Read Dagbani Ɛzɛkiɛl 27 Bible Online

Ɛzɛkiɛl 27 - Dagbani bible

Ɛzɛkiɛl 27

¹Yawɛ daa yɛli ma,

²“Pumpɔŋɔ nyin’ daadam, yilimi kuyilli bahi Taai zuɣu,

³ka yɛli Taai din be teeku noli, ka bɛ mini tin’ shɛŋa din be teeku duli nim’ niŋdi daabiligu la, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Nyin’ Taai, a yɛliya, ‘N viɛl’ zaa.’

⁴A tintarisi bela teeku puuni. Bɛn daa me a, daa me a ka a viɛl’ zaa.

⁵Bɛ daa zaŋla gɔhi tihi din yi Sɛnir na m-mali a dapaɣa zaa. Bɛ daa ŋmahila Lɛbanɔn sida tihi daantalisi na ti sa a ni.

⁶Bɛ daa zaŋla Bashan oki tihi m-mali a ŋariŋ duhirisi. Bɛ zaŋla Saipurus teeku duli wolifahi dari mali a puuni ka niŋ wɔbinyina pa di zuɣu.

⁷Bɛ zaŋla Ijipti tiŋgbɔŋ ni bɛ ni wuɣi tampiɛl’ viɛl’ shɛli niŋ a ŋariŋ tani, ka di nyɛ a tuuta. Ka a zuɣusaa bimparigu din nyɛ zaɣ’ sabinli mini zaɣ’ ʒee la yi Ɛlisha teeku duli na.

⁸Sidɔnnim’ mini Arivadnim’ n-daa nyɛ a kpatoonsi. Ka Zɛmɛr yɛnnim’ nyɛ a ŋariŋ duhiriba.

⁹Gɛbal kpamba mini di yɛnnim’ daa bela a sani m-maani a shee kpatuɣa zaana. Teeku puuni ŋarima zaa mini di kpatoonsi zaa daa nyɛla bɛn be a ni dar’ a nɛma.

¹⁰Pɛriʒia mini Lidia ni Libia tɔbbihi daa nyɛla bɛn be a tɔbbihi bɛn nyɛ a tɔbutuhiri’ biinsi la ni. Bɛ daa zaŋ bɛ nyɔtaɣirisi mini bɛ kuriti zuɣupila sɔŋ a ni. Bɛ daa tir’ a jilima.

¹¹Arivadnim’ mini Hɛlɛchinim’ daa nyɛla bɛn ʒi a goma zuɣu ti gili, ka Gamadinim’ mi daa ʒe a binchunchuna gbini. Bɛ daa zaŋdila bɛ lɔɣubuya yiini a dukpina zuɣu ti tuui. Bɛna n-daa chɛ ka a viɛl’ zaa.

¹²A mini Speen[10] daa gɔrila kɔhigu tab’ tiŋgbɔna ni, yi ni daa mali azichi pam zuɣu. Bɛ daa zaŋ di anzinfa mini kuriti ni dalima ni nuɣiso n-taɣiri yi nɛma.

¹³Ka yi mini Giriisinim’ ni Tubalnim’ ni Mɛshɛkinim’ daa lan niŋdi daabiligu tab’ tiŋgbɔna ni. Ka bɛ daa zaŋdi ninsalinim’ mini daanya nɛma na ti taɣiri yi daguya.

¹⁴Ka Bɛtitɔgarimanim’ daa zaŋdi yuri mini tɔbutuhiri’ yuri ni buntaansi na ti taɣiri yi nɛma.

¹⁵Ka a mini Rɔdinim’ daa laɣindi niŋdi daabiligu, teeku duli tinsi pam daa nyɛla a da’ gahinda, ka bɛ zaŋdi wɔbinyina mini lanjiŋ dari yɔr’ a nɛma zuɣu.

¹⁶A mini Ɛdomnim’ daa niŋdi daabiligu tab’ tiŋgbɔna ni a nɛma din galisi pam zuɣu, ka bɛ zaŋdi tɛkɔisi mini binʒiɛhi ni bɛ ni wuɣi situr’ shɛŋa ni tampiɛl’ viɛla ni kɔral ni rubinim’ na ti taɣiri yi nɛma maa.

