Read Dagbani Ɛzɛkiɛl 25 Bible Online

Ɛzɛkiɛl 25 - Dagbani bible

Ɛzɛkiɛl 25

¹Yawɛ daa yɛli ma,

²“Daadam, zaŋm’ a nini kpa Ammɔnnim’ polo tɔɣisi anabitali yɛtɔɣa jɛndi ba.

³Yɛlim’ Ammɔnnim’ maa, ‘Wummiya ti Duuma Yawɛ ni yɛli shɛm, Yawɛ ŋun nyɛ ti Duuma ŋɔ yɛliya: N jɛmbu duu ni daa saɣim ka yi mali suhupiɛlli la mini Izraɛl tiŋgbɔŋ ni kpalim dabari ni bɛ ni daa gbahi Judanim’ chaŋ ka yi mali suhupiɛlli la zuɣu,

⁴n yɛn zaŋ ya mi ti wulimpuhili polo nima ka bɛ sun ya. Ka bɛ ti ti bɛ suɣa yi sani n-ʒini yi sunsuuni. Bɛ ni ti di yi tiwala, ka nyu yi bihim.

⁵N ni zaŋ Raba leei laakuma mɔri ŋubbu shee, ka zaŋ Ammɔnnim’ fɔntinsi leei biŋkɔbbaligu gariche. Di saha ka yi baŋ ni mani n-nyɛ Yawɛ.

⁶Dama Yawɛ ŋun nyɛ ti Duuma ŋɔ ni yɛli shɛm m-bɔŋɔ: Yi ni daa kpahiri yi nuhi, ka mali yi naba tɔri tiŋa, ka yi suhuri paligi yi ni lo zaɣ’ biɛ’ shɛli zaŋ chaŋ Izraɛl tiŋgbɔŋ polo la zuɣu,

⁷ n teei n nuu jɛndi ya, ka zaŋ ya ti zuliya shɛba kaman bɛ ni ŋme tɔbu di ninvuɣ’ shɛba, ka n ti kun ya niriba maa sani n-kpihim yi birili tiŋgbɔŋ maa ni. N ni ti kun ya, di saha ka yi baŋ ni mani n-nyɛ Yawɛ.”

⁸Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Mɔabnim’ yɛliya,‘ Judanim’ kul bemi kaman zuliya shɛb’ ni be shɛm,’

⁹dinzuɣu n ni chɛ ka soya niŋ Mɔab luɣili zuɣu tintariga tinsi din nyɛ Bɛtijɛshimɔt mini Baalimiɔn ni Kiriataim din nyɛ bɛ tiŋgbɔŋ maa jilima tinsi la ni.

¹⁰N ni zaŋ di mini Ammɔnnim’ niŋ wulimpuhili polo nim’ nuu ni, ka bɛ su ba, ka zuliya shɛb’ ku lan teei Ammɔnnim’ yɛla.

¹¹ Ka n ti darigi Mɔabnim’ tibili, ka bɛ baŋ ni mani n-nyɛ Yawɛ.”

¹²Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Ɛdomnim’ daa bɔhi Judanim’ biɛri ka dinzuɣu chɛ ka bɛ kpe taali ni bɛ ni bɔhi ba biɛri maa zuɣu.

¹³Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni yiɣisi n suhu bahi Ɛdomnim’ zuɣu n-ku ninsalinim’ mini biŋkɔbiri zaa, ka chɛ ka di kpalim zani dabari, bɛ ni zaŋ takɔbiri ku ba Tɛman hal ni Dɛdan.

¹⁴ N ni chɛ ka n niriba Izraɛlnim’ bɔhi Ɛdomnim’ biɛri ti ma. Bɛ ni ti niŋ Ɛdomnim’ maa kaman n sujee mini n suhuyiɣisili ni nyɛ shɛm, ka bɛ baŋ m biɛri bɔhibu ni nyɛ shɛm. Yawɛ ŋun nyɛ ti Duuma ŋɔ n-yɛli lala maa.”

¹⁵Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Filistianim’ ni doli dimdi din bi naara mini nia biɛri din be bɛ suhuri ni n-ku niriba la zuɣu,

¹⁶Dinzuɣu Yawɛ ŋun nyɛ ti Duuma ŋɔ yɛliya, ‘N ni yiɣisi n suhu bahi Filistianim’ zuɣu. N ni ku Chɛrɛtinima, ka ku bɛ ninvuɣ’ shɛb’ bɛn kpalim be teeku dul’ la.

¹⁷ N ni bɔhi ba biɛri pam, ka darigi bɛ tibili ni suhuyiɣisili fiɛbiga. N yi bɔhi ba biɛri, di saha bɛ ni baŋ ni mani n-nyɛ Yawɛ.’ ”