Read Dagbani Ɛzɛkiɛl 31 Bible Online

Ɛzɛkiɛl 31 - Dagbani bible

Ɛzɛkiɛl 31

¹Yuun’ piniyini puuni gol’ so ŋun pahir’ ata dahin yini dali ka Yawɛ daa yɛli ma,

²“Daadam, yɛlim’ Ijipti naa Firawuna min’ o niriba zaa: ‘A galisim lee ŋmanila ŋuni?

³Zahimmi Asiria din nyɛ Lɛbanɔn sida tia, din mali wul’ viɛla, ka nyɛ tibɔŋ ni mahim, ka nyɛ din wɔɣa pam, ka di wulikpani chaŋ ti tɔri sagbana la.

⁴Kom daa beni n-sɔŋ li. Ka tiŋgbani ziliŋ daa chɛ ka di zooi niŋ wɔɣilim, ka chɛ ka di mɔɣa kom daa zo n-tiɛli bɛ ni daa sa li luɣ’ shɛli maa, ka di kɔsoya kom zo n-tiɛli tiŋgbɔŋ maa ni tihi zaa.

⁵Dinzuɣu n-chɛ ka di wɔɣ’ zuɣusaa gari mɔɣu ni tihi zaa. Di wulikpani daa bara, ka di wula wɔɣa, di ni daa nyari kom pam zoori la zuɣu.

⁶Noombihi zaa daa tɛrila bɛ tɛri di wula zuɣu; ka mɔɣu ni biŋkɔbiri daa dɔɣiri bɛ bihi di mahim, ka zuliya pam ʒiini di mahim.

⁷Di galisim mini di wula wɔɣilim zuɣu daa chɛ ka di viɛla, dama di nyaɣa daa chaŋmi ti kpe kom pam ni.

⁸ Sida tihi din daa be Naawuni tihi puu la ni daa bi paai li. Gɔhi tihi bi paai di wulikpana. Nira ku tooi zaŋ ti’ shɛŋa din be polipoli buɣisi di wula. Tia daa ka Naawuni tihi puu la ni din viɛl’ paai li.

⁹Mani n-daa nam li ka di viɛla, ka mali wula pam. Ka Idɛn tihi zaa din daa be Naawuni tihi puu la ni daa zabiri li nyuli.

¹⁰Dinzuɣu, Yawɛ ŋun nyɛ ti Duuma ŋɔ ni yɛli shɛm m-bɔŋɔ: Di ni ti wɔɣa, ka di nyoli chaŋ ti be sagbana ni, ka di ni mali karimbaani maa zuɣu,

¹¹n ni ti zaŋ li niŋ zuliya shɛb’ naa nuu ni, ka o ti niŋ li kaman di tuumbiɛri ni simdi shɛm. N ni ti yihi li bahi.

¹²Tinzunnim’ bɛn nyɛ ninvuɣ’ biɛri gari zuliya kam ni ti ŋmaai li luhi ka chɛ li sɔŋ; ka di wula ti lu zoya zuɣu mini vinvama ni. Ka di wulikpani kabisi ti lu kom ni be luɣ’ shɛŋa ni tiŋgbɔŋ maa ni. Ka dunia ŋɔ ninsalinim’ zaa ti zo n-yi di mahim maa ni ka chɛ li.

¹³Di ni ti lu n-doya ka noonsi ti tamdi di mundili maa zuɣu, ka mɔɣu ni biŋkɔbiri zaa ti be di wulikpana maa ni.

¹⁴Dimbɔŋɔ zaa ni ti niŋmi ni di chɛ ka tihi dinkam ʒe m-baɣi kom ti ku lan zooi wɔɣa bee n-chɛ ka di wulikpana chaŋ ti be sagbana ni. Ka tia kam din nyuri kom ti ku lan zooi paai di wɔɣilim maa. Dama di zaa ni ti nyɛla din yɛn kpi n-kpe tiŋgban’ ni kaman binshɛɣukam ni kpiri shɛm la n-chaŋ ti pahi bɛnkam pun faai siɣi kpiimba biɛhigu shee la zuɣu.”

¹⁵Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Di ni ti yɛn siɣi kpiimba biɛhigu shee dahin’ shɛli maa n ni ti chɛ ka kɔbulli ni kom lim li, ka m pi li. N ni ti mɔŋ di kulibɔna kom, ka taɣi di kopalisi zali. N ni ti chɛ ka Lɛbanɔn niŋ liɣa di zuɣu, ka mɔɣu ni tihi zaa vari suui di zuɣu.

¹⁶N ni daai li luhi kpiimba biɛhigu shee maa m-pahi bɛn pun be kpiimba biɛhigu shee maa zuɣu. Tiŋgbana ni ti sɔhigi di lubu vuri zuɣu, ka Idɛn tihi zaa din nyɛ Lɛbanɔn ti’ gahinda ka nyari kom viɛnyɛliŋga la suhuri ni ti maai kpiimba biɛhigu shee maa.

¹⁷Bɛ gba ni ti dol’ li chaŋ kpiimba biɛhigu shee maa nti pahi bɛ ni zaŋ takɔbiri ku zuliya shɛba mini bɛ zɔnim’ la ni zuliya shɛb’ bɛn daa ʒi di mahim la zuɣu.

¹⁸Idɛn ti’ dini n-daa lee mali jilima, ka galisi ŋman’ a? Pumpɔŋɔ n ni daag’ a mini Idɛn tihi niŋ tiŋgbani puuni. A mini bɛn bi guni la ni ti laɣim dɔni luɣ’ yini m-pahi bɛ ni daa zaŋ takɔbi ku ninvuɣ’ shɛb’ la zuɣu. Dimbɔŋɔ nyɛla Firawuna min’ o tɔbbihi zaa. Yawɛ ŋun nyɛ ti Duuma ŋɔ n-yɛli lala maa.”