¹⁷A mini Judanim’ ni Izraɛlnim’ daa niŋdila daabiligu. Ka bɛ daa zaŋdi alikama din yi Minnɛt na mini za ni shiri ni kpam ni ti’ shɛli din niŋdi niŋgbuŋ ka di bi poori la na ti taɣiri yi daguya.

¹⁸A mini Damaskusnim’ daa niŋdi daabiligu a nɛma pam min’ a daazichi ni daa galisi la zuɣu, dina n-nyɛ: Hɛlibɔn wain mini gumdi.

¹⁹A mini Vɛdannim’ ni Javannim’ bɛn yi Uzal na daa niŋdila a nɛma daabiligu. Bɛ daa lan zaŋdila kuriti mini kasia ni tulaale na ti taɣiri a daguya.

²⁰A mini Dɛdannim’ daa niŋdila wɔrinyaampara daabiligu.

²¹Areebianim’ mini Kɛdar nabihi zaa daa nyɛla a daabi’ yurisi bɛn niŋdi piɛnyama mini piɛlahi ni buhi daabiligu. Binyara ŋɔ ni ka a mini ba daa niŋdi daabiligu.

²²Ka yi mini Shiiba daabihi ni Raama daabihi daa niŋdi daabiligu ni taba. Ka bɛ daa zaŋdi tulaale viɛla balibu kam mini kuɣ’ viɛla ni salima na ti taɣiri yi nɛma.

²³A mini Harannima ni Kannɛnima ni Idɛnnima ni Ashurinima ni Kilimadnim’ daa niŋdila daabiligu.

²⁴Bɛmbɔŋɔnim’ daa niŋdila binyari viɛla mini situr’ sabilifaa shɛŋa bɛ ni wuɣi ni duu puuni tiŋgban’ ni kuntu shɛŋa bɛ ni liɣisiliɣisi, ka zaŋ mihi wuɣi ka di mali yaa daabiligu. Binyara ŋɔ ni ka a mini ba daa niŋdi daabiligu.

²⁵Speen ŋarima n-daa ʒiri a daguya chana. Dinzuɣu a nɛma daa palila teeku bulli zaa.

²⁶A ŋariŋduhiriba n-zaŋ a chaŋ teeku bulli ni. Wulimpuhili polo pɔhim ʒe n-saɣim’ a teeku bulli maa ni.

²⁷Ka a daazichi min’ a nɛma ni a daguya ni a kpatoonsi ni a ŋariŋduhiriba ni a ŋariŋmaaniba ni a dagudariba ni a tɔbbihi bɛn zaa be a ni ni a min’ a niriba zaa bɛn be a sani shim teeku bulli ni a wurimbu dali.

²⁸Ka a ŋariŋduhiriba kuhigu vuri daa chɛ ka teeku duli sɔhigi.

²⁹Ka ninvuɣ’ shɛb’ bɛn daa gbibi ŋariŋtuurisi daa yi bɛ ŋarima ni na. Ka kpatoonsi mini ŋariŋduhiriba zaa bɛn be teeku ni du nti ʒe duli,

³⁰ka duhi bɛ yee kum pam a zuɣu. Bɛ ni ti kɔri taŋkpaɣu puɣi bɛ zuɣuri ka dɔni tampiligim ni bilim.

³¹Bɛ ni ti pini zuɣukpina, ka so buri a zuɣu. Bɛ ni ti kum a zuɣu ni suhusaɣiŋgu mini fabila pam.

³²Bɛ kuhigu maa ni, bɛ ni ti yili kuyilli a zuɣu. Tin’ dini n-na mi n-wurim teeku sunsuuni kaman Taai ni wurim shɛm ŋɔ?

³³A nɛma daa yi kul yi teeku ni na, niriba pam nyari li mi. A daa zaŋ a daazichi min’ a daguya sɔŋ dunia ŋɔ nanima ka bɛ nya azichi.

³⁴Pumpɔŋɔ a saɣimya teeku puuni, kɔbulli ni. Ka a min’ a daguya ni a tumtumdiba zaa laɣim shim.

³⁵A yɛla gari ninvuɣ’ shɛb’ bɛn be teeku duli maa tinsi ni zaa, ka dabiɛm pam gbahi bɛ nanima a zuɣu, ka bɛ nina ni maligi.

³⁶ Kɔhigɔriba bɛn be niriba maa ni ni mal’ a ansarisi. A bahigu maa nyɛla din bie, ka a ku lan beni yaha.”