ka o mini ba ti dɔni, ka bɛ daa zaŋ bɛ kɔre maa saɣim o, o ni daa saɣim omaŋ’ maa nyaaŋa, ka o daa yi bɛ sani chaŋ ni suhuyiɣisili.

¹⁸O ni daa yi zahira tumd’ o pagɔrisigu tuma, ka yihir’ omaŋ’ fini shɛm maa daa chɛ ka n ŋmalig’ o sani ni suhuyiɣisili kaman n ni daa ŋmaligi ka chɛ o biɛli shɛm la.

¹⁹Amaa ka o pagɔrisigu tuma maa daa lan pahi, ka o lan teeg’ o bilim saha o ni daa tumdi pagɔrisigu tuun’ shɛŋa Ijipti tiŋgbɔŋ ni la yɛla.

²⁰Ka o kɔre daa kul be o mamanim’ bɛn yoya be kaman bunsi yoya, ka bɛ bɔri paɣiba kaman yuri la ni.

²¹Lala ka a daa yu pagɔrisigu tuma a bilim ni, ka Ijiptinim’ daa tabisi a paɣisari’ biha ka zaŋ a saɣim la.

²²Dinzuɣu Oholiba, Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni chɛ ka a ni ŋmalig’ a mamanim’ shɛb’ sani chaŋ ni suhuyiɣisili la suhuri yiɣisi bahi a zuɣu, ka n chɛ ka bɛ yi luɣilikam na ti lir’ a.

²³Bɛna n-daa nyɛ Babilɔnnim’ mini Kalidianim’ zaa ni Pɛkɔdnima ni Shɔanima ni Kɔanima ni Asirianim’ zaa. Bɛ zaa nyɛla nachimbihi viɛla, ka gomnanim’ mini sapashin’ kpamba ni sapashinnim’ ni tɔbbihi ni ti be bɛ ni. Bɛ zaa ni ti nyɛla wɔribariba.

²⁴Bɛ ni ti zaŋ niriba mini chɛchɛbunsi ni tɔrokɔnim’ yi nuzaa polo na ti lir’ a. Bɛ ni ti zaŋ nyɔtaɣiribihi mini zaɣ’ kara ni kuriti zuɣupila yi luɣilikam na ti lir’ a. Ka n ti zaŋ saria karibu niŋ bɛ nuu ni, ka bɛ ti kar’ a saria kaman bɛ zaligunim’ ni wuhi shɛm.

²⁵N ni ti je suli niŋ a, ka chɛ ka bɛ zaŋ suhuyiɣisili pam lu a zuɣu. Bɛ ni ti ŋmah’ a nyee min’ a tiba, ka zaŋ takɔbi ku a bi’ shɛb’ bɛn kpalim. Bɛ ni ti gbah’ a bidibisi min’ a bipuɣinsi nti zaŋ ba zaɣ’ nɛma nyo buɣim.

²⁶Bɛ ni ti pirig’ a situra, ka yeeg’ a yɛ’ viɛla zaa.

²⁷Lala ka n yɛn niŋ n-chɛ ka a kɔre min’ a pagɔrisigu tuun’ shɛli a ni daa ʒi n-yi Ijipti na la zani tariga. Ka a kɔre ku lan kpe bɛ ni bee n-lan teei bɛ yɛla.

²⁸Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni zaŋ a niŋ a ni je ninvuɣ’ shɛba ka ŋmaligi ni suhuyiɣisili ka chɛ ba la nuu ni.

²⁹Bɛ ni ti zaŋ jɛlinsi lu a zuɣu n-fa a ni tum tuma nya binshɛŋa la zaa, ka chɛ a zaɣ’ nɛli. Ka a pagɔrisigu tuma la yi palo. A kɔre min’ a pagɔrisigu tuma maa

³⁰n-chɛ ka dimbɔŋɔ paag’ a maa. A ni tum pagɔrisigu tuma ni zuliya shɛba, ka jɛm bɛ buɣa saɣim amaŋa la zuɣu.

³¹A dolila a biɛli naba, dinzuɣu n ni zaŋ o pipia maa gbibil’ a.”

³²Yawɛ ŋun nyɛ ti Duuma ŋɔ yɛliya, “A ni nyu a biɛli pipi’ shɛli din yɛlima ka zilim la ni binnyurigu. Bɛ ni ti la a, ka mal’ a ansarisi, dama di puuni bini galisiya pam.

