Read Dagbani Ɛzɛkiɛl 3 Bible Online

Ɛzɛkiɛl 3 - Dagbani bible

Ɛzɛkiɛl 3

¹Ka o daa yɛli ma, “Daadam, dim’ n ni zaŋ binshɛli ti a maa, ŋubimi gbaŋ maa ka chaŋ ti tɔɣisi Izraɛlnim’ yɛtɔɣa.”

²Dinzuɣu ka n daa yaai n noli, ka o zaŋ gbaŋ maa ti ma ni n ŋubi.

³ Ka o daa lan yɛli ma, “Daadam, ŋubimi n ni zaŋ gban shɛli ti a ŋɔ pali a puli.” Di saha ka n daa ŋub’ li, ka di nyaɣisi n noli ni kaman shiri la.

⁴Ka o daa yɛli ma, “Daadam, cham’ Izraɛlnim’ sani nti zaŋ n yɛtɔɣa maa yɛli ba.

⁵Dama m bi timd’ a la zuliya shɛb’ bɛn yɛtɔɣa bi ne, ka di wumbu to sani, amaa n timd’ a la Izraɛlnim’ sani.

⁶Di pala zuliya shɛb’ bɛn galisi, ka bɛ yɛtɔɣa bi ne, ka di wumbu to ka a ku tooi wum li. Biɛhiŋ kani n yi tim’ a bɛ sani, bɛ ni wum a yɛligu.

⁷Amaa Izraɛlnim’ bɛn’ ku wum a yɛligu, dama bɛ bi bɔri ni bɛ wum n yɛligu maa; Izraɛlnim’ zaa ni nyɛ bɛn suhuri kpɛma mini tipawumlinim’ zuɣu.

⁸Nyama, n chɛ ka a nini kpɛma n-gari bɛ nini ni kpɛm’ shɛm, ka chɛ ka a suhu kpɛma n-gari bɛ suhuri ni kpɛm’ shɛm.

⁹Kaman tampiŋ sabinli ni kpɛm’ gari chɛribo kuɣili shɛm, lala ka n yɛn chɛ ka a suhu kpɛma. Di zɔri ba bee n-chɛ ka a suhu zɔhira bɛ lihigu zuɣu, dama bɛ nyɛla duŋtaariba.”

¹⁰O daa lan yɛli ma, “Daadam, n ni yɛn tɔɣis’ a yɛtɔɣa’ shɛŋa ŋɔ zaa, chɛ ka di kpe a tiba ni, ka a deei li niŋ a suhu ni.

¹¹Di nyaaŋa ka a zaŋ li chaŋ a niriba bɛn be tinzun’ tinsi ni la sani nti tɔɣisi ba yɛtɔɣa yɛli ba, ‘Yawɛ ŋun nyɛ yi Duuma ŋɔ ni yɛli shɛm m-bɔŋɔ:’ Bɛ yi wum li bee bɛ yi zaɣisi li wumbu.”

¹²Di saha ka shia daa kpuɣi ma zuɣusaa, ka Yawɛ jilima daa yiɣisi di biɛhigu shee, ka n daa wum vuri pam n nyaaŋa.

¹³Di daa nyɛla binnɛma la kpiŋkpama din daa shihiri taba la mini kalima din baɣi li la vuri. Di daa vurimi kaman tiŋgbani n-damdi pampam la.

¹⁴Ka Naawuni shia maa daa kpuɣi ma zuɣusaa zaŋ ma chaŋ, ka n daa chaŋ ni suhugarigu pam mini suhuyiɣisili, dama Yawɛ nuu daa pa n zuɣu pam.

¹⁵Ka n daa chaŋ bɛ ni daa gbahi shɛba chaŋ Tɛlabib, ka bɛ be Kɛba Mɔɣili duli la sani. Ka n daa ʒini bɛ sani nimaani daba ayopɔin.

¹⁶Daba ayopɔin nyaaŋa, ka Yawɛ daa lan tɔɣisi ma yɛtɔɣa yɛli,

¹⁷“Daadam, n zaŋ a leela Izraɛlnim’ gula. A yi ti wum ka n yɛli yɛtɔɣ’ shɛli, nyin’ zaŋmi saɣisigu din yi n sanna saɣisi ba.

¹⁸N yi yɛli ninvuɣ’ biɛri, ‘Biɛhiŋ kani yi ni kpi.’ Ka a bi saɣisi ba bee n-tɔɣisi yɛtɔɣa saɣisi ninvuɣ’ biɛri maa ka bɛ zo n-yi bɛ ninvuɣ’ biɛtali tuma maa ni din ni chɛ ka bɛ tiligi bɛ nyɛviya, ninvuɣ’ biɛri maa ni kpi bɛ tuumbiɛri maa zuɣu, amaa ka n zaŋ bɛ kum taali ʒil’ a.

¹⁹Amaa a yi saɣisi ninvuɣ’ biɛri ka bɛ bi zo n-yi bɛ ninvuɣ’ biɛtali ni bee n-zo n-yi ninvuɣ’ biɛtali tuma ni bɛ ni kpi bɛ tuumbiɛri maa zuɣu, amaa ka nyin’ tiligi a nyɛvili.

²⁰“Yaha, wuntizɔriba yi chɛ wuntitali tuma ka tumdi tuumbiɛri, ka n zaŋ kuɣituurili sɔŋ bɛ tooni, bɛ ni kpi, a ni bi saɣisi ba zuɣu. Bɛ ni kpi bɛ daalahichi maa zuɣu ka so ku lan teei bɛ ni daa tum wuntitali tuun’ shɛŋa la yɛla. Amaa ka n zaŋ bɛ kum maa taali ʒil’ a.

²¹Amaa a yi saɣisi wuntizɔriba ni bɛ di tum alahichi, ka bɛ bi tum alahichi maa, bɛ shiri ni be bɛ ni deei saɣisigu maa zuɣu, ka a mi tiligi a nyɛvili.”

²²Ka Yawɛ nuu daa pa n zuɣu nimaani ka o yɛli ma, “Yiɣisim’ zani n-chaŋ vinvamli ni ka n ti tɔɣis’ a yɛtɔɣa nimaani.”

²³Di saha ka n daa yiɣisi chaŋ vinvamli maa ni, ka Yawɛ jilima ʒe nimaani ŋ-ŋmani n ni daa pun nya jilima shɛli Kɛba Mɔɣili dul’ la. Ka n daa lu n-zaŋ n nini kpa tiŋa.

²⁴Ka Naawuni Shia daa kpe n ni n-yiɣisi ma zali n naba zuɣu. Ka o daa tɔɣisi ma yɛtɔɣa yɛli ma, “Kulimi ti kpari amaŋ’ niŋ a yiŋa.

²⁵Ka nyin’ daadam, bɛ ni ti niŋ mihi niŋ a n-zaŋ li lo a, ka a ku lan tooi yina niriba ni.

²⁶Ka n ti chɛ ka a zilinli tabili a noli puuni, ka a leei birigu, ka ku lan kpahi bɛ zuɣu ni, dama bɛ nyɛla duŋtaariba.

²⁷Amaa n yi ti tɔɣis’ a yɛtɔɣa, n ni chɛ ka a noli yaai ka a yɛli ba, ‘Yawɛ ŋun nyɛ yi Duuma ŋɔ yɛliya.’ Chɛ ka bɛn ni wum, wum. Ka chɛ ka bɛn zaɣisi wumbu, zaɣisi. Dama bɛ nyɛla duŋtaariba.”