³³A ni ti nyu m-buɣi, ka nya suhugarigu. A biɛli Samaria pipia maa nyɛla bahiyoli mini dabiɛm pipia.

³⁴A ni ti nyu li zaa n-lɛlilɛli di puuni, ka dim cheei li ka zaŋ di ŋmama maa ŋme m-bɔɣ’ a biha. Man’ Yawɛ ŋun nyɛ yi Duuma ŋɔ n-yɛli lala maa.”

³⁵Dinzuɣu Yawɛ ŋun nyɛ ti Duuma ŋɔ yɛliya, “ A ni tam n yɛla, ka zaŋ ma niŋ a baɣaka zuɣu, dim’ a pagɔrisigu min’ a kɔre tuma maa nyɔri.”

³⁶Yawɛ daa yɛli ma, “Daadam, a ni kari Ohola mini Oholiba saria, ka yɛli ba bɛ ni tum din chihiri shɛŋa?

³⁷Dama bɛ niŋ zina, ka ku niriba. Bɛ niŋ zina bɛ buɣa sani, ka zaŋ bɛ ni daa dɔɣi m bi’ shɛb’ la ku n-ti ba ni bɛ ŋubi.

³⁸Ka dim pahi nyɛla: Bɛ daa lan ta n jɛmbu duu la daɣiri dindali maa, ka saɣim n vuhim dabisa.

³⁹Dama bɛ ni daa zaŋ bɛ bihi maa mali bɛ buɣa dahin’ shɛli maa, dindali maa ka bɛ daa kpe n jɛmbu duu ti ta li daɣiri. Lala ka bɛ daa niŋ n duu maa ni.

⁴⁰Hal bɛ daa timla tuumba katinsi ni bɛ ti boli dɔbba ti ba, ka bɛ daa shiri kana. Bɛ zuɣu ka a su kom, ka bali chilo, ka zaŋ yɛ’ viɛla ye.

⁴¹A ʒinila gar’ shɛli din mali jilima zuɣu, ka zaŋ teebuli zali di tooni n-zaŋ n tulaale zim mini n kpam tam di zuɣu.

⁴²Ka zama bɛn yɔri vuri yiriŋ gil’ a. Ka duŋtaariba pam daa zaŋ dɔbba bɛn nyɛ danyuriba n-yi tiŋgban’ nɛli ni na. Ka bɛ ti zaŋ bansi piri paɣiba maa nuhi ni, ka zaŋ nam zuɣupili’ viɛla pili ba.

⁴³Di saha ka n daa yɛli, “O tum zina hal ti gbarigi, amaa ka dɔbba na kul bɔr’ o.

⁴⁴Dama bɛ kul bɔr’ o mi kaman dɔbba ni bɔri pagɔrili shɛm la. Lala ka bɛ daa bɔri Ohola mini Oholiba bɛn daa nyɛ paɣ’ shɛb’ bɛn bɔri dɔbba pam maa.

⁴⁵Amaa wuntizɔriba ni ti kari ba saria ka yɛli ni bɛ nyɛla sariakaritiba bɛn nyɛ bɛn niŋ zina ka ku niriba. Dama bɛ nyɛla zinaniŋdiba ni ninvuɣ’ kuriba.”

⁴⁶Dama Yawɛ ŋun nyɛ ti Duuma ŋɔ yɛliya, “Chɛliya ka niriba pam ka bɛ sanna nti kpɛhi ba dabiɛm ka ʒe bɛ nɛma.

⁴⁷Ka niriba maa ti labi ba kuɣa, ka zaŋ takɔbiri ku ba. Bɛ ni ti ku bɛ bidibisi mini bɛ bipuɣinsi, ka nyo bɛ yiya buɣim.

⁴⁸Lala ka n yɛn niŋ n-chɛ ka pagɔrisigu tuma naai tiŋgbɔŋ maa ni, ka di leei saɣisigu ti paɣiba zaa, ka bɛ ku lan tum pagɔrisigu tuma kaman yi ni daa tum shɛm maa.

⁴⁹Bɛ ni yo a a pagɔrisigu tuma maa samli, ka a nya yi buɣijɛmbo alahichi tibidarigibo, ka baŋ ni mani n-nyɛ a Duuma Yawɛ.”